1 Te Jisas dali aga bidi dabe dali augwali te gebadu pelama, tama te sigi wę u badu pedai badu te Gerasa dabego tǫba sabolali. 2 Agai te geba taga soai madi, tama polo te wabo pabo dwai haubo elalubo bidi me deli te Jisas tiąba asali. Te bidi te gų page hauwa elalubo tǫde subigila biliduai bidi tama asali. 3 Aga te gų pagede pilala bilai. Tama te bidi me deligo aga dąų wabo te usu me isąwai. Te sengo me usu me ebeo. 4 Te hauwa sogo augwaligo te hankapgo me sengo nogo sągą duyu yali. Tiali goli agai te hankap me sen me togwa sąwani. Agai te moni bomo mu eyu, tama bidi mego aga tuainu ebo te usu me isąwai. 5 Te sesemane sogo giligade me hulide me aga te gų pagede me bulu dude bidada biliduai. Tama agai i dwai olama, tama aga tigi te aga digi masigigo tologobo sę iduai.

6 Te agai Jisas te digibulu bidibadi digi sulama, tama aga udada asama, tama aga pageba kidu sugunagasali. 7 Agai bomo elama mu i weyu, te po wai, “Jisas, nage ugwade bidibo Godigo ogwa mu, nago magi sę enade yainogo ebawe? Eno te Godigo nogide nagebolo hanalu obao, nago te dene enabolo me magio,” te po wai. 8 Magi baso meni, te Jisasgo agabolo wali, “Nage dwai haubo noma bidi, nago te bidide bidibo taga pao,” wali.

9 Tama Jisasgo agabolo hanalu wali, “Nago nogi dewe?” Tama agai te po wai, “Ena nogi Ami dao. Magi baso meni, da hani genuai hauwa dao.” 10 Tama agai Jisasbolo i bomo elama weyu, Jisasgo te dwai haubo noma bidi dabe te moni tǫde munu me sela sągio po widu geai. 11 Te genuai kibu hani sibi dabe augwali te dwasianu bulu du pąde nai tuduladu bidaludai. 12 Tama te dwai haubo noma bidi dabe augwaligo te bomonama i weyu, Jisasbolo te po wali, “Nago da te kibu dabe tomoba tagala palao,” te po wai. 13 Tama Jisasgo augwali teba pao olama usu da wai. Tama te dwai haubo noma bidi dabe augwaligo te bidi taga peyu, tama augwali te kibu dabe tomoba bula sigi pali. Tama te kibu hani dabe bomonama mu udada pelama, tama te dwai bulu sau pado me deliba samonani. Te tigidali kibu umabo mu te bidi sese hauwa 2,000 dao. Tama augwali te sigi ąįba tulaluama, tama augwali te wę tulama poma peyu isila silai dao.

14 Te kibu tononaluali bidi wi pelama, tama augwaligo po te hanuba me tede elalubo bulu dabeba sela pali. Tama te we bidi augwali te sę ebo suagasali. 15 Augwali te Jisas bidiboba sabolama, tama augwaligo suali, te dwai haubo noma bidi hauwa polobadu agade bidali bidi, te bidi Jisas dali bidibo augwaligo suali. Megi da, aga ugwa gudama, tama aga homu kolesaga peda pelama, tama aga bugagia dualaludali. Tama te we bidi augwaligo te sulama, tama augwali wi yai. 16 Tama te bidi dabe te Jisasgo yali sę suali bage, augwaligo te hanudu tamadi asali we bidibolo te bidide pedalali sę po pususu pali, polobadu te dwai haubo noma bidi agade bidai. Tama augwaligo te kibu dabede yali sę po me pusali. 17 Tama tibaso, te we bidigo bomonama weyu, te Jisas augwaligo bulude bidibo tagalama, te gasaba pao wai.

18 Tialima, Jisas te gebaba holobadi, tama polobadu te dwai haubo noma bidi sela sąwani bidi, agai te tiwai po Jisasba hanalu wali, “Ena nage dali paio,” wali. 19 Tiali goli Jisasgo hagela homu yali. Agai agabolo te po wali, “Nage naga beba me naga deli hani bidibo madiba pao. Tama nago te tigidali sę Genuai Bidigo nagede yali sę po pusugi peyu, tama agai nage homu dene eyu tau sali po me pusao,” Jisasgo te po wai. 20 Tama tibaso te bidi pelama, tama agai te sę yali po te hanu nogo si elalubo tǫ pedai badu te Jisasgo agade yali sę po tigidali pususu bilali. Tama tigidali we bidi augwali homu hauwa eyu noma sali.

21 Te Jisas te gebadu peyu, te sigi ąį ma nogeali. Aga te wę u badu pedai badu tugi pali, tama genuai we bidi hani augwali aselama agaba sisinagasali. Tama Jisas aga te sigi ąį sane pąde bidali. 22 Te Juda dabego bomai po odobo lotu be tonalubo tobolu bidi me deli asali, aga nogi te Jairus. Agai te Jisas sulama, tama aga sągą pąba basi gulama kidu sugunagasali. 23 Tama agai bomonama agabolo te tiwai po hanalu wali, “Te eno dwasianu wegi te pąde isabo homu yai. Nago agaba nogo muagaselama, tama aga usu ma igulama bidimainogo obao,” te bidi Jairusgo te po wai.

24 Tama Jisas aga dali hodobo pali. Tama genuai we bidi hani augwali aga wali pali, tama aga pabo madi te augwali mu pena sali. 25 Tama we me deli bididuali, tama aga tigide kaneme sesemane sogo idubadi, tama te kibu be nogo si olama sągągo si bidai. 26 Te hauwa dokta bidigo te hauwa sogo agaba dene madubo sę iduali, tama te wego aga mone tigidali te augwaliba mena silali. Tiali goli agai gasi te dwasianu usu me ebeo. Menio. 27 Te wego te Jisasgo ebo sę po odai. Tama aga aselama, tama aga te genuai we bidi hauwa bidalubo tomode bididuai. Aga te Jisas pabo wali nosali asidu, tama agai ugwa sabi badu diąna asiduai. 28 Agai te tiwai homu eyu te po wali, ‘Te eno nogo agai ugwa sabi badu naga diąbaso da, te ena usu ma yaibao,’ agai te homu yai. 29 Tama te deli sogo naga, te aga kaneme yali te togwa siyu tama wa sali, tama aga tigide te gasi pela silali homu yai.

30 Tama polo Jisasgo koneani, te meba bomo agade taga pabo koneani. Tama tibaso aga begelama, te we bidi dabebolo te po wali, “Dego eno ugwaba nogogo diąyaniwe?”

31 Tama aga wali pabo bidi dabego agabolo te po wali, “Nago suao, te genuai we bidi hani te nage pąde pena sali dao. Tama magi baso nago te po weyu, ‘Dego eno ugwaba nogogo diąbo’ po obawe?”

32 Tama dego te tialiwe nama, Jisasgo te we bidi tomode tonono bilali. 33 Tama te wego te sę agade pedelali koneama, tama aga wi eyu didibili dali yali. Tama tiyu aga asama, Jisas pąba kidu sugunagasama, tama te tigidali sę agade yali po te hanilama pusali. 34 Tama Jisasgo agabolo te po wai, “Eno wegi, te naga enade konealubo po dąų weyu, enaba homu tialubo kolesaga ebogo te nage usu ma ilali dao. Nage pao, tama naga homu nagame wiegi yai elaluao. Nago gasi silimainogo yai,” te po wai.

35 Jisasgo te po odubadi, tama te bomai po odobo lotu be tonalubo tobolu bidigo bede bidibo bidi dabe meba aselawali. Augwaligo te po wali, “Te nago wegi isalio. Magi baso nago te sę dene yabo po te po ola mabo tisa bidibolo obawe?”

36 Tiali goli Jisasgo augwaligo te wabo poba olo me musiąma, odola tagalali. Agai te bidi Jairusbolo te po wali, “Nage wi egio. Nago enade konealubo po naga dąų weyu naga homu enaba tialuama bidao,” te po wai. 37 Tama agai te we bidi dabe augwali habu selama, te augwali aga dali me pelamuo wali. Pita me Jems me Jon, te Jems aga ama, te augwali sela naga aga dali pali. 38 Augwali te tobolu bidi Jairus aga beba sabolama, tama Jisasgo suali, augwaligo te genuai po kulukulu wabo suali. Augwali te homu dene ebaso dwai gela mu oladuali. 39 Tama aga te be tomoba pelama, tama augwalibolo te po wali, “Magi baso dagego te genuai po kulukulu weyu, te gela weyu ebawe? Te wai te aga mu isibeo. Aga te godege naga piali dao,” agai te po wai.

40 Tiali goli augwaligo aga gisugu mani. Tama tibaso agai te be tomode bidali tigidali we bidi buluba gudula silali. Tama agai te wai aga aya de ida dali si naga selama, tama aga wali pabo bidi sela sobadi elama, tama augwali te isali wai munalubo madi te be habu tomoba pali. 41 Tama agai te wegi nogo tolalu, tama agabolo weyu, te po wali, “Talita kumi.” Te po begelama tama dena pogo te po page e tiwai dao, “Dwasianu wegi, eno nagebolo obao, nage hodaluao,” wali.

42 Tama polo te dwasianu wegi hodaluama tama soali. Agai kibu be 12 elaluai. Tama augwaligo te sę ebo sulama, tama midigi siyu noma mu salio. 43 Tama Jisasgo po bomonama augwalibolo weyu, te po wai, “Dagego te sę ebo suali po te bidi me delibolo munu me olamuo.” Tama agai augwalibolo weyu, te nai meba selama te dwasianu wegibolo maiąo po wai.