1 Te Genuai Bidigo Mobo Bidi Ensel te Gilgal bulu tagalama, te Bokim buluba pali. Tama agai te Israel dabebolo te po wali, “Eno dage te Isip tǫde odasa, te eno duga wąį dabebolo mawaibao wali bulu tagaligi soali. Tama eno te po wali, ‘Te eno dage dali dau wali po te eno togogobeo. 2 Tama tialima, dagego te tǫde bidalubo bidi dabe dali te po dau me waidali weyu, te eno habu selebao. Dagego te augwaligo alta dabe aluama dolao,’ eno te po wai. Tiali goli, dagego te eno dagebolo igio wali te sę munu me elamuo. Menio. Dagego te gasagi yai sę mu yalio! [Sai 34:12-13; Bom 7:2-5] 3 Tama tialima, eno dagebolo megi obao, te eno dage pabo madi te bidi dabe augwali eno polasa me sela sągobeo, te dage augwaligo tǫba painogo ebo sogo tama tiaibao. Te augwali dagego boi bidi dabe bidaluaibao. Tama augwaligo tibo godigo te dagego konealubo po usu selama, mu dolaibao.” Genuai Bidigo Mobo Bidi Enselgo te po wali.

4 Nosali Mobo Bidigo te po wai madi, te tigidali Israel we bidi dwai gela mu wali. 5 Tama te tiali bulu nogi augwaligo te Bokim poali. Tama augwaligo te bulude God Genuai Bidibolo ofa ilali.

6 Tialima, polobadu Josuago te Israel dabe augwalibolo te sabo tǫ sigi piąo po wali. Tama deli deli bidi dabe pelama, te augwa sa muani tǫ selama, tama tede bidali. 7 Te Josua bidibadi te sogo te Israel dabe augwaligo te Genuai Bidiba lotu po wali. Tama nosali te Josua isai madi me te augwaligo Genuai Bidiba lotu po me udali. Augwaligo tama tiwai sę me idubadi, te Genuai Bidigo ebo sę sulama, te Israel dabe tau sali bidi dabe me augwali isai. 8 Josua, te Nungo ogwa, te Genuai Bidigo sę bidi, te agai kibu be 110 bidama, te aga isali. 9 Tialima, augwaligo aga te bulu Timnat Sera tede pubulali. Te bulu te aga bidali madi te Efraimgo bulu te bulu dude, te Gas bulu du te not pedai badu. [Jos 19:49-50] 10 Te Josua aga deli hani me te augwali isila pali, tama gesi noma we bidi pedelai. Te gesi hani we bidigo te Genuai Bidi konesiąyu, tama agai te Israel dabede yali sę me te munu me konesiąyu gegeda pali.

11 Tialima, te Israel dabe augwaligo te tibo god dabe Balba lotu weyu, tama dwai sę Genuai Bidigo gedude ilali. 12 Augwaligo munu me te Genuai Bidiba lotu me wabe, te augwa wąįgo God dao. Te aga digi augwali sigi pelama, te Isip tǫ augwaligo taga soai dao. Megi da, te augwaligo te bulude bidalubo bidi dabego haniani tibo godiba lotu wali. Te Israel dabe augwaligo te tibo godiba kidu sugunama, lotu obaso, tama Genuai Bidigo te tiwai sębę sali. 13 Augwaligo munu me te Genuai Bidiba lotu po me wabeo. Augwaligo lotu te Bal, me te tibo god we dabe Astarte teba lotu wali. 14 Tama Genuai Bidigo sębę eyu, tama dwai homu mu elama, tama agai te hwįbo boi bidi dabe me, te nai wi sabo bidi me te aselama, te Israel dabe dali hwįagasomainu ilali, tama augwaligo doado bage dabe me wi sagasomainu yali. Tama Genuai Bidigo te bidalubo boi bidi dabego te augwali aiyaba elalumainu ilali. Tama te Israel dabe augwali bomo elama, dolalu hwįaiyu ebo usu me isiąwai dao. 15 Tigidali sogo augwali hwįgi pali, te augwali tulalumainu eyu, te Genuai Bidigo augwali munu me augwali dwasianu tau me sabe, te agai augwali dali po dau wali gilama tama tiali. Tama te Israel dabe augwali dwai mu bidali.

16 Megi da, Genuai Bidigo te Israel dabebolo te bomo yai tobolu bidi meba mani. Te tobolu bidi dabego te Israel dabe tau selama, tama te hwįbo boi bidi dabe, me te doado bage wi sagasobo bidi dabego nogode ma dobola sali. 17 Tiali goli, te we bidi augwaligo te tobolu bidi dabego po me odobe. Augwaligo te Genuai Bidi tudiba munama, tama augwaligo te tibo godiba lotu po me udai, te bidigo aga we tagalama, te penani ebo weba pabo tiwai yali. Te augwa wąį dabe augwaligo te Godigo po wali pai, tiali goli te hani wai dabe polo hasegelama, tama augwaligo te tiwai kolesaga me ebeo. 18 Tigidali sogo Genuai Bidigo te Israel dabego tobolu bidi me deli sa muani, te agai tonalua pidubadi, te aga isiboba usu niyu yali. Tama te tobolu bidi dabego te Israel dabe tau siyu, te boi bidi dabe aiyaba elaluali. Genuai Bidigo te augwali homu dene eyu, tau sali, magi baso meni, augwali te augwa yali sęde dene me sęgę te boi bidigo nogode siyu, gela weyu yali. 19 Tiali goli, te tobolu bidi isibode, te we bidi augwaligo te augwa poloba yali kolesagaba ma begasa peyu yali. Tama augwaligo dwai kolesagago te augwa wąį polasa pali bidi dabego yali kolesaga te aiyaba elaluali. Augwaligo te gasa tibo god wali peyu, tama teba lotu wali. Augwaligo te bomo mu eyu, te augwa ebo dwai kolesaga wali mu pali. Augwa dwai sę tagalabo homu ebeo, tede hagela homu naga yali. 20 Tama tibaso, Genuai Bidigo te dwai sębę mu te Israel dabe dali eyu, tama wado yali, tama agai te po wali, “Te we bidi augwaligo te augwa wąį dabebolo wali pao wali te dau wali po bolali. Te augwaligo eno po wali me pisąbaso, 21 tama eno te bidalubo boi bidi dabe pomainu me gudulugobeo, te Josua isai madi tiali. 22 Tama eno te boi bidigo te Israel dabe usu siyu, tama eno augwali suainogo te augwaligo eno po wali pabo te augwa wąį dabego yali kolesaga tiwai ebowe naga suainogo tiaibao,” wali. 23 Tama Genuai Bidigo te Kenan hani bidi dabe bidalumainu yai dao. Te agai augwali polo asesa me gudulubeo. Tama agai augwali te Josuago nogoba mu mabeo.