1 Godigo te tama po ma walio, “Tǫde bidio, nage pelama, te bainat hwą poa pai mu me deligo te nago penane nisi poayao, me tobolu nisi tigidali poayao. Tilama, nago te penane nisi me tobolu nisi te skelba muao, te dobolama, sela badu dagala muao,” walio. 2 “Eno nage te pila muao wali sogo tigidali silibaso da, teda nage hodolaluao. Te tama tebo sę ebogo te we bidi augwaliba te tiwai ola mawaibao, te boi bidi dabego te Jerusalem sagasali tiwai ebao. Nage hodalubo si da, teda nago te tobolu nisi me penane nisi hasia me badu te Jerusalem dąį ilali brik daide munama, nago te nisi dabe isi ulao. Te nago si wali pedai tobolu nisi selama, tama te brik baguasa bilama, nago te bainat hwągo te penane nisi me tobolu nisi togwa sąsą pao. Tama te sela wali tobolu me penane nisi selama, te sąsąyao, tama waligo sela paibao. Tama eno te bainat hwą selama, te sąwani tobolu me penane nisi pobeasa paibao. 3 Tiali goli, te nago dwasianu tobolu nisi me penane nisi elalumainao, te nago naga ugwa sabi badu munama, te kęnao. 4 Tialima, nago te kęnani nisi deli deli selama, te isiba sąnama, te siago domainao. Tama nosali te isi genuai deyu, te Israel tigidali daibao,” wali.

5 Te God Genuai Bidigo enabolo te tiwai po wali, “Nago te Jerusalem taun suao. Eno aga selama, te tigidali tǫ pedai kantri tomode mu munama elaluali, tama genuai nogi elaluali. 6 Tialima, te Jerusalem dabego eno po sela sąnama, te augwali dwai we bidi mu pedelalio. Te Jerusalem dabe augwaligo yali dwai kolesagago te gasa tǫ kantri we bidi augwaligo ebo dwai kolesaga te aiyaba mu elaluali. Te Jerusalem augwaligo eno po me eno bomai po dabe te tudiba mu muanio. 7 Tibaso, eno augwaliba te tama tiwai po wainogo ebao, ‘Dage Jerusalem dabego odao. Ena God Genuai Bidi, eno dagede po elalubao. Dagego eno po odisąma, te dagego eno bomai po dabe sela sąnama, te dage pąde bidibo tǫ kantri pedaigo ebo dwai kolesaga wali pai dao. Tialima, te dagego hagoma kolesaga hauwa elama, tama dagego dwai kolesagago te dage pąde bidibo tǫ kantri dabego dwai kolesaga aiyaba elaluai dao. 8 Tama tialima, ena God Genuai Bidi, eno te tiwai po dageba obao, eno dageba wiegi yai homu pemene me ebeo. Menio. Eno dageba boi bidi ebao. Tama dage eno te tigidali tǫde we bidi gedude po tų ilaibao. 9 Dagego eno godolo isąbo kolesaga hauwa yalio, te tama tibaso, te eno dageba polobadu isąwani kolesagago te eno dageba dwai dene mu mawaibao. Te tudi badu nosali, eno te tobage dwai dene mabo sę ma egobeo. 10 Te eno dwai dene dageba mabo sogo da, te aya ida mebago te augwa digi wai dabe elama tueibao, me te wai dabe mebago te augwa aya ida ela tubadi yaibao. Te eno dwai dene mabo sęgę dageba ebaso, te dage hauwa isaibao. Te me badu bidibaso da, teda eno augwali te gasa bulu tǫ pedai tigidaliba tedela palaibao,’ eno te tiwai po waingo ebao,” Genuai Bidigo te po wali. [Gel 4:10]

11 Tama po ma weyu, agai te po wai, “Eno augwalibolo te po obao, ‘Ena God Genuai Bidi, ena sesemane sogo bidada paibao, eno po dolo dagebolo obao, te eno dage mu dolaibao. Magi baso meni, dagego te tibo god dabego dwai piksa noma dabe elaluyu, dwai kugumini ebo kolesaga hauwa elama, tama tebo kolesagago te eno gedude dagego eno be meda mu ilai dao. Tama tiyu, te eno dage olo tau sabo wiegi yai kolesaga eyu, te hobede me egobeo. Te eno dageba dwai sęgę mabo sę eyu, te bidigo tobolu nisi tigidali togolama poala sąwani tiwai yaibao. 12 Te eno dage hani sela dobawaibao. Te polalubo hanide te nai sili mu bidu, te gasi genuai saibao, tama augwali te taun tomode isaibao. Tama te si wali hani, te boi bidi dabego te taun bulu badu te bainat hwągo ela wialaibao. Te sela wali hani we bidi, te augwali eno te tigidali bulu tǫ pedaiba ela gudulama, tedela palaibao. Te eno boi bidi dabe tagala palama, te pobeasa pelama, te augwali ela mueibao. 13 Te tama tebo kolesagade te eno sębę genuai eyu, te haliga sębę yali kolesaga silaibao. Te tigidali sę pedalubo sogo da, teda dagego eno te wali po homude kone palagasu, te dagego koneaibao, ena Genuai Bidi, te tibo god me deligo ena hasegelemainogo me ebo menio. 14 Dage dolobo si da, teda te dage pąde elalubo tǫ kantri pedai we bidi augwaligo dage te tama tebo sę sulama, te augwaligo te tama po waibao, “Suao. Augwali dwagila mu dolalio. Genuai Bidigo te augwaligo dwai kolesaga ebo sulama, te agai augwali dolali dao,” augwaligo te po waibao.’ Eno te po obao,” Genuai Bidigo te po walio.

15 “Ena Genuai Bidi, eno te po obao. Eno dageba dwai haliga sębę mu elama, te eno dageba dwai sęgę umagia mu yaibao. Tama dage pąde bidalubo tigidali we bidigo te dage te tama tebo sulama, te augwali homu hauwa elama, te wi dwai mu yaibao. Te augwaligo dage begela dolobo posobo po obaso, te dage hale yaibao. 16 Te we bidi augwali eno te nai sǫą palobo sę mu elama, te dage nai nasi mu yaibao. Tama dage te sęgę sabo dene ebo te enesigigo te ene dageba enama, te dage dolobo tiwai yaibao. 17 Tama me, eno te bulu uni hasa dageba tagala palama, te augwaligo dagego wai dabe ela mueibao. Te eno dageba gasi dwai pedelabo sę ilaibao. Te eno dageba boi bidi tagala palama, hwįagaselama, te dage ela mueibao. Ena Genuai Bidi, eno te po wai dao,” wali. [Ped 6:8]