1 Nosali te Israel dabe augwaligo te bulu taga pelama, te Moap dabego buluba mu augwa bidabo pesage nigigi pali. Te bulu mu te wę Jordan te sia asobo badu te Jeriko hanu u badu elaluali. 2 Balak, te Siporgo ogwa, te Moap dabego tuni bidi dao. Agai te Israel dabego te Amor dabe dali yali wali po agai odali. 3 Tama aga dali aga hani bidi dabe augwaligo te Israel dabe suali, augwali hauwa mu yali. Tama augwali sese tama te Israel dabede wi mu yali. 4 Tialima, te Moap dabego te Midian dabe tobolu bidibolo e tama po wali, “Pęwadage sogo mu tama te hanigo dago bulude elalubo nai dabe sese mu silaibao, te kau kibugo nosai tubo tiwai yaibao,” te po wai. 5 Tama tialima, tuni bidi Balakgo te bidi Balambolo waligi pomainu bidi dabe tagala palali, te Beorgo ogwa, te aga te tuni bidi Balak suagasomainogo yai. Balam te hanu Petor te ąį Yufretis pąde bidali, te aga page bulu pąde. Balakgo te bidi dabebolo te Balambolo e tama po wao po wali, “Ena Balak dao. Eno homugo nago konemainogo ebao, te we bidi hani me te Isip buludu aselama, te tigidali buluba mu usu nigi palio. Tama megi da, augwali dago bulu pąde bidibao, tiyu augwaligo dago bulu sidalio. [2 Pi 2:15-16; Ju 11] 6 Augwali hauwa mu dao, tama dago augwali aiyaba elaluabo usu menio. Tama tialima, eno homugo nago te god dabe nogi olama, tama te god dabego augwali dolomainao. Tiali tama nago tama tiyu da, teda dago homugo dago augwali dali bomona hwįnama, tama augwali dago tǫde sela sąwaibao. Eno koneani, nago te god dabebolo te we bidi bugagia bida wali te godigo tama tibo dao. Tama ma, nago te we bidi dolao wali da, teda te god dabego augwali tama dolobo dao,” Balakgo te po Balamba ola tolali.

7 Tialima, te Moap de Midian tobolu bidi dabego te po te Balam pageba sela pali. Augwaligo te Israel dabe dolao omainogo abelabo mone dabe meba me sela pali. Tama augwali Balam pageba sabolama, tama Balakgo po agabolo pusali.

8 Tama Balamgo e tama po wali, “Dage megi hulide eno bede piao, tama dagebolo eno Genuai Bidigo wabo po dabe dagebolo do pusaibao,” te po wali. Tialima, te tobolu bidi dabego Balamgo po odama, aga dali bidali.

9 Tama hulide God aselama, Balambolo te po hanalu wagasali, “Te mena bidi dabe nage dali bidibowe? Augwali magi sę yainogo asaliwe?” wali.

10 Tama Balamgo Godibolo te po walali, “Balak te Moap tuni bidigo augwali eba taga palali, tama augwali enabolo te po pusainogo asali, 11 te we bidi hani me deli Isip bulu tagalama, tama Moap bulu tigidali usu nani wabo po pusainu asai dao. Tama agai homugo eno te god dabebolo olama, te god dabego augwali dolama, tama agai te bage dali bomo elama hwįnama, augwali sela sąwaio wali,” Balamgo te po wai.

12 Tiali goli, Godigo Balambolo te po wali, “Nage te bidi dabe dali me pelamu dao, tama nago te Israel dabe dolao po me wagi pelamu dao. Magi baso meni, ena augwali dali bidama, augwali eno bugagia tonaluai dao,” wali.

13 Tialima, kigamu te Balam te Balakgo tuni bidi dabe pageba pelama, te po wali, “Dage naga duga buluba ma piąo. Ena me pogobeo. Genuai Bidigo ena dage dali pigio homu yalio.”

14 Tialima, te bidi dabe augwali Balak pageba pelama, te po wagi pali, “Balam da dali asobo hagela yalio,” te po wai.

15 Tialima, nosali Balakgo te tobolu bidi dabe te hasia pali bidi dabe tobolu bidi nogi edelai bidi dabe hauwa mu i olama asali. 16 Tama agai augwalibolo agai po Balambolo pusigi pomainu yali. Balakgo po e dao, “Balam, nage ena pageba tama asao. Eno homugo nage magi nai mego nage dąų omainu igio homu ebao. 17 Nage aselama, tama nage eno nai dabe hauwa mu menama, tama nago homugo enabolo ya wabo nai dabe sese tama eno yaibao. Tama tiali, eno homugo nage aselama, tama te we bidi dolabo bomai po nago wagasao,” Balakgo te po ola tolali.

18 Tama augwali pelama, sabolama, te po Balamba pusali. Tiali goli, Balamgo te Balakgo sę bidi dabebolo te po wali, “Te Balakgo ena agai be te silva de gol sigo pągąnama, tigidali mobadi me tagalao. Eno Godigo po me sela sągobeo. Te eno Genuai Bidigo magi nai me dabede me sela sągobeo. 19 Tiali goli, dage eno bede hulide piao, te hasia asali bidi dabego yali gilama, tama eno suaibao, Genuai Bidigo enabolo po meba me magowe nama suaibao, ma meni yaliwe suaibao,” te po wai.

20 Tialima, te sogo hulide God Balam pageba aselama, te po agabolo wagasali, “Te bidi dabe aselama, nage augwali dali pinao olama, hanalu wagasali dao. Tiali megi da, nage augwali dali pagameo. Tiali goli, nago tigidali sę eno nagebolo wabo te sę naga yagameo. Nago gasa sę dabe me naga homugo me elamuo,” wali. 21 Tama tiali, kigamu Balam aga kibu donkide dualama, te Moap tuni bidi dabe dali pali.

22 Balam aga hogodasa pabode, Godigo aga dali sębę yali. Balam aga donkide dualama peyu, tama aga sę ebo bidi si aga dali peyu yali. Tama Genuai Bidigo ensel sunumide dolaluyu, sunumi palialuali. 23 Te enselgo bainat hwą tolaluyu, sunumide dolalubo suali, tama tibaso donkigo sunumi tagalama, bogo badu pali. Tama tibaso, Balamgo aga donki elama, sunumiba ma tagala palali. 24 Tama nosali te ensel ma pelama, te wain gi si elalubo sunumi tomoba doligi pali. Tama te pesagede da, te sunumi pena sai madi, te masigigo te obo yai madi te sunumi sesege si tama badu. 25 Donkigo ensel dolalubo suali, tama tibaso donki te oboba mu dagana sali madi te Balamgo sągą pena sali. Tama tibaso, Balamgo donki ma elali.

26 Tialima, te ensel polasa ma pelama, te sunumi dwasianu mu yai digi doligi pali. 27 Tama te donkigo te ensel subaso, agai koneani, agai te ensel edelegobe homu koneama, tama aga te sunumide pigiluali. Tama tibaso, Balam aga sębę elama, te donki kibu wabi dage selama elali. 28 Tama Genuai Bidigo donki kibu po omainu ilali, tama donkigo Balambolo te po wali, “Eno nage dali magi sę ebaso, nago ena sela sogo elaliwe?”

29 Tama Balamgo donkibolo te po wali, “Nago ena te polai bidi tiwai gagalalio. Tama tibaso, eno nage sela sogo elalio. Ma, eno bainat hwą tolalugi sogo da, eno nage ela mugi dao.”

30 Tama donkigo te po wali, “Ena naga donki mu dao, tama nage enade nage gesi bidide gagalama dualasa bilibadi, megiba tama te usu nagasobao. Eno te tobage sę nage dali hasia me yai dawe? Ma meniwe?” Tama Balamgo menio wali. 31 Tama Genuai Bidigo Balamgo te ensel bainat tolaluyu sunumide dolalubo sumainogo ilali. Tama polo tama Balam gesabidi aiyaba elama, tǫba degasa dulali.

32 Tama enselgo agabolo te po walali, “Magi baso nago naga donki sela sogo tama elaliwe? Odao. Eno nago sunumi paliainu asai dao. Magi baso meni, nage pabo eno wiegi yai homu ebeo. 33 Tiali goli, nago donkigo ena sulama, sela sogo te gasa badu pai dao. Ma, te donkigo tama tigi meni sogo da, eno nage ela munama, donki naga tagaligi dao,” te po wai.

34 Tialima, Balamgo Genuai Bidigo enselbolo te po wei ponani, “Eno dwai kolesaga yalio. Eno konebeo, nago ena elainu sunumide dolalubo eno subeo. Tama tialima, megi nago ena pabo godolo isąma ebaso da, teda ena ena buluba ma geasa paibao,” wali.

35 Tiali goli, enselgo agabolo te po walali, “Te usu dao, nage te bidi dabe dali pao. Tiali goli, eno nagebolo mabo po naga pusao. Nago gasa po me pusulamuo.” Tama te Balam te Balakgo tobolu bidi dabe dali pali.

36 Nosali Balakgo Balam asobo po odali. Tama tibaso, aga pelama, te Balam te hanu me wę Arnon pąde elalubo hanuba pali, te Moap bulu dąįba Balam tįąba pali. 37 Tama Balakgo Balambolo te po walali, “Odao. Hasia eno bidi dabe tagala palama, nage odasa polo asomainu yai goli dao, tiali goli nage magi baso asobo hagela yaliwe? Nago homugo nage eno mone dabe hauwa magobe homu yaliwe?”

38 Tama Balamgo te po wali, “Tagalao, eno megi asali dao. Tiali goli, eno God aga digi ena mabo po naga pusaibao, te tama deli naga. Eno gasa po me wabo bomo eno menio,” wali.

39 Tialima, Balam te Balak dali te hanu Husotba pali. 40 Tama Balakgo te kibu kau me sipsip elama, ofa eyu, tama mi dabe meba te Balam dali me aga dali te bidali te tobolu bidi dabebolo mani.

41 Te kigamu Balakgo Balam te hanu Bamotbalba obaba odasa pali. Tama Balam doligi pelama, Israel dabe bugwai meba ade bidalubo suali.