1 Te Israel dabe augwali te pąba bidagasai elalubaso, tama te Jeriko hanu tomode bidibo bidi dabego te hanu tomoba pabo sunumi tigidali bugagia dąų walali. Te bidi dabe buluba peyu, edaba asu yabo usu me ebeo. 2 Tiali goli, Genuai Bidigo Josuabolo te po wai, “Bugagia odao! Te eno nagebolo te Jeriko hanu badi, te aga tuni bidi me, te bomai ami bidi dabe me, te eno nago nogoba mawaibao. 3 Nago naga ami bidi dabe dali te deli sogo te deli bubugade te nogo a naga olama, me badu deli sogo te hanu bagula bilao. 4 Te nogo a naga me si wabo sogo te pris bidi te dąų wali po muani halobage tolali bage polasa pabo badu te augwali poligi pelama, tama augwaligo te bu wabo nai biugel tolomainu yao, augwaligo te omai kibu sipsip gąų pedelaligo nigai. Tama te nogo a naga me badu si wabo side, nage dali te ami bidi dabe badi tama te hanu bagula nogo a naga olama, me badu si te tama sogo biliyu yao,” wai. “Tama dage te hanu obo sesege badu bagula bilibo sogo, te pris dabego te bu wabo nai biugel te bu ola biliduao. 5 Te augwaligo te biugel bu wabo te bobobage mu kegasa pabo sogo da, teda dage tigidaligo te i olama, po daga genuai mu wao, tama te po obadi, te hanu bagulali moni masigigo nigali obo masigi te pepeda paibao. Tama tigidali bidi te hanu tomoba dolo pomainao,” wali.

6 Tialima, Josuago te pris dabe i olama, asobode tama augwalibolo te po wai, “Dagego te dąų wali po muani halobage tolao,” wai. “Tama te pris a naga me badu sigo te biugel tolama, tama te dąų wali po muani halobage tolali bidi dabe asobadi, te augwali poligi pao,” wai dao. 7 Nosali Josuago te we bidibolo te po wai, “Dage piąo! Dagego te hanu bagulali masigi obo bagula biliyu, tama te ami bidi dabe te Genuai Bidigo dąų wali po muani halobage tolali bidi dabe asobadi te polasa pao.” Te po wai.

8 Tialima, augwaligo te Josuago wali po tiwai gilama yai. Te pris bidi dabe a naga olama, me badu si te Genuai Bidigo te dąų wali po muani halobage tolali bidi dabe nosali asobadi, te augwali te Genuai Bidigo gedude polasa peyu, te biugel bu ola pai. 9 Tama ami bidi dabe meba te pris dabe pabo badu polasa peyu, tama meba te dąų wali po muani halobage tolali bidi dabe pabodu nosali pai. Tama augwali pali sogo, te a naga olama me badu si te pris dabego te nai biugel bu olalua pai. 10 Tiali goli, Josuago te we bidi augwalibolo te po wai, “Te dagego te i me te kilikili me deli munu me wasiąbadi, te eno po dagebolo waboba te usu nigi pao,” wali. 11 Te agai te pris dabe dali, te Genuai Bidigo bomai po dąų wali po muani halobage tolali bage dali tagala palama, te hanu deli sogo bagulama bilimainogo yai. Te augwali ma geasa aselama, te sogo hulide augwali bidali pesageba ma bidagasai.

12 Tama Josua te kigamu digi mu hodaluama, tama te pris dabego te dąų wali po muani halobage ma selama, tama tolasa palio. 13 Tama te a naga olama, me badu si te pris dabego te bu wabo nai biugel te a naga olama, me badu si selama, tama polasa peyu, te bu wabo nai biugel bu ola pai. Tama ami bidi dabe meba te pris pabo badu polasa peyu, te meba nosali asiyu yai. 14 Augwaligo te tiwai naga te si sogo elama, tama augwa bidali pesageba ma geasa asai. Augwaligo te tama tiwai sę te nogo a naga me deli sogo te tiwai sę yai dao.

15 Te 7 wabo sogode, te be posobaso, tama augwali hogodaluama, te augwaligo polobadu yali tiwai gilama, augwaligo te hanu bagula bilai. Tiali goli, te bubugade augwaligo te hanu bagula bilali te nogo a naga sogo olama, me badu si, te tama sogo bilai. 16 Te tama sogo bilali silama, teda te pris dabego te bu wabo nai biugel te bu wabo mu bobobage sesabia pabode tama Josuago te we bidi augwalibolo te po wai, “Te i bomo elama, waiąo! Genuai Bidigo te hanu dagebolo mawai dao! 17 Dago te hanude elalubo tigidali nai dabe dali dolinao, dago te ofa me deli te Genuai Bidibolo te tigidali mabo tiwai gilama yao. Te penani we Rahap naga, te aga aya ida, aga hani dali, augwali te me ela munamuo, magi baso meni, agai te hanu sa asela suagasomainu tagala palali bidi si geme dualai dao. 18 Tiali goli, dagego te hanude nai me deli sidali weyu habu sai. Te dagego sali da, teda te dolabo te moni dwai sę te dage Israel dabe bidibo pesagede mu pedelaibao.” Te po wai. 19 “Te tigidali nai augwaligo te silvago me gol me bras me ain, tego nigali nai dabe, te Genuai Bidigo nai dabe naga dao. Dagego te Genuai Bidigo mone mubo beba naga sela asao,” Josuago te po wai.

20 Tialima, te pris dabego te bu wabo nai biugel bu wai. Tama te we bidi augwaligo odobo sogo, deli sogo mu tigidaligo te genuai i wabo sogode tama te hanu bagulali obo dabe te gisigasa dulali. Tama tiai digi, nosali te we bidi tigidali te tomoba pelama, tama augwaligo te hanu sai dao. [Hi 11:30] 21 Augwaligo te tigidali we bidi me, te gesi we bidi me, te monu dabe, mosi dabe me, te bulmakau dabe me, sipsip, donki me, te nai dabe dali augwaligo te moni hwą bainatgo ela silai.

22 Tialima, hasia bolo Josuago te buluba sa asela suagasali bidi sibolo te po wai dao, “Dage si te penani wego be tomoba pelama, tama aga dali, te aga hani bage dali, augwali te selasa asama, te duga si dąų wali po tiwai gilama yao,” te po wai. 23 Tialima, te bidi si te be tomoba pelama, tama Rahap dali, te aga aya ida, me ama dede, me te tigidali hani wai puluba, me te augwa sę olo ebo bidi dabe, te augwali selasa aselama, tama augwali sigo te bage augwali te Israel dabe augwali bidibo pesage pąde tagalama, bidaluai.

24 Tama nosali te Israel dabe augwaligo sia nogolama, tama te hanu me te tomode elaluali nai tigidali te siago dai. Tiali goli, hasiabolo te Israel dabego te gol, me silva, me bras, me ain, tego nigali te nai dabe augwaligo selama, tama deli madi sisinama, te Genuai Bidigo mone mubo be tomoba muai dao. 25 Tiali goli, Josuago te Rahap me te aga hani bage tigidali bidalumainu sula tagalai, magi baso meni, agai te bidi si Josuago te Jeriko tǫba sa asobo bidi tagala palali sogo, agai te bidi si geme dualai. Tama te we Rahapgo wąį hani dabe te Israelde bidada asali, te megi e po asębo sogo me bidibo dao. [Hi 11:31]

26 Tialima, Josuago bomai po te we bidi augwalibolo weyu, te tiwai po wai, “Te bidi me deligo e hanu Jeriko ma nigibaso da, teda Genuai Bidigo te bidi dali dwai sę yaibao,” wai. “Tama gasa bidi mego te hanu genuai obo dabe ma nigibaso da, teda aga ogwa gomunai bidi te isaibao. Ma, te tomoba pabo genuai sunumi ma nigibo bidi, te bidigo sabi ogwa bidi te isaibao,” te po wai, Josuago. [1 Kin 16:34]

27 Genuai Bidi te Josua dali bidibaso, tama te tǫ dabe badu bidalubo tigidali bidi augwaligo agabolo genuai nogi mawai dao.