1-4  Matyu 15:1-20Parasipi, Juu pitakapi dupame nyakamanya yumbangenya mana setapae dupa wata-minao, nee nalanya kingi auu pyoo wasa pyakondape petala nee nengema. Dupame maketanya katao ipupala mee nee nala naenya, kingi wasa pyatalaka nee nengema. Mana singili pyoo, kapopi, sisopene pengepi, penge kopame wasepaepi, pituu nee nenge tokopi, dupa wasa pingimaka. Dee yumbangenya mana setapae waka longo mendapu miningimaka. Dopa pingima Parasipi, Mosesanya loo mana nyepae mendapu Jerusalema katao epeamipi, dupa Jisasa katea dokonya ipao kambu piami. Dokopa baanya disaipolo yangimi kingi wasa napyao, kingi kaimala pipaeme nee nyoo neaminosa, akali dupame kandatala kopeta pilyaminona leami. 5 Dopa latala Parasipi, Mosesanya loo mana nyepaepi, dupame Jisasa tipa pyoo, “Embanya disaipolo dupa kingi wasa napinya mee nee nelyamino doko, aipuma yumbangenya mana setapae dupa wata-minala naelyamipi?” leami. 6-7  Ais 29:13Dopa leaminopa Jisasame dokaitanya pii yanu pyakamaiyoo, “Nyakama mana tolatae miningi manemane pingima dupa-pipa makande pyokondape pyoo Aisaiyame dapa lea: ‘Akali tata dakeme pii lelyamino dupame namba anda-anda singingima. Dopaka doko, dokaitanya mona dupa etete waka palengema. Endakalinya mana setapae dupa mana lelyamino dokome, dokaitame namba kiningi mambo pyala naengemana’ lao pepa pyapae silyamo. 8  Nyakamame Gotenya mana setapae dupa nepatala, nyakamanya lotuu mana wambatae dupa wata-minao, kapopi, sisopene pengepi dupa wasa pingima. Dopa pyoo katao, nyakamame mana dopaleaka longo mendapu miningimana” lea.

9 Dopa latala baame dokaita lamaiyoo, “Nyakamanya mana wambatae dupa wata-minamana latala, Gotenya mana setapae dupa nyakamame waa katao daa latala nepelyamino. 10  Eks 20:12; 21:17; Lep 20:9; Diut 5:16Mosesame lao pituu, ‘Embanya endangipa takangepa dolapo anda-anda semaiyoo katape’ lea. Goteme pii mende apata lao pituu, ‘Endakali mendeme baanya endangi takangepi mende pii koo latamo doko, baa pyao kumasepengena’ lea. 11-13  Dopa leaka doko nyakamame lao pituu, ‘Endakali mendeme baanya endangi takangepi mende lamaiyoo, “Nambame emba oapi dipenge dupa pitaka Gote maipengena latae silyamona” latamo doko yakana’ lengema. Dopa lelyamino dokome, baanya endangi takangepa dolapo nisepae mende namaina lao nyakamame daa lengema. Nyakamanya mana wambatae dupa wata-minamana latala, Gotenya pii doko mee joo nepengema. Dopa pyoo katao, nyakamame mana dopaleaka longo mendapu miningimana” lea.

14 Dopa latala Jisasame endakali kambu doko pitaka baa katea dosa epena latala lamaiyoo, “Nambame pii lelyo dake sepala, nyakama pitakame masokondape pyepape: 15  Kamaka singi mende endakali mende-kisa kolandelya dokome baa kaimala pisala naenge. Endakali mende-kisa koko palelya dupa kamaka pyakalyilya dokome baa kaimala pisingi. 16  Endakali mende kale katenge-tamo doko, nambame pii lelyo dutupa baame sepengena” lea.

17 Endakali kambu doko yakinatala Jisasa andaka pao peteamopa, baanya disaipolo dupame kongali lea dokonya tipa piami. 18-19 Tipa piaminopa baame dokaita lamaiyoo, “Nyakamame apata masala naelyamipi? Kamaka singi mende endakali mende-kisa kolandelya doko mona andaka napenya, inginya soo kamaka epenge. Dopa pilya dokome nee dupa pitaka auu pisilyamopa, endakali doko kaimala pisala naenge doko nyakamame masala naelyamipi?” lea. 20-21 Dopa latala baame lao pituu, “Endakali mendenya monanya palenge doko kamaka pyakalyingi dokome baa kaimala pisingi. Masingi koopi, kepo kolengepi, endapi akalipi nyelenyele paengepi, endakali pyao kumasingipi, 22  pake nengepi, popaita pingipi, koo pingipi, minakasingipi, yongenya pyoani kaenge mana koeyapae dupa miningipi, waka mendenya oapi seta dupa kandatala nyipu laka lao masingipi, lao nepengepi, alyasale joo kalyona lao masingipi, kyakaenge mana miningipi, 23  koo dutupa pitaka monanya paliu kamaka pyakalyilya dokome endakali dupa kaimala pisingina” lea.

24  Matyu 15:21-28Jisasa baa sakatatala, yuu doko yakinao Taeyapa, Saidonepa dolaponya yuu sia dupanya pea. Pupala baa anda mendenya kolandatala, elyakalao pititoo lao masiaka doko, baa yalo pipenge nanjia. 25 Dokopa imambu koo paleta wanaku koo mendenya endangi dokome Jisasa anda dokonya pilyamo lapae sepala, anda dokonya pao kolandatala, Jisasanya moko setea dosa ipao luma lakea. 26 (Enda doko baa Giriki pii lenge, Siropinisia tange mende.) Baanya wanenge doko-kisa imambu koo palenge doko Jisasame watao pyakamaina lao tee lea. 27 Dopa leamopa Jisasame enda doko lamaiyoo, “Wanenya nee dupa nyepala, pyale lao yana dupa maitamopa auu napita. Dopana, wambao wanenya nee dupa tange nao tiaka kaena maipengena” lea. 28 Dopa leamopa enda dokome yanu pyao, “Akali Andake, doko kiningiaka lelyeno doko, wane dupame nee nelyaminopa, kuku kakanapi isa pelya dupa yana toko pundipundi kalyami dupame nyoo nengemana” lea. 29 Dokopa Jisasame enda doko lamaiyoo, “Embame dopa lelyeno dokonya, imambu koo dokome embanya wanenge doko yakinatala patelyamona, emba andaka puu” lea. 30 Dokopa enda doko andaka pupala kandeamopa, imambu koo dokome baanya wanenge doko yakinatala pateamopa, baa tokonya paliu sia.

31 Taeyapa, Saidonepa dolaponya yuu sia dupa yakinatala, Jisasa baa yuu Dekapolisa dokonya pyakamatala, Galali pete dokonya pea. 32 Dokopa endakali mendapuame akali kaleketa muumaa mende laminao baa katea dokonya ipupala, akali doko-kisa kingi setena lao kyeto joo Jisasa tee leami. 33 Dopa leaminopa endakali kambu doko yakinatala, Jisasame akali doko iki laminao umbisale pupala, baanya kingi konde dolapo akali dokonya kalekaita pyandea. Dopa petala Jisasame baanya kingi kondenya sopokali talyinya pisetala, muumaa dokonya kekenya watandea. 34 Dopa petala akali doko kondo kaeyao, kaiti-kisa kandalyetae katao baa lamaiyoo, “Epataa” lea. (Pii dokonya tenge doko, “Lumba.”) 35 Dopa lalu piamopa, akali dokonya kalekaita dolapo lumbapa, keke doko tolata piamopa, baa pii tolao lea. 36 Dopa pia doko endakali kambu dokome endakali mende lamaiya naena lao Jisasame kyeto joo daa lea. Dopa leaka doko, dupame etete eteke pyao lao taeyami. 37 Dokopa siamipi, kandeamipi endakali dupa eteteaka paka kaeyao walu latala lao pituu, “Baame kalai dupa pitaka auu pyoo pilyamo. Kaleketa dupame pii sina lata, muumaa dupame pii lena lata pilyamoakana” leami.