1 Te Ahas aga king pedelali sogo aga kibu be 20 elaluali, tama aga Jerusalemde king bidibadi 16 kibu be yali. Tiali goli agai Genuai Bidigo gedude wiegi yai kolesaga me ebeo, te aga wąį Devitgo yali tiwai ebeo. Menio. 2 Agai dwai kolesaga naga iduali, te Israel dabego king dabego ebo kolesaga tiwai yali. Agai te sę bidi dabebolo olama, tama augwaligo bras dabe selama, augwaligo tibo godigo piksa Bal noma dabe nigali. 3 Tama aga te Hinom Dabego Odogo Malu buluba pelama, agai wiegi yai denami hano holobo pauda te buluba ofa igi pelama uligi peyu yali. Tama me agai dwai kolesaga mu iyu yali. Agai aga ogwa wai dabe elama, tama aga tibo godiba te isigo mu dela silibo ofa uligi peyu yali. Agai te tǫde polobadu bidali dwai we bidigo dwai kolesaga wali pali. Tiali goli Genuai Bidigo augwali sela sąnama, tama Genuai Bidigo te tǫ te Israel dabebolo mawai dao, polobadu. 4 Tama Ahas aga te tibo godiba lotu wabo pesageba peyu yali. Te pesage dabe te bulu dude dabe elaluyu, me te genuai ni dologode dabe elaluali. Tama agai ofa dabe iyu me wiegi yai denami hano holobo pauda uliyu yali.

5-6 Te king Ahasgo dwai kolesaga hauwa mu yali, tama Juda we bidigo me augwa wąįgo God te Genuai Bidiba augwa tudi ola mani. Tama tibaso, Godigo Siria king aga ami dali augwaligo Ahasa aga ami dali hwįagaselama tama aga aiyaba elalumainu ilali. Tama Siria dabego Juda dabe hauwa mu oda selama, Damaskusba kalabus igi pali. Tama nosali Genuai Bidigo Israel dabego king tagala palali, te Peka dao, te Remaliago ogwa, te bidi aga ami bidi dabe dali aselama hwįagaselama, Ahas dali aga ami dabe dali aiyaba elaluali. Tama deli sogo bubugade Juda hani ami bidi te 120,000 bidi elama isilali. [2 Kin 16:5; Ais 7:1] 7 Tama Sikri te Israel bomai ami bidi me deligo Juda dabego genuai bidi sela ela muani. Augwaligo nogi e dao, king Ahasgo ogwa Masea, me kingo be tonalubo bidi Asrikam, me te kingo namba tu bidi Elkana, tama bage ela muani. 8 Te Israel dabe augwaligo te Juda dabe hobede dwasianu me ebeo, te augwa ama solo digi dao. Menio. Tama augwaligo Juda hani we wai dabe te 200,000 kalabus ilali, tama augwaligo wiegi yai doado bage dabe hauwa sali, tama te nai dabe sese te taun Samariaba sela pali.

9 Tama te sogo Genuai Bidigo profet bidi me deli Samariade bididuai, agai nogi Odet dao. Tama Israel dabego ami bidi dabe ma asobode te Odetgo augwali tiąba pelama, te po wali, “Genuai Bidi, dago wąįgo God, agai te Juda dabe dali sębę elama augwali agai dagego nogoba mawai dao. Tiali goli dagego sębę mu elama, tama agai po bolama, dagego augwali ela mubo sę genuai mu yalio. Tama Genuai Bidigo dagego te dwai kolesaga yali polo sualio. 10 Tama me ma dagego Juda we bidi me Jerusalem we bidi dagego duga olo sę ebo we bidi gagalainu odasa asalio. Mena tama tialiwe? Dagego homugo dage Genuai Bidi duga Godigo gedude dage bugagia bidiba homu yaliwe? 11 Tialima dagego odiąo. Megi dagego te ama solo me abe solo dagego te kalabus yali, te bage augwali ma tagala palao, te augwali augwa buluba ma pomainao. Magi baso meni. Genuai Bidigo dage dali sębę genuai mu dage dali ebao, tama agai dagebolo dene mawaibao,” wali.

12 Tama me ma Israel dabego tobolu bidi me si me sigo te Israel dabe ami bidi dabego yali te sę godolo ebeo. Augwaligo nogi e dao, Asaria te Johanango ogwa dao, me te Berekia te Mesilemotgo ogwa dao, me Jehiskia te Salumgo ogwa dao, me te Amasa te Hatlaigo ogwa dao. 13 Te genuai bidi dabego te ami bidi dabebolo te po walali, “Dagego te hani kalabus bage eba odasa asigimio. Dago Genuai Bidigo gedude te Juda dabego yali dwai sę polo wei ponai dao, tama me tede dage te agai po edelai dao. Tama agai da dali sębę genuai mu yalio. Tama tialima dagego te e dwai kolesaga iyu da, teda dago dwai sęgę genuai mu yaibao, Genuai Bidigo gedude,” augwaligo te po wali. 14 Te ami bidi dabe augwaligo te po odama, te kalabus dabe me te Juda bulude sali doado bage sese tama tagalali. Te genuai bidi dabe pagede me te Israel we bidi dabe pagede tagalali, tama tilama augwa pali. 15 Tama tialima, te me si me si genuai bidi dabego te kalabus hani tonalubo sę yali. Augwaligo te ami bidi dabego boide sali te ugwa dabe meba selama, tama augwaligo te kalabus hani we bidi ugwa mu habuge yali we bidibolo mani. Tama augwaligo augwali sendel sągą su gudumainu mani. Tama me augwaligo augwali tuabo nai me ąį tuabo mayu yali. Tama me augwaligo augwali kenide marasin muyu yali. Tama augwaligo te we bidi pabo bomo meni yai we bidi selama, augwaligo donki kibude dualali. Tama augwaligo te kalabus dabe odasa pelama, augwa deli hani bidi dabeba ma tagaligi pali. Augwali taun Jerikoba saboligi pali, te taunde ni det hauwa elaluali, tama te Israel dabego augwali tagalama, augwa Samariaba ma geasa pali.

16-17 Te Israel dabego Juda dabe dali boi hwįnama augwali aiyaba elaluama pabo tudi badu, nosali te Idom dabe ma aselama, tama te Juda dabe dali boi hwįnama Juda dabe aiyaba ma elaluali. Tama augwaligo meba we bidi kalabus elama odasa pali. Tama tibaso, king Ahasgo bidi meba Asiria king bidi sugi pelama, aga tau sagasomainu hanalugi pali. 18 Tama me te Filistia bidi hani aselama, giliga dega sabo badu me saut badu elalubo dwasianu Juda bulu dude taun dabeba boi hwįagasali. Augwaligo Juda dabe aiyaba elaluama, taun Betsemes sobadi, me taun Aijalon sobadi, me taun Gederot sobadi yali. Tama me augwaligo taun Soko sobadi, me Timna, me Gimso, me te taun dabe pąde elalua pali dwasianu be nani dabe me sali. Te Filistia dabe augwaligo te taun dabe polo sali. Tialima augwaligo te taun dabe augwa taun dabe gagalali. 19 Te sęgę te king Ahas me Juda we bidiba te pedelali po page da e dao, Ahasgo dwai kolesaga hauwa mu yali, tama agai Genuai Bidiba tudi ola mani. Tialima Genuai Bidigo te genuai sęgę pedelama, te kantri Juda aiyaba elalumainu sula tagalali. 20 Tama nosali king Tiklat Pileser te Asiria king bidi te Juda buluba asali, tiali goli agai Ahas tau sabeo. Menio. Aga dali aga ami bidi dabe dali augwaligo Ahas dali dwai sę iduali. 21 Tama tibaso Ahasgo Tiklat Pileser homu nagamea sainogo agai Genuai Bidigo tempel be munaluai gol dabe siyu, me kingo bede munaluai me siyu, me tobolu bidi dabego bede munaluai nai dabe me siyu elama, tama te Tiklat Pileserbolo mani. Tiali goli, te tama tialigo Ahas tau sabeo.

22 Te king Ahasgo te sęgę hauwa mu sabo sogo agai Genuai Bidi munu me homu kone ebeo. Menio. Agai Genuai Bidi tudiba munama, me genina mu tudi ola manio, tama dwai dwai sę hauwa mu yali. 23 Agai te po wali, “Te Siria dabego god dabego Siria dabe tau sai dao. Tama tialima eno augwaliba ofa eyu da, augwaligo ena tau sogowe?” te po wali. Tama tialima Ahasgo te Siria dabego tibo god dabeba ofa ebo sę iduali, te aga boide aiyaba elaluali bidi hani. Agai te kolesaga dabe yali, tama te agaba me Israel we bidi tigidaliba te genuai sęgę pedelali page dao. 24 Tama me king Ahasgo Genuai Bidigo tempel be tomode munaluali dis dabe plet dabe subigila aluama tagalali, tama agai Genuai Bidigo be sunumi dabe papali pali. Tama agai alta dabe te tigidali Jerusalem bulude nidigi pali, te aga te tibo god dabeba lotu weyu yabo nigali. 25 Tama te alta te Juda bulu taun tigidalide geseliyu ela pali. Agai te lotu wabo pesage geselali, te we bidi pelama, te tibo godiba te wiegi yai denami hano holobo pauda ofa igi peyu emainogo yali. Tama Ahasgo te yali kolesagago Genuai Bidi augwa wąįgo Godigo sębę genuai mu aga dali emainu ilali.

26 Te king Ahasgo yali sę dabe meba po me agai kolesaga te aga king pedelalidu gagalama aga isaliba saboluyu tomode yali sę dabe po te buku augwaligo Juda Dabe Me Israel Dabe Sigo King Dabego Po Buku wabo, te bukude asęai dao. 27 Te Ahas isali sogo, augwaligo aga te Jerusalemde pubulali. Tiali goli augwaligo aga te king dabe gų pagede pubalobeo. Tama aga ogwa Hesekiago agai pesage selama, tama aga king pedelali. [Ais 44:28]