Kon A Kiin
Den sani di Masaa Jesesi puu kon a kiin gi Johanisi
Wan wowtu a fesi
We, disi na a lasiti pisi fu Masaa Gadu Wowtu. Da na wan fu den gaan apaiti bosikopuman di den e kai Johanisi, ne en sikiifi a pisi ya. Da, a yuu ten de a be kon gaandi kaba. Da na wan pikin tabiki den e kai Patimosi a be de e sikiifi den sani ya. Den be tyai en go fika anda enke sitaafu fu di a be e biibi a Masaa Jesesi.
Da a pisi fu Masaa Gadu Wowtu ya e taki fu wanlo sani Masaa Jesesi be puu kon a kiin gi Johanisi, di a be de na a pikin tabiki ya. Den sani ya be kibii gi libisama, ma Johanisi si den anga en ain enke gaan foondoo sani. Sani di be pasa kaba, sani di e pasa anga sani di o pasa bakaten.
Da den sani di Johanisi sikiifi ya, a sikiifi den gi den sama fu Masaa Jesesi di be e miti makandii a den seibin kondee na a ten de fu oli keliki. Ma soseefi den de gi ibii sama di e biibi a Masaa Jesesi tide ete. Da a sikiifi den sani ya gi den fu den ati sa sidon anga losutu anga fu den oli a biibi go doo. Bika a yuu ten de, da sama be e sitaafu den biibisama te, fu di den be e biibi a Masaa Jesesi ede. Da den mu oli go doo, bika a buku ya e leli taki, te wan dei, da Masaa Gadu o wini hii den takiman fu a goontapu ya, mokisa anga a didibii poti a ondoo en futu.
Da, fa Masaa Jesesi e soi Johanisi den sani de, da na somen sowtu fasi ai soi en den. A soi en somen sani a nongo fasi, taawan enke pelenki, taawan baka na enke deen. A soi en fa a saatan, a basi fu didibii takuu kisi. A soi en fa a kondee fu Masaa Gadu di den e kai a Nyun Jelusalem moi kisi. Da na so a soi Johanisi somen somen sowtu sani moo.
Da, te yu o leisi a pisi fu Masaa Gadu Buku ya, da yu o si kiinkiin taki, Masaa Gadu anga a Manpikin fi en, di den e kai a Pikin Sikapu, na a winiman fu alaten.
1
Bigin fu a buku
1 Masaa Gadu soi Jesesi Kelestesi den kibii sani, di mu pasa dyonson. Masaa Gadu gi en den sani ya, fu a soi den sama, di e dini en. Ne Masaa Jesesi sende a Engel*f1* fi en go a Johanisi go soi en den sani ya. 2 We, ne Johanisi sikiifi ala san a si enke kotoigi. Soseefi, a wowtu di komoto a Masaa Gadu anga ala san Jesesi Kelestesi seefi taki.
3 Da seigi fu wan sama di e leisi den wowtu di Masaa Gadu puu kon a kiin a ini a buku ya, gi taa sama. Soseefi tu, seigi fu ibii sama, di e aliki anga ala teke den sani di sikiifi ya oli. Bika a ten koosube.
Johanisi e sende odi gi den
seibin keliki
4-5 We, mi Johanisi e sikiifi gi den seibin keliki na a pisiwataa fu Asiya. Meke a gaan bun ati fasi fu Masaa Gadu di de fu tego, anga den seibin jeje di de a fesi fu Masaa Gadu kownu sutuu, anga Masaa Jesesi di e taki sani sondee lei, de anga u. Soseefi, meke u ati de switi. Masaa Jesesi na a fosi sama di opo komoto a dede. Da, ai libi fu tego. Ne en na a edeman fu ala den kownu fu goontapu. A lobi wi te, ne a teke dede meke en buulu lon gi wi, enke paiman fu puu wi a takuudu anga ogii.
6 Ne a meke u kon de a ini a Nyun Tii fi en, pe a sidon enke kownu fu tii den foluku. Soseefi, a meke u toon begiman fu tyai sama kon a Masaa Gadu fesi. A dati meke, ne en fiti fu fende ala gaandi anga makiti fu tego. Amen, na so a de!
7 We, u luku! Ai kon a ini den woluku! Da, ala sama o si en. Den sama, di be sutu en anga lansi ne en sikin bee seefi o si en tu. Da, ala foluku a goontapu sa bali kee e kusumi gaan kusumi, te den o si en so. Amen, na so a de! 8 We, Masaa Gadu e taki: “Mi na a Alfa anga a Omega*f2*! Sobun a Fosiwan anga a Kiiboiwan, di abi ala makiti. Awan di de, di be de, anga di e kon.”
Johanisi si Masaa Jesesi a Patimosi
9 Mi, Johanisi, na u baala a ini a biibi. Mi e nyan gaan pina enke u anda seefi, fu di mi tei ati fu oli doo, na a gi fu a Bun Nyunsu. Soseefi, mi de a ini fende a bun di de a ini a Nyun Tii fu Masaa Gadu. Ma, mi e tei ati oli doo enke u anda. Da, mi be de a sitaafu na a pikin tabiki, Patimosi ya, fu di mi be e taki a wowtu fu Masaa Gadu, anga di mi be e kotoigi fu Masaa Jesesi. 10 Da, na a dei fu Masaa, da a Jeje fu Masaa Gadu be de a mi tapu wan apaiti fasi. Ne mi yee wan gaan taanga tongo a mi baka enke gaan tutu e boo. 11 A tongo taki: “Sikiifi den sani, di yu e si ya a ini wan buku, da i sende en go a den seibin keliki a:
1. Efese
2. Simelina
3. Peligamem
4. Tiyatila
5. Saadesi
6. Filadelfiya
7. Laodiseya.”
12 We, di mi daai luku, fu si sama e taki anga mi, ne mi si seibin gowtu kandaa tiki*f3*. 13 Da, mi si wan sama a den seibin gowtu kandaa tiki mindii. A sama ya gei wan Manpikin di saka kon toon libisama ya. A wei wan koosi, di langa doo, te ne en futu. Da, a tei wan gowtu banti lontu en boo fu ati. 14 En ede uwii weti enke weti katun. Da en ain de enke faya, e leti lelele. 15 En futu de enke, te den poti kopoo a ini onfuu. Da, en tongo taki gei wan gaan sula. 16 A oli seibin sitali ne en leti ana. Da wan koti fetihow, di saapu a tu se e komoto a ini en mofu. Da en fesi e beenki enke a twalufu yuu san.
17 Ne, di mi si en, ne mi kai holow ne en futu enke mi dede. Ma a poti en leti ana a mi tapu, ne a taigi mi taki: “Ná feele! Mi na a Fosiwan anga a Kiiboiwan. 18 Mi na Awan di e libi. Mi be dede, ma luku, mi e libi fu tego. Mi abi den sooto fu dede*f4* anga dedekondee*f5*.
19 “We, sikiifi den sani di yu si. Soseefi den sani, di e pasa now anga den di o pasa bakaten. 20 Mi o taigi yu a kibii toli fu den seibin sitali, di i be si a mi leti ana, anga den seibin gowtu kandaa tiki. Den seibin sitali, na den seibin Engel fu den seibin keliki. Da den seibin kandaa tiki, na den seibin keliki seefi.

© 2009 WBT