1 Kaimia* Dan 2:21; Mt 24:36; Ap 1:7-8 paluma, dopa pitamo doko ee kana utupa patatamopana lawapi yuu gii dokonyana lawapi endakali mendeme nyakama langyuu pepa pyao peakapenge tenge mende nasilyamo. 2 Doko,* Mt 24:42-44; Lu 12:39; 1 Ko 1:8; 2 Pi 3:10; Pa 3:3 pake nenge endakali mende ipapomo lao masala naengesa epengeli pyoo Kamongo dokonya gii doko ipatana lao nyakama tangeme masokondape pyoo kalyamino. 3 Endakali* Jet 4:31; 6:14; Ese 13:10; Mt 24:39; Lu 21:34-35; Jo 16:21-22; 2 Te 1:9 dupame epe yuu yongapumopa naima auu pyoo kalyamanona latamino gii dokopaka enda wane tongata pilyamo doko maita pingi dokotekee joo koyasingi doko dupa-kisa lee mendai andinyala ipata. Dokopa dupa paka pupenge nanjeta. 4 Dopaka* Ap 26:18; Ep 5:8-9; 1 Jo 2:8 doko, kaimia paluma, nyakama iminjingi dokonya nakalyamino. Pake nenge endakali mende epengeli pyoo gii doko nyakama-kisa naipata. 5 Nyakama* Jo 8:12; Lo 13:12; Ep 5:9 pitaka tii pingi dokonya wane joo katao kotaka gii dokonya wane joaka kalyamino. Naima kukapa iminjingipa dolaponya nakalyamano. 6 Dopana* Mt 24:42; Lo 13:12-13; 1 Pi 1:13; 4:7; 5:8 endakali waka dupa luu palengemali pyoo, naima luu palya naenya, lenge tao katapala naima tange isoo katamana. 7 Luu* Ap 2:15; 2 Pi 2:13 palenge endakali dupa kuka palengema. Bia akipi longo lao napala kyekenge endakali dupa kuka nao kyekengema. 8 Dopaka* Ais 59:17; Lo 8:24; 1 Ko 13:13; Ep 6:13-17; 1 Te 1:3 doko, naima kotaka kalyamano dupame tange isoo katamana. Isoo katao pituu, yanda pyaanya konambi miningili pyoo naimame masoo minao paengepa auu kaengepa dolapo minao katamana. Yanda pyaanya aiyombanya andu pingili pyoo etete pyoo nyepae katatamana lao masoo malisoaka katenge doko andu pyoo katamana. 9 Doko,* 1 Te 1:10; 2 Te 2:13-14 Goteme naima baanya imbu kaenge doko nyetaminopa lao kalyepape laa naya. Daa, naimanya Kamongo Jisasa Kataisame naima pyoo nyina lao kalyepape lea. 10 Kataisa* Lo 14:8-9; 1 Te 4:14 doko naimanyana lao kumikea. Naima lenge tao katatamanopi kumatamanopi baapa awapa katatamana lao baame dopa pia. 11 Ongonya* Ep 2:20; Ju 20 nyakamame mende mona yaepasa yaepasa pyoo, mende pupu lasa lasa pyoo pilyaminoli pyoo pyoaka kalyepape.

12 Kaimia* 1 Ko 16:16,18; Ga 6:6; 1 Ti 5:17; Ip 13:17 paluma, nyakama naimame dapa langilyamano: nyakamanya kainanya kalai pilyamino akali dupa nyakamame andanda semaiyoo kalyepape. Akali dupame nyakama minao tolasoo isoo katena lao Kamongo dokome katena lea. 13 Kalai* Mk 9:50 dopale pilyamino dokonya nyakamame akali dupa auu kayao eteteaka andanda semaiyoo nyakamalapo mona soloo pyoo kalyepape. 14 Kaimia* Ais 35:4; Lo 14:1; 1 Ko 8:7; 2 Te 3:6,11,15 paluma, naimame nyakama kyoto joo langilyamanona, makamaka kaenge endakali dupa maka nakaena lao lamaiyepape. Mona endaki minapae dupa pupu lasalapape. Tambo lapae dupa kingi maiyoo nisalapape. Endakali dupa pitaka lao masetala yapa maka nakayao malisoaka kalyepape. 15 Endakali* Eke 21:23-25; Pot 20:22; Mt 5:38-39; Lo 12:17-19; 1 Pi 3:9 mendeme mende-kisa koo pitamo dokopa itingi yanu pyao koo napina laapape. Dee nyakamame koteaka lao mende epe pii pii pyoo endakali waka dupa pitaka-kisa epe pimua laka lao masoo pyepape.

16 Koteaka* Pl 1:4; 4:4 lao mona yaepao kalyepape. 17 Koteaka* Lu 18:1; Ep 6:18 lao loma soaka kalyepape. 18 Upa* Ep 5:20 pitakame nyakama-kisa andinyala ipatamopa nyakamame Gote lao yaka pilino laapape. Nyakamame dopa pimili lao Goteme Kataisa Jisasa dokonya katao masilyamo.

19 Nyakamame* 1 Ko 12:1,10-11; Ep 4:30 Oli Sipitisanya itate doko konjembala nayalapape. 20 Gotenya* 1 Ko 14:1,31,39 pii panao langilyamino dupa koo lamona latala daa laa nayalapape. 21 Dupa* 1 Ko 14:29; 1 Jo 4:1 pitaka makande petala epe doko minokondape pyoo minalapape. 22 Koo* Jop 1:1,8; 2:3 pingi tata dupa pitaka wandinya nepao kalyepape.

23 Epe* Ais 11:6; Sak 9:8-10; Lo 15:33; 1 Te 3:13; 2 Te 3:16 yuu yongasingi Gote tangeme nyakama etete epe injisokondape pipya laka lao masilyamano. Naimanya Kamongo Jisasa Kataisa dee ipatamo dokopa nyakamanya imambupi monapi yongepi dutupa auu pipae joo nyakama-kisa koo tengepi mende nasipya laka lao masilyamanoaka. 24 Nyakama* 1 Ko 1:9; 2 Te 3:3 ipupa lelyamo Gote dokome mende pitoo latala kini pingina, dokome angi pita.

25 Kaimia* Lo 15:30; Kl 4:3; 2 Te 3:1 paluma, nyakamame naima lao masetala Gote lao loma salapapeaka. 26 Nyakamame* Lo 16:16; 2 Ko 13:12 masoo miningi kaiminingi dupa auu pyoo katena lao Gotenya endakali dupame pipengeli pyoo mende kopyoo nunu pii pii pyoo kalyepape. 27 Kamongo* Kl 4:16 dokonya kenge doko lao nyakamame masoo miningi kaiminingi dupa pitakame sina lao pepa dake itaki pyalapape lelyo.

28 Naimanya Kamongo Jisasa Kataisame nyakama kandao mona epe palyekena.