1 ꞊Dhɛ 'ö ‑dhɛkpaɔyi "sɔɔdhu ꞊ya ziö, 'yö "saabhomɛ ‑gɔmɛ 'kpii‑ 'wo‑ ‑dhɛ Ananiasö bha waa‑ mɛ zizi ‑nu 'bha ‑nu, waa‑ ‑nu ‑bha dhiang "dhüsümɛ do 'wo‑ ‑dhɛ 'pö Tɛɛtudhusö bha 'wo dho Sezadhe. 'Yö 'wo dho ‑gblüdë Fedhisö ‑kuu "dhiʋ̈ kö 'wo Pɔdhö ‑da ‑dhɛ. 2 'Yö 'wo Pɔdhö ‑dhɛ, 'yö nu, 'yö Tɛɛtudhusö ‑yö ‑ya Pɔdhö këwɔn ‑gɛn dɔ ‑sü ‑bha 'ö‑ pö: 3 «Yii‑ ‑gblüdë dhɔɔbhaasü Fedhisö 'ö i ‑bha ‑kë ꞊kpaɔsü ‑sü ‑wɔn 'gü, 'yi ‑ya ‑sü 'ka yi 'flëë‑ 'gü "sɛgɔ ya‑ 'gü "tʋ̈ng ꞊gban 'gü bha, yi‑ 'wɔn ‑dɔ ꞊dhɛ pë "pɛpɛ 'yi‑ ꞊slɔɔ "sɛ ya‑ 'gü bha yi‑ ‑slɔɔ bhi ꞊në i 'saa‑ 'gü. 4 'Ö "dhʋ̈ 'yaa n "piʋ̈ ꞊dhɛ 'a i ‑ya i ko ‑ta pinngdhö, "kɛɛ kö i ‑bha "klʋsëdhɛ ‑wɔn 'gü 'i i "tʋ 'në 'dɛdɛ 'to yi ‑bha. 5 'Mɛ 'ö ya yi‑ dɔ ꞊dhɛ mɛ ‑nu zuëkaankwëëmɛ ‑mü. Yöö do bha mɛ suu yaa ‑mü, yö ꞊në ꞊ya 'gügblüdhe ‑da Zuifö ‑nu 'wo "sɛ "pɛpɛ ꞊gban 'gü ‑a ‑nu ꞊zinng 'gü. Mɛ kpö 'wo ‑kë Nazadhɛtö ‑mɛ ‑nu 'ka, ‑a ‑nu ‑bha mɛ ꞊dhɛng ‑zian bha‑ ‑gɔmɛ ꞊në bha. 6 ‑Ya "piʋ̈ kö 'ö yi ‑bha Atanna ‑dhɔkëgükɔ "slʋ̈ʋ̈slʋ̈ bha‑ see‑, 'pë 'ö ‑kë 'yö 'yi‑ kun bha 'yö bha. ['Yö yi‑ 'pö 'yi za dɔ‑ ‑bha ꞊dhɛ ‑kɔ 'ö yi ‑bha 'tɔng‑ ‑ya pö‑ 'ka ‑a 'dhö. 7 "Kɛɛ 'yö "sɛkɔɔnmɛ Dhisiasö ‑ya sü yi ‑gɔ faandhɛ ‑bha, 8 'yö‑ pö 'mɛ 'yi za ‑ya ‑bha bha yi‑ ‑dhɛ 'yi nu‑ 'ka i ‑kuu "dhiʋ̈.] ꞊Ya kë ꞊dhɛ 'mɛ bha 'bha‑ dhɛɛ" 'kpɔ, 'pë 'ö ‑kë 'yö 'yi za ‑ya ‑bha bha, bhii ꞊dede i ‑dho tɛanwɔn dɔ‑ 'gü. 9 'Yö Zuifö ‑nu 'bha ‑nu 'wo to 'wo wo ‑wʋ ‑da Tɛɛtudhusö ‑bha "piʋ̈ ‑kɔ do bha‑ 'gü kö ‑ya ‑zɔn ꞊dhɛ 'pë 'ö‑ pö bha 'yaa ꞊sua 'ka.

10 'Yö ‑gblüdë ‑ya pö Pɔdhö ‑dhɛ ‑yö dhiang zë. 'Yö Pɔdhö ‑ya pö: «A‑ ‑dɔ ꞊dhɛ bhi ꞊në 'i zagɔbhomɛ 'ka "sɛgɔ ya‑ 'gü 'ö‑ ‑kwɛ kpö 'dhö ya. ‑A ‑wɔn 'gü "sika 'yaa n 'gü n ‑dɩ ‑ta ‑za dɔ ‑sü 'gü i ‑kuu "dhiʋ̈. 11 Bhii ꞊dede ‑bhö ‑dhɛ ‑ga dhiang ‑nu 'a dho‑ zë i ‑dhɛ bha‑ 'gü ‑së 'ka, ‑a ‑gɛn ‑mü ꞊dhɛ 'a nu Zedhizadhɛmö ‑dhɛ ya‑ 'gü, yi ‑bha Atanna ‑dhɔkë ‑dhɛ 'gü ‑a ‑dhɛkpaɔyi 'yii ziö ‑kaɔng do ö ga ꞊plɛ ‑ta ꞊kö. 12 'Wii n yö kö a "dhinaa 'ma sië mɛ 'bha 'ka Atanna ‑dhɔkëgükɔ 'gü, "ɛɛn kö 'ma mɛ ‑nu ‑kɔ ‑ya 'kwëë‑ yi ‑bha ‑bhɔ "kwëë ‑kë 'gü ‑kɔ ‑nu 'gü, "ɛɛn 'zü 'pö‑ yaan‑ ‑bha ‑dhɛ "wɛɛ 'bha ‑zian 'gü. 13 A‑ 'wɔn ‑dɔ ꞊dhɛ 'mɛ 'wo ya za 'wo‑ dɔ sië n ‑bha ya‑ ‑gɛn kpɛnngdhö 'wo dho‑ bho i ‑dhɛ 'yaa‑ ‑nu ‑gɔ. 14 ‑A ‑kë "dhʋ̈ ‑sü bha‑ 'gü, 'pë 'ö ma ‑zë 'a‑ dɔ 'ö 'a dho‑ pö i ‑dhɛ ‑a ‑ga 'ö ya: Yö ‑mü ꞊dhɛ yi "bhɛma ‑nu ‑bha Atanna ꞊në 'a‑ ‑dhɔkë 'yö 'a‑ ‑bha yë ‑kë, 'yö 'a "ta sü zian ‑dee 'ö wo ‑zë 'wo‑ ‑dhɛ ꞊sua ‑zian bha‑ ‑ta. "Kɛɛ Atanna ‑bha 'tɔng‑ 'ö Moizö ‑ya ‑bɛn zë 'sëëdhɛ 'gü waa‑ Atanna ‑wʋdhiʋ̈loomɛ ‑nu ‑wʋ 'ö 'dhö, a 'dhang ‑bho ꞊gban "dhiʋ̈. 15 A n ‑zʋ ‑yö Atanna ‑dhɛ ꞊dhɛ ‑kɔ 'ö woo ‑dɩ 'pö 'wo wo ‑zʋ yö‑ 'ka ‑a 'dhö, ꞊dhɛ Atanna ‑dho 'mɛ 'ö‑ ‑nu këwɔn 'dhö ‑së waa‑ mɛ 'ö‑ ‑nu këwɔn 'yaa ‑së ‑a ‑nu ‑bö 'ö 'wo go ga 'gü. 16 Yö ꞊në‑ ‑wɔn 'gü 'yö 'a n ‑dɩ "gbɩɩ‑ ‑ta bho kö kë "dhʋ̈ 'ö Atanna ‑wʋ 'ö n 'gü bha 'ö dho za dɔ n ‑bha ‑a wëëdhö "ɛɛn mɛ "bhɩɩ‑ ‑nu ‑zian wëëdhö.

17 ꞊Dhɛ 'ö ‑kë ꞊dhɛ 'a go Zedhizadhɛmö ‑a ‑kwɛ ꞊ya kë 'gbɛ, 'yö 'a nu 'zü kö 'a 'wëëga 'bha ꞊gbaɔ Zuifö ‑nu 'bha ‑nu ‑gɔ ‑a ‑nu ‑takunpë 'ka kö 'a "saa‑ bho 'zü yi ‑bha Atanna bha‑ "dhiʋ̈. 18 ꞊Dhɛ 'a gun "saa‑ bha‑ bho sië yi ‑bha Atanna ‑dhɔkëgükɔ 'gü, 'yö 'wo nu 'wo ‑kpan n ‑bha mü, "kɛɛ kö 'ma bo ‑go "kian 'gü ‑sü ‑zë 'ka 'nu. Mɛ kpö 'bha 'yaa gun mü "ɛɛn ꞊bhluubhluudhe 'bha 'yaa gun mü. 19 Zuifö 'bha ‑nu 'wo go Azi ‑sɛ 'gü ꞊në 'wo gun mü, wo ꞊në‑ ‑dhɛ 'dhö‑ ‑bha 'nu ꞊dhɛ ‑wo za dɔ n ‑bha i ‑kuu "dhiʋ̈, "ni kö ‑a ‑nu ‑bha 'wɔn 'bha ‑zë ‑yö n ‑bha. 20 'Yii kë "dhʋ̈ 'mɛ 'wo nu ya 'wɔn yaa 'a‑ ‑kë 'ö‑ ‑wɔn 'gü ‑za ‑yö n zë zagɔbhomɛ ‑bha za ‑dɔ n ‑bha ‑yi 'ka bha ‑wa pö. 21 "Ni kö 'yii kë dhiang 'a n ‑wʋ "dhiʋ̈ ꞊wlü‑ ‑bha "gbɩɩ‑ 'ka ‑a ‑nu ꞊gban wëëdhö 'a‑ pö ꞊dhɛ a 'dhang ‑bho gamɛ ‑nu ‑bha ‑go ga 'gü ‑sü "dhiʋ̈ bha yö ‑zë 'ka, 'wɔn 'ö‑ ‑wɔn 'gü 'yö 'a dɔ sië ka ‑kuu "dhiʋ̈ ꞊dɛɛ bha 'yö bha.»

22 ꞊Dhɛ 'ö ‑kë ꞊dhɛ Fedhisö ‑yö 'wɔn 'ö ‑gban Klisi ‑wɔn ‑bha bha‑ ‑dɔ ‑së 'ka bha, 'yö 'kwa ma kun, 'yö yi "wɛɛ kpɔ 'mɛ 'wo gun 'mü bha‑ ‑nu ‑gɔ 'ö‑ pö‑ ‑nu ‑dhɛ: «꞊Ya kë ꞊dhɛ "sɛkɔɔnmɛ Dhisiasö ꞊ya nu kö 'a ‑wʋ do pö ka ‑dhɛ.» 23 'Yö‑ pö ö ‑bha "sɔdha ‑gɔmɛ ‑dhɛ ‑wo 'dho Pɔdhö 'ka ‑kaso 'gü "kɛɛ ‑wo ‑pʋtaasü nu‑ ‑dhɛ ‑kaso ‑kɔ 'gü kö ‑wo wo kwaa‑ 'pö ‑a "tɛabɔ ‑nu ‑zü kö pë "pɛpɛ 'ö‑ ‑mawɔn dho zun‑ ‑bha ‑wa nu‑ ‑dhɛ.

24 ꞊Dhɛ 'ö ‑dhɛkpaɔyi 'bha ꞊ya ziö, 'yö Fedhisö waa‑ ö ‑bha dhebhɔ 'ö ‑kë Zuifö dhebhɔ 'ka 'wo‑ ‑dhɛ Drusidhö bha 'wo nu. 'Yö Fedhisö ‑yö mɛ bɔ 'yö 'wo nu Pɔdhö 'ka 'yö ö "tʋ to 'wɔn 'ö ‑gban ‑zʋ ‑yö Yesu Klisi ‑dhɛ ‑sü 'ö Pɔdhö 'dhö‑ pö sië bha‑ ‑bha bha‑ ‑bha. 25 "Kɛɛ ꞊dhɛ 'ö Pɔdhö ‑yö zun 'wɔn 'ö ‑gban ‑kë kpengdhö ‑sü waa‑ mɛ ‑bha ‑kɔ ‑mɔɔ ö ‑dɩ ‑bha ‑sü waa‑ za 'ö Atanna dho‑ dɔ mɛ ‑bha dhia", mɛ "bhɩɩ‑ ‑nu këwɔn ‑nu ‑wɔn 'gü bha‑ ‑dhiang zë ‑sü ‑bha, 'yö "suʋ̈ 'dhö ‑da Fedhisö 'gü 'yö‑ pö: «‑Bhö 'dho ꞊kö, ꞊ya kë ꞊dhɛ 'ma "tʋ̈ng bha‑ ꞊slɔɔ a ‑dho i ‑dhɛ kö 'i‑ 'bha pö.» 26 ‑Ya ‑ga ꞊dhɛ Pɔdhö dho gbadhiʋ̈ kë 'nu ö ‑dhɛ 'wëë‑ 'ka 'yö ꞊ya kë ꞊sië 'yö‑ ‑dhɛ ‑nu wo, 'yö 'wo "gbɛɛta ‑nu zë.

27 'Wɔn bha ‑wo ‑to 'ka "dhʋ̈ 'ö ‑kwɛ ꞊plɛ ‑yö ‑da 'gü. ꞊Dhɛ 'ö ‑kwɛ ꞊plɛ bha ꞊ya ziö, 'yö Pɔɔsiusö Fɛtusö 'dhö ‑kë ‑gblüdë 'ka Fedhisö "gblʋʋ 'gü. Fedhisö ‑yö Pɔdhö ‑to ‑kaso 'gü kë "dhʋ̈ 'nu kö 'ö Zuifö ‑nu dhɔɔbhaa kë.