1 Te me sogo Jisas te Moni Lotu Be tempel tomode bidu, agai te we bidi ola mayu, augwalibolo Godigo dwagi yai po pusalio. Tama agai te po pusabadi, te pris tuni bidi dabe me, te Godigo polobadu wali po page koneani bage me, augwali agaba asali. Te Juda dabe genuai bage me asali. 2 Tama aselama, augwaligo agabolo te po hanalu wali, “Nago mena bomogo naga te do yali sę yaliwe? Te sę dego nago nogode maniwe?” augwaligo te po hanalu wali. 3-4 Tama Jisasgo augwalibolo te po wai, “Ena me dagebolo po me deli hanalu waibao. Te bidi nogi Jon, agai te we bidi baptais mani. Dego te bidi Jon te sęba tagala palaliwe, te Godigo tagala palaliwe, ma dego te sęba tagala palaliwe? Dagego ena wei ponao,” wali. 5 Augwa hasi te po miyu, te po wai, “Te dago ‘Godigo Jon te sęba tagala palali’ po obaso, teda Jisasgo dabolo te po hanalu waibao, ‘Dage Jongo wali po magi baso gisiga odobewe?’ 6 Tiali goli, dago ‘Woo, Jon aga homugo te baptais mabo sę sali’ obaso, teda e we bidi tigidaligo masigi sąyu, da ela muaibao. Augwaligo homu te bidi Jon da Godigo tagala palali bidi mu dao,” augwa hasi augwaligo te po wai. 7 Tama tibaso, augwaligo Jisasbolo te po wai, “Dego te bidi Jon aga sęba tagala palaliwe, te dago konebeo,” wali. 8 Tama Jisasgo augwalibolo te po wai, “Eno hanalu wali po dagego wei ponosiąbaso, teda dagego enabolo hanalu wali po me eno wei ponogobeo. E sę eno nogode muani bidi nogi dagebolo eno wagobeo,” Jisasgo te po wali.

9 Te Jisasgo te Juda dabe tuni bidi dabebolo agai wabo po silama, tama agai te olo we bidi dabebolo te bono du gi po digi po pusali. Agai te po wai, “Bidi mego bono du gi bulali. Tama aga te bono du gi te sę ebo dabego nogoba osogo muani, augwaligo te gi tonalumainu, te augwaligo masigi sabo sę dao. Tama elama, aga te gasa digibulu buluba bidigi pali, tede hauwa sogo bidai hagede. 10 Tama nosali, te bono du dabe tau ebo sogode, te gi page bidigo aga sę ebo bidi deli i wali, tagala pomainu. Agai te bidibolo te po wali, ‘Nage pao, te eno bono du gi tonalubo bagebolo te po wao, “Te bono dude sai masigi me badu mao, ena te gi page bidibolo magi paibao.” Te po wao.’ Tama te sę ebo bidi pelama, te giba sabolama, te gi page bidigo wali po pusali. Tiali goli, te gi tonalubo bidi dabe augwaligo masigi mabe. Augwaligo aga wąbigo elama, buluba sela sąyu yali.”

11 “Te nosali te gi page bidi agai sę ebo bidi me deli tagala palali, te digibulu giba. Te bidi me te gi tonalubo bagego wąbigo elali. Augwaligo te bidi hale yabo po weyu, buluba sela sąyu yali, masigi mabe. 12 Tama nosali sela sogo weyu, aga sę ebo bidi tagala palali. Te bidi augwaligo elali, elali digi du yai. Tama te bidi me augwaligo buluba sela sąwai. 13 Te sę yali po odama, te gi page bidigo te homu yali, ‘Ena mena sę yaibawe? E, ena eno dwagi yai homu ebo ogwa mu te tagala palaibao. Te gi tonalubo bagego agai po sela sągobeo, bugagia odaibao,’ te homu yali. 14 Tiali goli, meni. Te ogwa te digibulu giba sabolama, tama te gi tonalubo bagego aga sulama, augwa hasi te po wali, ‘Aga aya isibo si, e bidigo te gi mu saibao. Tama tibaso, dago aga ela muinao. Nosali aga aya isibaso, teda dago te gi mu saibao,’ te po wali. 15 Tama olama, augwaligo te gi page bidigo ogwa bono du gi bulu badu sąwai, tede ela muani. Tama, dagego homu te gi page bidigo te bagebolo mena sę egowe? 16 Aga te giba asiyu, te gi tonalubo bage agai ela muyu, te gi te gasa bidi dabego nogoba muaibao, “Jisasgo te po wali. Tama agai wali po odali we bidigo te po wai, “Daba te sęgę maiabuo.” 17 Tiali goli, Jisasgo augwali gedu bomonama tonaluyu, te po wali, “Godigo wali po bukude e po wabo da,

18 Te po page da, te ena te masigi dao. Tama eno dagebolo obao, niwai bidi te masigiba tulolubaso, aga tigi dwasianu gagawaibao. Me ma, te masigi bidiba tulolubaso, aga tigi mia paibao,” Jisasgo te po wali.

19 Te Godigo polobadu wali po page koneani bidi dabe me, te pris tobolu bidi dabe me, augwaligo suali, Jisas agai po digi po augwalibolo bomo yai naga walio, augwali aiyaba elalumainu. Tama tibaso, augwaligo te homu yai, “Megi tama dago e bidi Jisas nogo si dųwaibao.” Tiali goli, tuni bidi augwaligo te we bidide wi baso, augwaligo aga nogo si dųbe.

20 Te genuai tuni bidi pris hani bage, me te bomai po page koneai bidi dabe augwaligo Jisas nogo si dųsiąbaso, augwaligo aga te moni gavman tobolu bidigo nogode muai hagede, te gavman bidi bomo hauwa mu elalubo bidi dao, we bidi tigidali tonalubo bidi dao. Te Jisas te bidigo nogode maiabo tų augwaligo gegali. Te sę eyu, augwaligo sa pabo bidi dabe Jisasba tagala palali. Tama Jisasba aselama, augwaligo agabolo tibo muma sabo abagi po weyu, agai wabo po odai hagede asobo bidi tiwai asali. Jisas agai pode geda mubaso, augwaligo aga nogo si dųwaibao. 21 Tama augwaligo agabolo tibo po weyu, te po wali, “Po ola mabo bidi, te nago naga ola mabo po dolo yai po mu naga wabo dao. Nago homude tigidali we bidi usu si dao. Nago homude bidi me ugwaba me dią holobo menio, bidi me aiyaba me elalugobe, tigidali we bidigo kolesaga te deli tama dao. Godigo bomo yai po nago te we bidibolo dolo mu ola mabo dao. 22 Te moni Rom gavman tobolu bidi Sisar, dago te bidibolo te takis moni mabo sę, te sę dwagi yai sę dawe, ma dwai sę dawe?” te po augwaligo hanalu wali.

23 Tiali goli, Jisasgo augwaligo tibo po nigibo sę ebo homu agai polo koneani. 24 Agai augwalibolo te po wai, “Te takis abelabo masigi enabolo waselao, eno sueio. Te masigide dego noma elalubowe? Mena bidigo po tede asęaniwe?” te po hanalu wali. Tama te sa pabo dabego te po wali, “Te gavman tobolu bidi Sisar agai noma te takis abelabo masigi daide elalubo, agai wali po tede asęani.” 25 Tama Jisasgo augwalibolo te po wali, “Ao. Tama tibaso, te takis mabo sęde, te bidi Sisarbolo agai nai dabe mao, tama te lotude me te Godibolo maiabo nai yai baso da, te God agai nai dabe da agabolo dolo mao,” wali. 26 Tama augwaligo agai pode tugobeo, te we bidi gesabidide. Te sa pabo bagego noma siyu, sagia sai.

27 Te Sadyusi bidi hani augwaligo homugo isai bidi ma hodalogobe. Sadyusi dabe me badu Jisas pageba asali. Tama augwaligo agade muma sabo homu eyu, te po wali, 28 “Po ola mabo bidi, te polobadu bidi Mosesgo e bomo yai po me deli dabolo asęani. Tibaso, gomunai bidi me deligo we selama, tama agai sali wego wai ame nisąwai, tama te bidi isibaso, teda aga amago te we ma sao. Te we selama, tama wai ame nobaso da, isai bidigo wai dao wao. Te sę yao, Mosesgo te bomo yai po asęani. Ao. [Bom 25:5] 29 Me sogo ama a naga me badu si augwali bidai. Gomunai bidigo we sai, agai wai meni, te aga olo isali. 30 Tama nosali aga ama tomo bidigo te we ma sali. 31 Nosali te bidi isilama, te tomo bidi tudi badu bidigo te we ma sali. Ama dede a naga me badu nogo si te we deli naga salio. Tiali, tigidaligo wai me ame nabe. Tilama, tigidali isalio. 32 Nosali te we me isalio. 33 Te a naga me badu nogo si bidi te bage augwaligo te we selama, bidama, isali. Tilama, te isai we bidi ma hodalobo sogode te we mena bidigo we dawe?” augwaligo te po wali.

34 Te Jisasgo te po wei ponani, “Dage we bidi e sogo megi we sabo dao. Megi tǫde bidigo we dali bidi si augwa si sabo dao. 35 Tigidali we bidi megi te tiwai ebo dao. Tiali goli, augwali we bidi Godigo po weyu, augwali hodaluama, te nosali sogode bidibo we bidi, augwali te sogode we sabo sę ma egobeo. 36 Augwali ma isigobeo. Augwali mobo bidi ensel tiwai bidaibao. Godigo augwali gų pagede hodolali. Tama tibaso, augwali Godigo wai bǫų bidibo,” Jisasgo te po wai.

37 “Te Mosesgo aga po asęani, te po wai, ‘Isai bidi gų pagede ma hodalobo dao.’ Agai mena sę elama, tama agai dabolo te po ola maniwe? Agai asęani po tomode te po elalubao, me sogo Mosesgo dwasianu ni pagede sia dilubo suali. Moses agai nǫų dabe polobadu isali goli, agai Godide te po asęani, ‘Genuai God te Abraham, Aisak, Jekop te bagego God dao’ wali. [Sai 3:6] 38 Tama Godigo ‘Ena da te bagego God dao’ obaso, te dago kone dao, te God da, te isai bidigo God menio. Bidibo bidigo God dao. Tama Godigo gedude, bidibo we bidi me, isai bidi dabe me, te bidibao,” Jisasgo te po wai.

39 Jisasgo te po te Sadyusi bagebolo olama, augwali aiyaba elaluama, gasa bidi hani dabe, te Juda dabego bomo yai po koneai bage, augwaligo Jisasbolo te po wai, “Po ola mabo bidi, nago augwalibolo wei ponani po usu dao,” wali. 40 Te Sadyusi dabe augwali agade wi baso, po me deli ma hanalu wabeo.

41 Te Jisasgo augwalibolo te po hanalu wali, “Dagego te po wabo dao, ‘Te nosali asabo bidi Krais da, te polobadu bidi nogi Devit aga ogwa da.’ Dagego te po magi baso wabo dawe? 42 Buku me nogi Sam, te lotu tęąbi po wabo buku tomode te bidi Devitgo te po asęani,

45 Te we bidi tigidali augwali tede bidibadi, Jisasgo wali po odali. 46 Tama Jisasgo aga po sabo bidibolo weyu, te po wai, “Dage dua dao, te bomo yai po koneai bidi dabede. Augwali godola pela bobobage ugwa gudama, bilama pabo dao, nogi yai bidi tiwai. Augwali godola pela te we bidigo bidi sisinibo pesagede augwalibolo siade dao omainogo, genuai bidi tiwai. Augwali mu godola pela lotu be tomode bidi gesabidide naga dualubo, genuai bidi tiwai. Augwali godola pela genuai nai tubo side augwali polalubo ni namide naga duawainogo ebo dao. 47 Augwaligo te wilawe we dabego doado bage gisigilibo dao. Tiali goli, augwaligo tibo gedu haluasa po bobobage wabo dao. Tama nosali Godigo tigidali we bidide po tų ebo si, te tobage bidi dabe, te bomo yai po koneai dabe, augwaligo moni sęgę mu saibao, te gasa we bidigo dwasianu sęgę saibao,” Jisasgo te po wai.