1 Te Manase aga king pedelali sogo agai kibu be te 12 kibu be elaluali, tama aga Jerusalemde king bidibadi kibu be 55 yali. 2 Manase agai wiegi yai kolesaga wali pabeo. Menio. Agai te tǫde polobadu bidali te we bidi hanigo dwai dwai haniani kolesaga wali pali, te Genuai Bidigo augwali sela sąnama tama te tǫ Israel dabebolo mawai dao. Manase agai te hanigo kolesaga wali pelama, agai Genuai Bidigo gedude dwai kolesaga mu yali. [Jer 15:4]

3 Manasego e tiwai dwai kolesaga yali. Agai te tibo godigo lotu wabo pesage ma geselali, te polobadu aga aya Hesekiago dolai. Tama me agai te tibo god Balba lotu wabo alta me geselali. Tama me agai god we Aserago piksa noma geselali. Me ma agai ogwa dagalude hǫ dabeba lotu wayu yali. 4 Tama agai tibo god dabego alta Genuai Bidigo tempel be digi tomode geselali. Tiali goli Genuai Bidigo te be po weyu agai e tama tiwai po polobadu wai dao, “Eno Jerusalem te eno tigidali sogo bidabo bulu sa mubao,” po wali, “tama te we bidi augwali te Jerusalemba aselama, ena deliba naga lotu wagasomainu,” wai dao. [2 Sml 7:13 ] 5 Tiali goli Manase agai te Genuai Bidigo tempel be obo tomode agai alta si te genuai sisinagasobo pesagede geselali, te aga hǫ dabeba lotu wabo nai geselali. 6 Tama aga te Hinomgo odogo malu buluba pelama, tama aga ogwa wai dabe elama, tama augwali te isigo dela silibo te ofa tiwai ulali silali, te aga tibo godiba ofa tama yali. Tama agai isai bidi noma dabeba aga tau somainu i wali, tama agai sogo yesi bidi dabe me pobi bidi dabebolo aga tau somainogo hanalu wali. Tama agai yesi bubo sę haniani hauwa mu yali. Manase agai Genuai Bidigo gedude agai sęgę hauwa mu tolama yali. Tama agai te dwai kolesaga dabego Genuai Bidi sębę geninama mu emainu ilali.

7 Te Manase aga digi nigai tibo god piksa selama, agai Godigo tempel be tomode muani. Tiali goli polobadu Godigo Devit de Solomon sibolo e tiwai po wai dao, “Te Jerusalemde elalubo te tempel be da, te ena digi Israel hani tomode ena digi sa muai dao, te augwali tigidali sogo enaba aselama, enaba deli naga lotu wagasiyu yabo pesage deli elalua pomainu. 8 Tama dage eno we bidigo eno po wali peyu, me eno tigidali po me bomai po sese, eno sę bidi Mosesgo pedauwalidu mani po sese wali peyu da, teda dage eno polobadu duga wąį dabebolo menama tama dage megi bidibo te tǫde sela sągobeo,” te po wali. Genuai Bidigo te po wai goli, tama Manasego te tibo god piksa noma te tempel be tomode muani. [1 Kin 9:3-5; 2 Sto 7:12-18] 9 Manase agai Juda dabe me Jerusalem dabe kegelama, tama augwaligo dwai kolesaga hauwa mu yali. Augwaligo te dwai kolesagago te tǫde polobadu bidali we bidigo dwai kolesaga edelama mu yali, te Godigo te tǫde sela sąyani we bidigo yali dwai kolesaga edelali.

10 Te Genuai Bidigo Manase me te we bidi augwaligo te dwai kolesaga eboba tudi ola mao po wali, tiali goli augwaligo po odama wali pabeo. 11 Tama tibaso Genuai Bidigo Asiria ofisa bidi dabe augwa ami bidi dabe dali tagala palama, tama augwaligo Juda dabe dali hwįnama, tama augwali aiyaba elaluali. Tama te Asiria dabego Manase pagabi elama, tama aga gunide huku munama, tama augwaligo aga sen gebelama, tama aga augwa page bulu Babilon buluba odasa pali. 12 Tialima aga sęgę genuai mu tolaluali, tama tibaso aga digi Genuai Bidi aga wąį dabego Godigo gedude aga digi aga aiyaba elaluali. Tama aga God pageba ma asali. 13 Tama Godibolo aga tau somainogo hanalu wali, tama Godigo Manasego gedu haluasa po wabo odama, aga tau selama, tama aga Jerusalemba ma pelama, tama aga te kantri ma tonalumainu sula tagalali. Tama megi da Manasego koneani, Genuai Bidi deli naga te God mu dao homu yali.

14 Tama te nosali badu, Manase agai augwaligo Devitgo Taun wabo tede obo gesi me ma yali. Te obo te ugwanu mu dao. Te obo te giliga dega sabo badu odogo malu bulu badu gagalama, pelama, u badu not badu augwaligo Sųgųgo Sunumi wabo, te sunumiba usu nigi pali. Augwaligo taun Ofel wabo te taun bagua selama yali. Tama me Manasego te bomai obo elalubo taun dabe tigidali tonalua pomainogo agai ami ofisa bidi dabe sa muyu ela pali, te Juda distrikde. 15 Tama agai meba hanigo tibo god dabe sela sąyu, me aga digi Genuai Bidigo tempel be tomode muani te tibo god piksa dabe sela sąyani. Tama elalubo bulu dude te alta dabe sela sąyani. Tama meba te alta dabe te Jerusalemde elaluali dabe sese tama sela sąyani, tama agai te nai dabe taun buluba selasa pelama, tama sągi pali. 16 Nosali agai Genuai Bidigo alta ma dodolali. Tama agai God dali homu deli ebo ofa yabo hasa dabe me Godibolo buba hwi wabo ofa yabo kibu sesiyu yali, te altade ofa yabo sesali. Tama agai Juda dabebolo e tiwai po walali, “Dagego da Israel dabego God dena Genuai Bidiba naga lotu po waiąo,” wali. 17 Tialima te we bidi augwaligo king Manasego po wali pelama, augwaligo te tibo god dabeba me lotu po me wabeo. Mu tama, augwali sese tama Genuai Bidigo tempel beba Jerusalemba asobeo. Augwali te lotu wabo pesage dabeba pabo sę dabe tama iduali, tiali goli augwaligo Genuai Bidi augwa God deliba naga ofa ebo sę iduali.

18 Te king Manasego yali sę po dabe meba te buku me augwaligo Israel Dabego King Dabego Po Buku wabo, te bukude te elalubao. Te bukude te agai Godiba gedu haluasa po wali po me pusuyu, me Godigo nogide profet bagego agabolo pusali po me pusali, te Israel dabego God augwa Genuai Bidigo wali po pusali. 19 Tama king Manasego meba po dabe te gasa buku mede elalubao. Augwaligo te Profet Dabego Po Bukude elalubao. Te bukude agai dwai dwai sę dabe yali te po dabe me pusuyu, me agai Genuai Bidibolo tudi ola mani po dabe me pusa elalubao, tama te bukude te lotu wali pesage po, me te tibo godiba lotu wali pesage, me god we Asera piksa noma, me agai nogogo nigali tibo god piksa dabe po me tede elalubao. Te aga digi tibo god nigilama lotu weyu yali po me te Profet Dabego Po Bukude te elalubao. Tama te bukugo agai homu begelama, tama aga digi aga aiyaba elaluali po me tede te bukude pusai dao. Tama me agai Godibolo gedu haluasa po obaso tama Godigo agai gedu haluasa po odali po dabe pusali po me te elalubao. 20 Manase aga isibaso, augwaligo aga king dabego obo tomode pubulali, te king dabego be obo tomode. Tama aga ogwa Emongo agai pesage selama, tama aga king pedelali.

21 Te Emon aga king pedelali sogo, agai kibu be 22 elaluali, tama aga kibu be si digi te Jerusalemde bidali 22 Emongo me Genuai Bidigo gedude aga aya Manasego yali dwai kolesaga tiwai mu yali. Agai aga ayago polobadu nigali te tibo god piksa dabeba lotu po weyu yali, tama agai augwaliba ofa iyu ebo sę me yali. 23 Tama tiali goli agai aga digi Godigo gedude aiyaba elalubeo, te aga ayago yali tiwai ebeo. Menio. Agai dwai sęgę sabo sę genuai mu ela pidu geani. 24 Me sogo bubugade Emon aga ofisa bidi dabe sisinama, tama aga elabo po sunumi gegiyu po miani. Tama nosali augwaligo aga king be tomode elama isilali. 25 Tama nosali te Juda we bidi dabego te Emon ela muani ofisa bidi dabe selama augwali me elama isilali. Tama augwaligo Josaia te Emon aga ogwa selama, tama augwaligo aga augwa king magi ilali.