27
Hayubu agenderera ukudeta
1 Hayubu anagenderera ukudeta kwokuno:
2 «Ngiisi íbingwaniini, Rurema woꞌbushobozi bwoshi, ye kabinjaagiza,
ye na tumiri umutima gwani gukola mwoꞌbululu.
Aahago! Nga kwo Rurema alyagagi ho,
3 nabiika indahiro kweꞌkyanya ngiri ho
na mbe ngiri mu yisa umuuka,
4 ndâye dete íbitali nga byo.
Akanwa kaani, katanâye kizi beesha.
5 «Na kundu mugweti mugandega, ndâye yemeere kwo muli mu deta ukuli.
Si ngakizi deta kwo ndi buzira buhube, halinde ukufwa kwani.
6 Nganiziizi ukuli kwani, ndanâye kuleke.
Mu burambe bwani bwoshi, ndagateerwa neꞌbihamba.
7 «Umugoma wani akwaniini ahanwe, kuguma na banangora-mabi.
Ngiisi kwo banangora-mabi bali mu hanwa,
kwo naye akwaniini ahanwe.
8 Si yabo babi, batali noꞌmulangaaliro,
kinatume Rurema agabayita nyene.
9 Ikyanya bagayiji gwatwa naꞌmakuba,
Rurema atagayuvwiriza ikimboloogo kyabo.
10 Yabo banangora-mabi, batangashambaala imbere lya Rurema woꞌbushobozi bwoshi,
batanâye mútabaaze.
11 «Ngakuyereka ngiisi kwoꞌbushobozi bwa Rurema buli mu ba.
Ndaabyo ngaabisha hiꞌgulu lyage.
12 Yibyo byoshi, si keera mukabiyibonera mwenyene!
Aahago! Kituma kiki muki gweti mugandetera amagambo goꞌbusha?
13 «Yabo banangora-mabi, batali neꞌkimino.
Kyo kitumiri Rurema woꞌbushobozi bwoshi, agabahana kwokuno:
14 Kundu bangabuta abaana bingi,
haliko yabo baana bagayitwa ku ngooti,
kandi iri bafwe noꞌmwena.
15 Ngiisi ábagafuuka, bagakizi fwa ku kiija.
Ikyanya bagaafwa, banamufwiri baabo batagakizi bagandaara.
16 «Yabo bandu babi, kundu bangalunda-lunda ifwaranga katundu,
banabe bagweti ibyambalwa bingi ngiꞌbumba lyoꞌmubuuvi,
17 haliko abandu boꞌkuli, bagayiji biyambala.
Neꞌfwaranga zaabo, abandu bazira buhube banazigabaane.
18 «Yabo banangora-mabi, kundu bali mu yubaka,
bali mu yubaka naaho inyumba lunjega-njega ngeꞌnuzi za nalutangulira,* 27.18 Kandi iri: nangora-mabi ali mu yiyubakira inyumba nga kashwa.
zinali niini nga kitunda kyoꞌmulaazi ali mu yubaka mu ndalo.
19 Yabo babi, bali mu gendi gwejera bakiri bagale,
haliko, ikyanya bali mu vyuka,
banayiji gwana ubugale bwabo ndaakibwo.
20 Ikyoba kiri mu babindikira nga mwijulire.
Bali mu yehuulwa neꞌkihuhuuta bushigi.
21 Imbuusi ngayu ukulyoka isheere, iri mu bayehuula, banabe batakiri ho.
Mukuba, iyo mbuusi, iri mu bashunguusa hala.
22 «Na kundu bagweti bagagaagala, mu kutibita ubushobozi bwayo,
haliko, iri mu batumbikira buzira lukogo.
23 Iyo mbuusi, ikyanya bali mu puumuka, iri mu ba nga yabafuka akahoogo,
inakizi bashekeereza, mu kushunguuta uluguuju.»