1 Te silama, tama nosali me sogo te genuai we bidi hani ma sisinani, tama augwali tuabo nai tula silama tama nai meni yai. Tama tibaso, Jisasgo aga wali pabo bidi dabe i olama asobo si, tama agai augwalibolo te po wali, 2 “Eno te e bidalubo we bidi augwalide homu dene ebao. Augwali ena dali sela sogo bidalio, tama megi augwali nai meni yai dao. 3 Tama augwali nai sili bidai elalubadi te eno augwali te augwa beba pomainu tagala palali da, teda augwali tomode pobadi te gedu te gęǫ page elama, te augwali sunumiba tulaluaibao. Meba augwali te digibulu asiyu asalio,” te po wai.

4 Tama aga wali pabo bidi dabego agabolo te po wei ponoyu, te po wai, “Te ede da, te bidi meni yai madi bidibao. Tama dago menade te bret tubo nai selama, te we bidi augwali mawaibawe?” Te po wai.

5 Jisasgo augwaliba hanalu wali, “Dagego nisu naga bret munalubowe?” Tama augwaligo te po wali, “Te a naga olama me badu si munalubo,” wai. 6 Tama agai te we bidi augwalibolo olama, tama augwali te tǫba duada pao wali. Tama agai te a naga olama me badu si bret selama, tama agai Godiba puba hwi olama, tama te nai pebedama, tama aga te wali pabo bidi dabebolo menama, te augwaligo dobaba pomainogo yali. Tama augwaligo te we bidiba dobaba palio. 7 Tama augwaligo te dwasianu sųgų si sela me elaluali. Tama agai te me selama, te Godiba puba hwi olama, tama aga wali pabo bidi dabebolo te me dobayao po wai, tama augwaligo te me dobaba pali. 8 Nosali te we bidi augwali te nai tula silama usu ebaso, tama aga wali pabo bidi augwaligo te elalubo nai meba dwasianu delage sisinama, tama te bonou wa basket te nogo a naga me si tede bulama pągąwani. 9 Te nai tuali we bidi augwali bidi sese hauwa umabo 4,000 bidi usu tama. Tama Jisasgo augwali pomainu tagala palalio. 10 Tama elama, polo aga te aga wali pabo bidi dabe dali te gebaba holama, tama augwali te Dalmanuta te badu pedaiba pai.

11 Te Farisi dabe meba augwali aselama, tama augwaligo te Jisas dali te wado po tiwai weyu konila po wai. Augwaligo te Jisasbolo bomai sę me deli yao po wali. Augwaligo aga te usu sabo sę senayu naga yai. 12 Jisasgo aga homu noma bidide sęgę ebo ąǫ ebaso, tama agai te po wai, “Magi baso te we bidi hanigo e sogode te bomai sę yao obawe? Eno mu po dagebolo obe dao, te e sogode te bidalubo bidi dabego suabo bomai sę me deli eno me egobeo. Mu menio!” wali. 13 Tama agai te Farisi bidi dabe augwali tede bidaludubadi taga peyu, tama aga te gebaba ma holama, tama te sigi ąį pedai u badu pabo gagalali.

14 Tama te Jisas wali pabo bidi dabe augwaligo te homu gegeda peyu, tama augwaligo te tubo nai bret meba dali sela asisąwai. Augwaligo te bret deli digi naga te gebade augwaligo munaluai. 15 Tama Jisasgo po bomo elama augwaliba weyu, te po wai, “Dage bugagia tonaluiąo! Dage te Farisi dabego yisde me te gavman tuni bidi Herotgo yisde te dage dua dao!” te po wai.

16 Tama augwa digi augwa hasi po mia siyu, te po wai, “Dago te bret meni baso, tama agai te po da dali obao,” te po wali. 17 Jisasgo koneama, tama agai augwalibolo te po wali, “Magi baso dagego te tiwai po duga hasi mibawe, ‘Dago te bret menio,’ te magi baso obawe? Te dagego homude kone palai elalubo meniwe? Te dage homu kolesaga meni yai elalubawe? Te dagego homu puna paliwe? 18 Dagego gedu elalubo, tama dagego te nai subo meni da, agawe? Dagego olo elalubao, tama dagego te po odobo meni da, agawe? Dagego homugo te bretde gegeda palai dawe? [Jer 5:21; Ese 12:2; Mk 4:12] 19 Eno te a naga bret te bidi sese hauwa umabo 5,000 bidi te nai pebedama mani sogo, dagego te nisu naga bonou wa basket te me badu munaluali bretgo pągąwai dawe?” Tama augwaligo te po wai, “Te nogo si olama sągągo si da,” wali. 20 “Tama eno te bidi sese hauwa umabo te 4,000 bidi te nai bret te bidi meni yai bulude pebedama mani sogo, dagego te nisu naga bonou wa basket te me badu munaluali naigo pągąnai dawe?” Tama augwaligo te po wai, “Te a naga olama me badu si dao,” te po wai. 21 Tama agai augwalibolo te po wai, “Tama dagego me konesiąma ebawe?”

22 Tama augwali te Betsaida hanu teba sabolali. Tama te we bidi augwaligo bidi me deli te agaba selasa asali, te aga gedu widai. Tama augwaligo Jisasbolo weyu, te bidiba nogo muao po walio. 23 Tialima, Jisasgo te gedu widai bidigo nogo tola selama, tama agai aga te buluba odasa soali. Tama agai te bidi geduba pesa sąnama, tama aga geduba te nogo ugwadu munama, tama agabolo hanalu wali, “Nago te nai me deli subowe, ma meniwe?” 24 Tama te bidigo tonono bilama, tama agai te po wai, “Awe, eno te bidi meba suali. Eno augwali te ni tiwai suali, tama augwali bilaluali,” te po wai. 25 Tama Jisasgo nogo aga geduba ma muai. Tama te bidigo bomo elama tonono bilali, tama agai gedu wiegi yai pedelama, tama aga tigidali nai hania sula silai. 26 Tama Jisasgo te bidi aga te aga beba tagala palu, tama te po wai, “Nage te bidi dabe bidibo be nani tomoba ma pigio, naga beba dolo pao,” te po wai.

27 Te Jisas aga te aga wali pabo bidi dabe dali hogodama, tama augwali te tǫ pedai Sisaria Filipai teba pali. Tama te sunumidu peladu te agai aga wali pabo bidi dabe augwaliba hanalu, te po wali, “Te we bidi dabe augwaligo ena de nogi ebo dawe?”

28 Tama augwaligo agabolo te po wai, “Te meba augwaligo nage te we bidi baptais mani bidi Jon nogi ebao. Tama mebago nage te polobadu bidali bidi Elaija nogi ebao. Tama mebago te po weyu, nage te Godigo po pusali polobadu bidali profet bidi me deli da po obao.” 29 Tama Jisasgo te augwalibolo hanalu wali, “Duga digi te ena de nogi ebo dawe?” Tama Pitago agabolo po wei ponoyu, te po wai, “Nage Krais dao, e we bidi tau somainu Godigo nage sa muyu asaiba wali bidi dao,” te po wai. 30 Tama agai augwali habu seleyu, te augwaligo bidi me delibolo olamu da po wai.

31 Te Jisas agai te aga wali pabo bidi dabe augwalibolo te tiwai po ola mabo gagalali, “Te Godigo Bidi Mu te aga dene hauwa tolomainu yaibao, tama te Juda dabego tobolu bidi dabe, me te genuai pris bidi dabe, me te Juda dabego bomai po page koneai bidi dabe augwaligo te aga tudiba munama, tama aga ela muaibao. Te nosali sela sogo bidama te aga ma hodaluaibao,” te po wai. 32 Agai te po augwalibolo hania haninama wai. Tama tibaso, Pitago Jisas te sesege badu odasa solama, tama aga dali te tobage po wagio po wali. 33 Tiali goli Jisasgo begelama, tama aga wali pabo bidi dabeba tononalu, tama agai Pitabolo wado iliyu, te po wai, “Satan, nage ena tudi badu soao! Nago te Godigo homu kolesaga wali me pabo menio. Te meni. Nago te tǫde bidigo ebo homu kolesaga naga te wali pobao,” te po wai.

34 Tama agai te we bidi agaba asomainu i weyu, te aga dali wali pabo bidi dabe me asomainu yai. Tama aselama, tama agai augwalibolo te po wai, “Te bidi me deligo ena wali asainogo da, te aga digi aga aiyaba elaluama, tama agai e homu yao, aga ena wali pobadi aga dene sobaso da, teda te usu da, te homu ebo bidigo agai aga ni pedai tolasa pabo tiwai eyu, aga ena wali asao. 35 Magi baso meni, te bidi me deligo aga digi aga bidabo ula bugagia tonalubo homu ebaso da, te aga bidabo ula te hagawaibao. Tiali goli te bidigo enade te Godigo wiegi yai gesi pode te homu kone palama, tama aga bidabo ula tagalu da, te aga bidabo ula mu saibao. 36 Te bidigo te tigidali tǫde doado bage siyu, te aga digi aga bidibo ula tagaluyu da, teda te bidigo genuai wiegi yai nai tama saliwe? Te meni. 37 Te bidigo mena mone mayu, te aga bidabo ula dobola siyu ma abelaibawe? Te menio. 38 Tama te megi e sogo tǫde bidibo we bidi dabe augwali da, te aga bidi taga soayu penani ebo we tiwai da, augwaligo Godigo po taga soali, tama haniani dwai sę ebo dao. Te bidi augwali bidalubo tomode bidiyu, tama agai enade me te eno ola mabo pode me hale eyu ebaso da, teda nosali ena te Godigo Bidi Mu, ena me te bidide hale eyu aga nogi geme dualaluaibao, te eno ena Ayago genuai bomo yai ula dali, te wiegi yai tedali ensel mobo bidi dabe dali e tǫba ma asobo sogo tama tiaibao,” Jisasgo te po wai.