109
Te sęgę elalubo bidigo i walio
1 God, eno nago nogi ugwaba sabo da.
Iya, nago eno gedu haluasa po wabo
odoyu, tama wei ponao.
2 Magi baso meni, te dwai bidi dabego,
me te tibo po wabo bidi dabego
enaba boi bidi eyu,
tama gasa we bidibolo enade tibo po obao.
3 Augwaligo po dwai mu enade wali,
tiali goli augwaligo po te odolali walio.
Te po page menio.
4 Eno augwali wei elama,
tama eno gedu haluasa po weyu, augwali tau sali,
tiali goli augwaligo ena wei me ebeo.
5 Eno wiegi yai kolesaga augwaliba yali,
tiali goli, augwaligo dwai kolesaga
enaba wei ponani.
Eno augwali wei mu yali, tiali goli, augwaligo ena
wei homu meni yai.
6 Te bidi dwai me deli nigilama, te agai eno boi bidigo
po te po tųde dagalumainu emainao.
Te aga boi bidi me deligo digi aga po tų ela momainao.
7 Te po tų odobo bidigo te bidigo
dwai sę yali hanila palama,
tama aga te kalabusiba tagala palao.
Tama agai te bidigo gedu haluasa
po wali me te sęgę da homu yaibao.
8 Eno homugo te aga polo tama isimainu homu elama,
tama gasa bidigo te agai sę yali
pesage somainu yao po wai. [Tpi 1:20]
9 Tama eno homugo aga isimainu elama,
tama aga wai dabego aya meniama,
tama aga wego te bidi me te meni emainu yao.
10 Tama eno homugo te aga wai dabego be meniyu,
tama augwa dwai mu bidimainu yao, wali.
Augwaligo te augwa bidibo bede te tologa pali bede
megi bidibadi te ela gudulama, sela sąmainu yao.
11 Te boi bidigo te bidi mebade negeli elalubaso da,
eno homugo te bidi dabe aselama,
tama te bidi dabego te agai tǫ
dagala sagasomainu yao,
te tigidali doado bage agai te bidigo abelimainu
sę yali nai tigidali te somainu yao.
12 Eno homugo te bidi me deligo agaba
te olo tau sabo wiegi yai kolesaga
me egobe, homu yai.
Tama te me deligo te aga aya meni yai wai dabe
homu dene me egobe, homu ebao.
13 Eno homugo te agai wai dabe isimainu homu ebao,
tama te nosali pedalubo hani dabego
te bidigo nogide homu kone me isiąyu me egobeo.
14 Eno homugo Genuai Bidigo te dwai kolesaga
te aga hani wąį nǫų dabego yali sęba
homu kone palumainu ebao.
Tama agai te aga idago sęgę sela sąmainu
me egobe homu ebo dao.
15 Genuai Bidigo te augwa yali
dwai sęba me konealudubaso,
tama te we bidi dabego aga haniba
te homu kone isiąmainu yao.
Eno te homu ebao.
16 Te bidigo te gasa bidiba olo tau sabo
wiegi yai kolesaga yabo homu isiąwani.
Agai te magi doado bage meni yai bidi dabe,
me te doado bage sǫą pai bidi dabe,
me te bomo meni yai bidi dabeba boi bidi eyu,
tama te bidi dabe haliga sęgę ilama,
tama agai augwali ela muyu yai dao.
17 Polobadu agai te gasa bidi dolomainu
dwai po wainu yali,
teda megi da, aga digi te dolomainao.
Agai te gasa bidi dabeba
te wiegi yai sę yabo po te Godiba me hanalube,
teda agai me te wiegi yai mabo sę me selamuo.
18 Agai te gasa bidi dolabo po wabo
te sę dene tiwai me ebeo,
te bidigo ugwa name te tigide bebo
te sę dene me ebo menio.
Eno homugo te agai te i ola mabo po
te aga tigi tomoba pomainao, te wę tiwai yao,
tama aga dili tomoba pabo
te wel tiwai gilama emainao.
19 Tama aga te pogo aga te ugwago
mesege sabo tiwai elama,
tama aga haliga te kukulu gudubo
tiwai elalumainao.
20 Eno homugo te Genuai Bidigo ena po tų ebo bidiba
te tiwai dene momainu yaibao,
magi baso meni, augwaligo te dwai po enaba walio.
21 Tiali goli, Genuai Bidi, eno God,
eno homugo nago ena tau somainu homu ebao,
te nago po dąų wali gilama yao.
Nage wiegi yai mu eyu, tama nago ena sesemane
wei homu elama,
tama tiyu, nago ena ma sao.
22 Ena dwai bidi mu bidiyu, tama ena odolali bidibao,
tama ena dwai dene mu ebao.
23 Ena te pabo tiwai eyu, te eno noma te giligade subo
tiwai elama, tama te giliga dega sigilubo sogo,
te pio ebode silaibao.
Ena te tǫde bidalubo nai tiwai te
waligo selasa pabo tiwai ebo dao.
24 Ena te nai habu selama,
tama eno kidu te bomo meni yai.
Ena te nomona selama, tama eno dili tigidali
te kimi mu isalio.
25 Te we bidi dabego ena sulama,
tama enaba posobo po wabo dao.
Tama augwa tobolu bebegelu, tama ena gisugu mobao.
[Mt 27:39; Mk 15:29]
26 Genuai Bidi, eno God,
nago ena sesemane wei mu ebao.
Nago ena tau selama, tama ena ma sao.
27 Te boi bidi dabego konemainu elama,
nago naga nago ena tau selama,
tama ena ma sabo dao.
28 Augwa te po weyu, te Godigo ena dolaibao po wali,
tiali goli nago enabolo wiegi yai sę yaibao.
Eno homugo te enaba dwai sę ebo bidi dabe aiyaba
elalumai homu yai, tama ena naga sę bidigo,
eno bugai haliga yaibao.
29 Eno homugo te eno boi bidi dabe
te genuai hale somainu yaibao,
tama augwali te hale dwai mu ebo
te we bidi dabego sumainu yao.
30 Tiali goli, eno genuai po dągą weyu,
te Genuai Bidiba puba hwi po waibao.
Te we bidi dabego lotu weyu sisinibo madi,
teda eno nago nogi ugwaba saibao.
31 Magi baso meni, agai te magi
nai meni yai bidi dabe tau selama, tonalu ebao,
te bidi dabego augwali po tų eyu,
tama te augwali isimaina obaso, te usu me egobeo.