1 Jisasgo te Moni Lotu Be tempel tagalama pobadi, tama aga wali pabo bidi dabe augwali aga pageba asai. Augwaligo te tempel bego haniani be dabe agabolo ola mawainu yai. 2 Tiali goli agai po augwalibolo wei ponoyu, te po wai, “Awe, dagego te haniani be dabe tigidali suao. Eno mu po dagebolo obao, augwaligo e gasa masigi daide ugwadu manama elalubo masigi dabe, te me gogolama me sula tagalogobeo. Te tigidali augwali pebedelama, te tǫba aiyaba sąsąwaibao.” Jisasgo te po wai.

3 Te aga pelama, tama te dwasianu bulu du Oliv teba sabolama, aga tede dualaluyu, tama aga wali bilibo bidi dabe naga augwali aga pageba aselama, augwaligo te po wai, “Nago dabolo wao, nisu sogo te Moni Lotu Be tempel dolobo sę pedelaibawe? Magi sę bolo hasia pedelama, dago koneai elalubadi, nage ma asiyu e tǫ siligowe?”

4 Te Jisasgo augwaligo po wei ponoyu, bomonama te po wai, “Bidigo dagebolo tibo po olama, tama dagego te mu po dao homu idali weyu, dage dua dao. 5 Magi baso meni. Bidi hauwa aselama, augwaligo eno nogi nogi ilama, tama augwaligo te po waibao, ‘Ena digi ena te Godigo sa muani bidi Krais dao.’ Tama augwaligo te we bidi hauwa ili po ola mawaibao, te augwali gasa tųba paibao. 6 Tama dagego te moni wąbi hwįbo kulukulu dali te wąbi hwįbo po sabilibo po odaibao. Dagego odama, dage midigi polo selama noma sigio. Te sę bolo pedelaibao, tiali goli te tǫ de dagalu si silabo sogo me elalubao. Te nosali mu pedelaibao. 7 Awe, tama genuai hwįyu, bidi hani me deligo te wąbi te gasa genuai bidi hani dali hwį yaibao. Tama me tuni bidigo bidi hani te gasa tuni bidigo bidi hani dali wąbi hwįyu hwį yaibao. Tama haniani bulu habu badu genuai nai nasi ela ela paibao, tama tǫ me mali ela ela paibao. 8 Te tigidali sę te wego wai ame nainogo hasia dene ebo te tiwai pedalaibao,” wali.

9 “Te tebo sogo augwaligo dage selama, dene ilama, sęgę mobadi yaibao, tama augwaligo dage ela muaibao. Tama tigidali we bidi hani augwaligo dwai homu mu dagebolo yaibao. Magi baso meni, eno nogi dagede elalubaso augwaligo dage dali tama tiaibao. 10 Tama tebo sogo te we bidi hauwa augwaligo enade konealubo po dąų wali tagalama, tama augwaligo augwa ama dabe boi bidigo nogoba munama, tama augwa me augwa digi augwa ama dabe dali boi bidi yaibao. 11 Tama te tibo po pusubo bidi profet dabe hauwa pedelama, tama we bidi hauwa tibo po ola mawaibao, augwali gasa tųdu kegasa pomainogo yaibao. 12 Tama te dwai kolesaga ebo hauwa mu pedeliyu, tama te bidi hauwago gasa we bidi dali dwagi yai homu eyu godolo ebo kolesaga kedauwa saibao. 13 Tiali goli, mena bidi aga te tǫ dagalu silibo side bomonama bidali bidi da, teda Godigo aga ma dobola saibao. 14 Tama augwaligo te Godigo we bidi tonalubo kolesaga po, te wiegi yai po te tigidali tǫ habu badu pusaibao, te po tigidali tǫde bidibo we bidi augwaligo odomainogo, tama nosali gana digi te tǫ,de dagalu si silabo sogo te pedelaibao,” Jisasgo te po wai.

15 Jisasgo te po me wai, “Te polobadu bidali bidi Daniel agai Godigo po pusuyu, te dolobo gasa dwai naide po pusali, polobadu. Tama dagego te dwai nai te magi dwai sę isąwai wiegi yai bulude bidibo sueibao. (Bidigo te po nedebaso da, agai homugo bugagia koneao.) [Dan 9:27; 11:31; 12:11] 16 Tama te sę pedelabo sogo te Judia tǫde bidibo we bidi augwali te bulu duba wi pao. 17 Tama te be daide ugwadu bidibo bidi te aga be aiya dulama, te doado bage me sigilugobeo, aga wi naga pao. 18 Tama te sogo gide bidibo bidi, te aga tudiba begelama, aga gudubo ugwa bede me sigi pelamuo, olo wi pao. 19 Te haliga yai we dabe me te sogode te we dabego wai ame mobadi te augwali hobede mu dao. 20 Dagego gedu haluasa po waiyąo, te dage te kedau ebo sogo ma te Sabat sogode wi pidali weyu tama tiao. 21 Te sogo da, te sęgę genuai mu elaluaibao. Te e tǫ gesi sogo elalubadi te megi e sogode te usu nagasu, te tiwai sęgę te polobadu munu me pedalobeo. Tama nosali me te tiwai sęgę munu me ma elalugobeo. Menio. 22 Tama Godigo te genuai sęgę elalubo sogo togogi menigi da, teda te tigidali we bidi mu doligi dao. Tiali goli God aga te sa muani we bidi augwalide homu konealua. Tama tiyu, augwali tobade agai te sogo togwaibao” wali.

23 “Te sogode, te bidi me deligo dagebolo e tobage po waibao, ‘Suao, te Godigo sa muani bidi Krais ede bidibao,’ ma ‘Ude bidibao’ obaso da, teda dagego homu te poba me dąų olamu dao. 24 Magi baso meni, te bidi meba aselama, tibo po e tiwai waibao, ‘Ena Krais, te sa muani bidi dao,’ ma ‘Ena te Godigo po pusubo profet bidi me deli dao,’ te tobage po waibao. Tama augwaligo bidi noma sabo bomai sę genuai eyu, tama haniani haniani sę yaibao. Augwaligo te we bidi God aga sa muani bage tibo po olama, te dwai sę ebo tomoba kegai hagede tebo dao. Tiali goli, te usu egobeo. 25 Odiąo, te sę pedelasiąbadi eno dagebolo te po hasia bolo wai dao. 26 Tama tibaso, augwaligo dagebolo te po waibao, ‘Suao, aga u badu te bidi meni yai madi bidibao,’ obaso da, te dage te badu me sugi pelamuo. Ma, augwaligo te po waibao, ‘Suao, aga te be tomode geme dualalubao,’ obaso da, te dagego te poba homu dąų me olamu dao. 27 Magi baso meni, te dagalude te be sele ula ebo sogo, te ula te sia ge pedalobo badu pedalama, tama te ula ebogo te sia ge dega saboba me pabo dao. Tama te Godigo Bidi Mu ma asobo sogo te tiwai naga pedelaibao, hania mu pedalaibao,” te po wai.

28 “Te isali hasa tigi elalubo madi, te pesageba te tigi mi tubo ba dabe augwali deliba sisinagasaibao,” Jisasgo te po wai.

29 “Te sogo te genuai sęgę yali te silai madi, tama polo te sia ge hulia selama, tama te polua ula me egobeo, tama te hǫ dabe dagalude tulaluaibao. Tama te dagalude bomai nai te tǫ mali tiwai elama, gęǫ page yaibao. [Ais 13:10; 34:4; Esk 32:7; Jol 2:10, 31; 3:15; Ped 6:12, 13] 30 Te tebo sogo te Godigo Bidi Mugo dąį te dagalude pedelaibao, tama te tǫde we bidi hani tigidali augwali augwa nogo pagasa moni gela waibao. Tama augwaligo te Godigo Bidi Mu te dagalu pǫ daide ugwadu dualasa asobo sueibao, tama aga genuai bomo me genuai ula dali dulaibao. 31 Tama aga mobo bidi ensel dabe tagala palama, augwaligo te bu wabo nai biugel bomonama mu bu ola asaibao, tama augwaligo aga te sa muani we bidi dabe sisinaibao. Te augwali te tǫ bogo me si me si yali badu te we bidi sesa asiyu, tama te dagalu sesege badu mu usu nigi paibao, te we bidi sigi paibao,” Jisasgo te po wai.

32 “Dagego te ni kayade koneiąo. Te agai nologode te wę elaluyu, te gesi yabe pedalabo sogo, dagego koneaibao, te sogo te dwagi yai giliga nanobo si pedalainogo ebao, te po wabo dao. 33 Te tiwai naga, nosali dagego te eno megi pusali sę tigidali pedalobode subo si, teda dagego koneagameo, te tǫ dagalu si silabo sogo te pąba yagaselama, te e tųde elalubao po waibao. 34 Eno mu po dagebolo obao, te megi e sogode te tǫde bidalubo we bidi augwali me isisąbadi, tama te sę tigidali pedalaibao. 35 Te dagalu de tǫ si da, te silaibao, tiali goli eno po da, te munu me sia sogobeo,” Jisasgo te po wai.

36 “Tiali goli mena bidi mego te asabo sogo te bodolu munu me konebeo. Te dagalude bidibo mobo bidi ensel dabe augwaligo me konebeo. Ogwago me konebeo. Aga Aya deligo naga te bodolu konealubo dao. 37 Te polobadu mu bidali bidi Noa aga tǫde bidali sogo augwaligo yali kolesaga, te kolesaga tiwai naga te Godigo Bidi Mu ma asobo sogode me augwaligo tama tiaibao. [Gag 6:5-8] 38 Te polobadu te genuai ąį asisąbadi, we bidi augwali te nai tuyu, te wę dabe tuyu, te we siyu ela bidalubadi yaide, tama Noa te moni geba tomoba pai dao. 39 Augwaligo homu kone me isąma, te augwali tama naga bidiba homu yali, tama polo te genuai ąį asiyu, te we bidi tigidali dagalasa pela silali. Te yali tiwai naga te Godigo Bidi Mu ma asobo sogo tiaibao, augwaligo te asabo sogo bodolu konesiąbadi.tama tiaibao [Gag 7:6-24] 40 Tama te bidi si gide sę ebadi, tama Godigo me deli naga siyu, tama gasa me da, tede bidibadi tagalaibao. 41 Tama te we sigo te keli gagawai nai plaua nigibadi, tama Godigo me deli naga saibao, tama me da, tede bidibadi tagalaibao. 42 Tama tibaso, dagego bugagia tonaluao. Duga Genuai Bidi ma asobo sogo, te dagego konegobeo. 43 Dagego homugo te sęde koneao, te be page bidigo hasia bolo te nisu sogo hulide te nai wi sabo bidi asobo te agai konegi sogo da, teda agai bugagia tonalugi baso, tama te nai wi sabo bidigo agai be aluama, te tomoba soabo si te me gogolama me sula tagaligi menigi da. 44 Tama tibaso, dage me sisi elaluao. Te Godigo Bidi Mu te me sogo dagego homugo konesiąbo sogo te aga asaibao,” Jisasgo te po wai.

45 “Mena sę bidigo wiegi yai homu elama, tama agai aga genuai bidide homu kęą pai bidi dawe? Te bidi aga genuai bidigo aga sa munama, te gasa sę ebo bidi augwali tonalumainogo, tama augwalibolo aga te nai mabo sogo te nai momainogo yai. 46 Tama aga genuai bidi gasaba pelama, tama nosali ma asobode, tama te sę bidigo polobadu agai wali po selama, te sę bugagia yai suali da, teda te sę bidi aga homu wiegi yai pemene yagameo. 47 Eno mu po dagebolo obao, teda agai te sę bidi aga te tigidali agai nai tonalubo bidi munama bidaibao. 48 Tiali goli, te sę bidi dwai bidi bidibaso da, teda aga homugo digi aga te homu elama, te eno genuai bidi te polo me asogobe da homu eyu, 49 tama agai aga dali deli sę ebo bidi dabe augwali elibo sę gagalaibao, tama agai te nai me te wę me te bomai ąį tubo bidi augwali dali te ąį tubo sę gagalaibao. 50 Tama te sę bidi aga genuai bidi ma asabo sogo sisi isąbadi, tama me sogo agai te bodolu konesiąbo sogo te aga genuai bidi ma asaibao. 51 Tama ma aselama, te genuai bidigo te sę bidi mu dolama, tama agai aga te tibo po wabo bidi dabe dali te dwai buluba munama bidaibao. Tede te augwali dwai gela weyu, tama augwa kele halua tuyu bidaibao,” Jisasgo te po wai.