1 Te da Babilon tǫde kalabuside bidibadi te kibu be 11 wabode, tama te poluade deli wabo side, Genuai Bidigo enabolo te tiwai po pusalio, 2 “Tǫde bidio, eno te tamu ąį tomode elalubo tǫde elalubo taun Tair we bidide po elalubao, te tǫ te tamu ąį sesege pąde elalubao. Te Tair taunde bidibo we bidigo homu pemene eyu, e tiwai i hae obao, ‘Jerusalem dolobaso, te gasa tǫ kantri bidi dabe teba pelama, te mone sabo bisnis sę yali te ma igi pabo usu me egobeo. Megi da, te augwali aselama, da dali naga te nai dabe dobu si ebo bisnis sę yagasaibao, tama tiyu dago doado bage hauwa saibao,’ po wabo dao, te Tair we bidi.”

3 “Tama tibaso, megi God, ena Genuai Bidi, eno te po obao, ena dage Tair hanu bidi dabego boi bidi pedelaibao. Te eno bidi hani hauwa odasa aselama, dage dali boi hwįagasomainogo yaibao, te tamu ąį genuai pepeda pelama, dini gisigilibo tiwai yaibao. 4 Tama te augwaligo dagego taun bagulali bomai masigigo nigali obo dolama, tama augwaligo te obo bagulali bobobage be taua dabe tigidali pepedama, aiyaba tudulaibao. Tama eno dagego taunde elalubo tǫ dabe tigidali sela sąnama, tama masigi bulu naga olo tede elalueibao. 5 Tama te sųgų sabo sę ebo bidi dabe aselama, te ąį tomode elalubo masigi bulude sųgų sabo wa dinigina munama, te giligago te wa omainogo yaibao. Te ena God Genuai Bidigo po obao. Te gasa hani bidi dabego dage sagaselama, te dageba dwai sę mu yaibao. 6 Tama te boi bidi dabe aselama, te genuai bulu te taun dabe bidalubo we bidi dabe ela mueibao, te taun Tair elalubo pąde bulu dabede bidibo we bidi me ela mueibao, te nambisde bidibo bage. Tama dage Tair hani, dagego bugagia te tiwai page kone peyu, ena Genuai Bidigo digi eno te tama sę eba homu yaibao,” wali.

7 “Magi baso meni. Ena God Genuai Bidi, eno te tama po obao. Eno te bomai king me deli odasa asaibao, te king Nebukatnesar te tǫ pedai Babilon king dao, tama agai te gasa tǫ pedai kantri dabego king dabe tonalubo dao. Tama agai dage Tair dabe dali boi hwįaibao. Te aga not badu pedaide bidali tagalama, te genuai ami hani dabe dali aselayu, tama te boi hwįbo nai kibu hos dabe, me karis dabe dali asiyu, te kibu hos dabede dugulama boi hwįbo ami hani bidi dabe dali asaibao. 8 Tama augwali aselama, te nago nambisde elalubo taun bidi hani dabe dali hwįagaselama, te taun dabe dolaibao. Tama te tamu ąį tomode elalubo tǫba aselama, augwaligo te taun Tairgo obo bulu badu te tǫ du holama, te dagego taun tomoba hwįainogo tiwaibao. Tama augwa awa dabe te augwa seselalubo obo tiwai elalu, te augwaligo hwįaibao. 9 Tama augwaligo genuai masin selama, tama te taun bagulali obo pepedelama tulaibao. Tama te ain tigi dage selama, te bagulali obo aluama, pebedama mueibao. 10-11 Tama te ami bidi dabe te kibu hos dabede, me te kibu hosgo kekebo nai karis dabede dugulama, te taun bagulali obo sunumi dabedu tomoba paibao. Te augwaligo genuai kulukulu wabo sę eyu, te bagulali obo mumunu yaibao. Augwaligo te kibu hos dabe te taun sunumi dabe tigidalidu udabaso, te tǫ hogomu genuai pedelama, te taun tomode be dabe halueibao. Tama te ami bidi dabego te bainat hwą nogo tulama, te taunde we bidi tigidali ela mueibao. Tama augwaligo te taunde dila pai pos dabe tologolama, te tǫba sąwaibao. 12 Te boi bidi dabe augwaligo te dagego mone dabe me doado bage tigidali sobadi, tama dagego mone sabo bisnis sę ebo nai dabe tigidali saibao. Tama augwaligo te taun bagulali obo dabe aluama, te dagego wiegi wiegi yai be dabe mu dolaibao. Tama augwaligo te masigi dabe me, ni dabe me, tǫ dabe me, tigidali selama, te tamu ąįba sąwaibao. 13 Tama dagego te tęąbi po wabo me, te gita elebo sę ebo me, te ma egobeo. [Ped 18:22] 14 Te eno dagego bulu tǫde te masigi dabe naga elalumainu yaibao. Tama te sųgų gegebo sę ebo bidi dabego te sųgų hagane togobo wa te masigiba manama, te wa dabe giligago omainogo tiaibao. Tama bidi dabego te taun ma nigainu ebaso, usu egobeo. Magi baso meni. Ena God Genuai Bidi, eno te po wai dao,” wali.

15 “Ena God Genuai Bidi, eno te Tair dabeba te tama po obao. Te boi bidi dabego dagego taun dabe dolobo sogo, te gasa taun te tamu ąį pąde bidalubo we bidi dabego te ami bidi dabego te tama kulukulu wabo odaibao. Tama te ami bidi dabe augwaligo dage te taunde elama, tama te tigi selai bagego hwąwa wabo genuai mu pedelama, tama te gela u wabo te gasa taunde bidibo bage augwaligo odaibao. Tama te we bidi dabe augwali wi eyu, dwai noma mu saibao. 16 Tama te tigidali tǫ pedai kantri te tamu ąį pąde bidibo king bidi dabego dagede te pedalubo sę dabe sulama, wi dwai mu eyu, te augwa king sę eyu, te dugulalubo sia sai tagalama, aiyaba duagulu, tama augwa te king sę eyu gudubo sawi yai ugwa dabe pepeda sąnama, tama olo te tǫba duagulama, tama didibili eyu bidaibao. 17 Tama augwali te king dabego te dagego taun dolali sęde te e tiwai hobede ebo balia po waibao, ‘Hobede mu da, genuai nogi yai taun, nage dolalio. Te taun nago we bidi dabe te tamu ąįba asai, te polobadu augwaligo sip hauwa elalu, te augwali tamu ąįde sę yali polalubo hani dabe bidali. Tama te tamu ąį pąde bidalubo taun we bidi dabe, te augwali nago taun we bidide wi dwai mu yali. Tiali goli, megi da, nago sip dabe iba soyu, eda asiyu eyu, te bisnis sę iduali munu ma egobe dao. 18 Magi baso meni, te side naga nage dolalio, tama te tamu ąį tomo bulude bidalubo we bidi dabego sulama, tama augwali wi dwai umagi mu eyu, tama didibili ebao,’ augwaligo te balia po waibao,” wali. [Ped 18:9-10]

19 “Ena God Genuai Bidi, eno te tama po obao. Tair, te eno nage te olo bulu pesage nigilaibao, te bidi meni yai taun tiwai elalueibao. Tama eno nage te genuai tamu ąįgo mesegelama, te nage aiyadu dologode mu bidimainu yaibao. 20 Te sogo eno nage te isai bidi dabego bulu pesageba tagala palaibao, tama nage te polobadu bidi dabe dali bidaibao. Te eno nage te tǫ dologode te dolali taun dabe dali sesemane sogo bidimainogo yaibao. Tama nagede te bidi dabe bidimainogo me egobeo. Tama nage te tǫde wiegi yai taun ma pedelama bidainogo ebaso, te usu munu ma egobeo. 21 Te eno nage mu dola silama, tama gasa we bidi hanigo nage sulama, wi emainu yaibao. Te eno nage mu silimainogo ilama, tama te we bidi dabe augwaligo nage sueinu gegebo sogo da, te augwaligo nage me sugobeo. Ena God Genuai Bidi, eno te tama po wai dao,” wali. [Ped 18:21]