37
Magi nai te wiegi yai bidide, me dwai bidide pedalubo po wai
1 Abagi, nago te dwai sę ebo bidi dabego te
wiegi yai nai dabe sabode
te nago homugo pesa me elamuo.
Nago te dwai kolesaga ebo bidi dabego
naide haliga dwai me elamuo.
2 Te dwasianu sogo naga tama,
te dwai sę ebo bidi dabe dolaibao,
te nosa wa pabo tiwai eyu,
me te ni yabe wa pabo tiwai yaibao.
3 Nago konealubo homu Godiba munama,
tama wiegi yai kolesaga yao.
Nago tama tiali da, tama nage te naga tǫde sesabi
elama bidaibao,
tama magi nai me deligo nage me dologobeo.
4 Nago Genuai Bidiba wiegi yai pemene yao,
tama agai te nago godolo homu ebo
nai dabe mawaibao.
5 Nago te naga bidibo ula te Genuai Bidi nogoba muao.
Te konealubo homu agaba dąų weyu,
te agai nage tau saibao.
6 Tama tiyu, te agai nago wiegi yai kolesaga
te hania pepeli diliba pedalumainu ilama,
te giliga ula pedalubo tiwai yaibao.
Tama agai te nago doloba pai kolesaga
te bidi dabego gedude te pepeli diliba haniliyu,
te nai tubode te giliga tomo yagasu
ula ebo tiwai yaibao.
7 Nage dua digi te Genuai Bidi pąba pelama, bidao.
Te dua digi bidiyu, te agai nage tau sabo tonaluao.
Te bidi dabego augwa ebo kolesagade
te wiegi yai nai dabe sabode te
nago homugo pesa me elamuo.
Mu tama, te haniani dwai kolesaga yabo
homu ebo bidi dabego ebo homude
nago homu kekeli eyu, tama te tiwai sę eyu,
pedelabo homu me elamuo.
8 Nago wado po me wasiąyu,
tama nago te haliga sębę ebo kolesaga me tagalao.
Nago homu te nai dabede kekeli elama,
homugo pesa me elamuo.
Te kolesagago nage kekelama,
te dwai kolesaga emainu yaibao.
9 Te dwai sę ebo bidi dabe mu dolaibao.
Tiali goli, te konealubo homu dąų olama
bidibo we bidi dabego
te Genuai Bidigo augwali tau somainu
tonaluali we bidi dabe da,
te augwali te augwa tǫde bugagia bidaibao.
10 Te pąde tama digi sogo,
te dwai sę ebo bidi dabe mu hagawaibao.
Te nago augwa pesagede te augwali gegebo sę yaibao,
tiali goli nago augwali me sugobeo.
11 Tiali goli, te augwa digi augwa
aiyaba elalubo we bidi dabe,
te augwali te tǫde bugagia bidaibao.
Te augwali wiegi yai mu bidiyu,
tama wiegi yai pemene elama, bidaibao. [Mt 5:5]
12 Te dwai sę ebo bidigo
te wiegi yai bidi dolabo homu eyu,
te wado po wabo dao.
13 Tiali goli, Genuai Bidigo te sogo me deli
te bodolu pedalubo koneyu, tama te sogo
te dwai sę ebo bidi dabe dolaibao.
Tama tiyu, Genuai Bidigo augwaliba gisugu mabo dao.
14 Te dwai sę ebo bidi dabego te bainat hwą dią siyu,
tama te enesigi kegelama,
te nai meni yai bidi dabe,
me te magi doado bage sǫą pabo
bidi dabe enainu yaibao.
Augwaligo te doloba pai kolesaga
wali pabo we bidi dabe ela muabo homu ebo dao.
15 Tiali goli, te augwa bainatgo
te Godigo augwali isilaibao,
tama Godigo te augwaligo enesigi togwa paibao.
16 Te doloba pai bidigo te dwasianu naigo
te tigidali dwai bidigo nai hauwa
te aiyaba elalueibao.
17 Magi baso meni, Genuai Bidigo
te dwai bidi dabego bomo silama,
tama agai te doloba pai bidi dabe tonalueibao.
18 Genuai Bidigo te aga po wali pabo
we bidi bugagia tonalueibao.
Tama te Godigo augwali mani doado bage,
te augwa sesemane sogo tolalueibao.
19 Te dwai sogode te sęgęgo augwali me gegegobeo.
Tama te nasi ebo sogo, te augwa nai hauwa elalu,
te augwali nai me sǫą pogobeo.
20 Tiali goli, te dwai sę ebo bidi dabe,
augwali da, mu dolaibao.
Te Genuai Bidigo boi bidi dabe augwali te hagawaibao,
te wiegi yai plauago, me nosaigo au tǫba tegaluama,
te hagabo tiwai gilama yaibao.
Mu tama, te augwali te sia hano
te dwasianu sogo naga elaluama,
tama te hano pela silibo tiwai gilama ebo dao.
21 Te dwai sę ebo bidigo te nai dabede negeli selama,
tama agai te negeli sali wei me ponogobeo.
Tiali goli, doloba pai bidigo te wiegi yai kolesaga eyu,
tama agai te gasa bidi dabeba te nai olo mabo dao.
22 Te Genuai Bidigo wiegi yai po
augwaliba wabo we bidi da,
te augwali te bugagia tǫde bidaibao.
Tiali goli, te Genuai Bidigo te dolomainao po wali
we bidi dabe da, teda agai augwali sela sąwaibao.
23 Genuai Bidigo te we bidi
bilibo dodolobo sę ebo dao.
Te agai bidi me deligo kolesaga
wei eyu, godolo ebaso da,
agai te aga dolasa bilimainu dąų walaibao.
24 Tama te bidi tulalubaso, tagalao,
aga te mu dologobeo.
Magi baso meni, Genuai Bidigo
te aga nogo tola selama,
tama aga ma dolugulumainu ebo dao.
25 Polobadu ena gesi ogwa bidi bidali,
tama megi da ena monu dabe yalio,
tiali goli te Godigo doloba pai bidi
me deli tudiba mubo te eno me subeo.
Tama te doloba pai bidi dabego
wai dabe te nai sǫą pabo te eno me susiąyu,
tama te gasa bidigo augwali
tau somainu i me wabeo. Mu menio.
26 Te sesemane sogo
te doloba pai kolesaga
ebo bidigo te olo mu tau sabo
wiegi yai kolesaga eyu,
tama te gasa we bidi dabeba nai
hauwa mayu ebo dao,
tama augwa wai dabego
te aya ida wiegi yai homu
pemene ilibo sę ebo dao.
27 Nago te tigidali dwai kolesaga tudiba munama,
tama wiegi yai kolesaga naga yao.
Te tiwai nago ebaso da,
teda nago nosali pedalubo hani bage
augwaligo te tǫde sesabi elama,
bugagia bidada paibao.
28 Magi baso meni, Godigo te doloba pai kolesaga ebo
we bidi wei eyu, godolo mu ebo dao.
Agai te aga we bidi hagamainu me egobeo.
Sesemane sogo Genuai Bidigo te
we bidi dabe dolasa bilimainu tonalueibao.
Tiali goli, te dwai bidi dabego
wai dabe da, te mu dolaibao.
29 Tiali goli, te doloba pai bidi dabe da,
te Godigo augwa mani tǫ saibao,
tama augwa tede sesemane sogo bidada paibao.
30 Doloba pai bidigo te wiegi yai
kolesaga koneani elalu,
tama wiegi yai po naga pusaibao.
Agai te doloba pai kolesagade po mibo dao.
31 Te Godigo bomai po aga homude elalu,
tama agai God wali peyu,
tama te bomai po me tagalogobeo.
32 Te dwai sę ebo bidi geme dualalu,
tama te doloba pai bidi tonalueibao,
tama aga ela muabo sunumi gegeyu tebo dao.
33 Tiali goli, Genuai Bidigo te doloba pai bidi
te dwai bidigo ela mumainu me tagalogobeo. Mu menio.
Tama te dwai sę ebo bidigo
te doloba pai bidi po tų ilibaso da,
teda Genuai Bidigo agai te doloba pai bidi
te po tųde aiyaba elalumainu me
sula tagalu me gogologobeo.
34 Nago konealubo homu Genuai Bidiba dąų olama,
tama agai po dolo wali peyu,
tama agai kolesaga wali pao.
Nago te tiwai eyu da, teda agai nageba
te genuai nogi mayu,
tama nago te agai nageba mani tǫ tolalu bidaibao.
Tama agai te dwai sę ebo bidi dabe
dolobo te nago sueibao.
35 Eno suali, te dwai sę ebo bidigo
genuai bomo elalubao, tama agai te we bidi dabe
aiyaba elalu, te Lebanonde elalubo
te moni ni sidago te gasa ni dabe aiyaba elalubo
tiwai gilama ebo dao.
36 Tiali goli, nosali ena te badu ma pali,
tama aga te munu ma elalubeo.
Eno aga gegebo sę yali,
tiali goli eno aga me subeo. Mu menio.
37 Nago te magi dwai sę me deli isąwai
bidide homu kone paliyu,
tama te doloba pai bidi suabo homu yao.
Te gasa we bidi dabe dali
dua digi bidibo bidi yaibaso da,
teda aga hani te sesemane sogo bidaibao.
38 Tiali goli, Genuai Bidigo
te dwai sę ebo bidi dabe te mu dolaibao.
Te augwa hani wąį nǫų dabe
augwali nosali te mu menia saibao.
39 Genuai Bidigo digi te doloba pai dabe ma sabo dao.
Te sęgę augwaliba pedalubo sogo,
augwali te udulama, agaba pobaso,
tama agai augwali tonalubo dao.
40 Augwaligo konealubo homu agaba dąų wai.
Tama tiyu, agai augwali tau siyu, tama agai augwali
te dwai bidi dabego nogode dobola selama,
tama augwa bugagia bidibo dao.