1 Dago abagi dede, dago gasa po me elalubo. Tama da te Genuai Bidigo po sela pabo bidi dabe dao. Tama tibaso, dagego e po tudiba muidali weyu, tama dago bomo elama, dagebolo e po megi obao. Polobadu dago te Godigo gedude dwagi yai dolo yai kolesaga ebo po dagebolo ola mawai. Tama dago te tobage po dagebolo ola menama, tama dagego te po odoyu, wali peyu bidibo dao. Tiali goli, megi dago bomo elama, dagebolo e po megi obao, te dagego dene siyu te tobage sę tigidali dagego bugagia mu yao. 2 Tama te Genuai Bidi Jisas agai da tau selama, tama dago dagebolo te sę yao po wali, te dagego koneai dao. 3 Tama te po page mu e dao, God agai dage dali ebo homu e tiwai, dagego magi dwai sę me isiąma, doloba pai we bidi mu bidao. Tama penani ebo sę dagego egimio. 4 Tama te dwai sę isiąbo kolesaga bugagia wali peyu, tama we sabo kolesaga dage deli deligo bugagia koneama, tama tebo kolesaga eyu bidao, God agai homu dage dali te tiwai homu ebo dao. Tama dagego tebo kolesaga, te Godigo kolesaga naga tiwai wali pao, tǫde we bidi augwaligo ‘Te sę dwagi yai sę dao’ omainogo yao. 5 Tama we sabo sę te tiwai eyu, tama dagego te God konesiąwai bidi hanigo ebo kolesaga tiwai egimio. Te God konesiąma, augwali augwa dwai sę yabo homu kolesaga wali peyu, te bomogo, te we sabo dao. 6 Tama God agai ebo homu e dao. Dagego te we sabo sę po bolama, tama duga abagi dali dwai sę egimio. Magi baso menio. Genuai Bidi Jisas agai te tobage dwai sę ebo kolesaga ebo bidi augwali tigidali agai wei ponobo dao. Tama polobadu da dage dali bidibadi, e sęgę yai po dao homu eyu, dago te po hanilama, dage dali wai dao, dage tau somainogo. 7 God agai da i wali, dago te dwai meda yai kolesaga wali pomainogo da i wabeo. Menio. Agai da i wali, te dago dwagi yai doloba pai kolesaga mu wali pomainogo agai da i wai dao. 8 Tama tibaso, e po odolama ela pabo bidi, te bidi agai e tǫde bidigo po naga tudiba mubeo. Te bidi agai Godigo po odolama ela peyu, aga tudiba muani bidi dao. Te God agai naga dagebolo te Dwagi Yai Mobo Bidi mani God da, te Mobo Bidi agai dagebolo mani, dage Godigo we bidi mu bidimainogo.

9 Te eno duga abagi dabe augwalibolo dagego dwagi yai homu ela mabo, te po eno meba asęgobeo. Magi basowe? God agai te duga hasi dali dwagi yai homu mabo te kolesaga dagebolo ola menama, tama te kolesaga dagego koneyu bidibao. Tama eno dagebolo te po ma ola magobeo. 10 Tama dagego dwagi yai homu duga abagi dabe te Masedonia tǫ tigidali tomode bidibo bidi dabe augwali dali ebo dao. Dagego te kolesaga ebaso, God agai te kolesaga dagebolo ola mani, te dago koneai. Tiali ma, dago abagi dede, dago po bomo elama, dage dali obao, tama dagego duga abagi dabe augwali dali dwagi yai homu ebo kolesaga te kolesaga dagego me mu ela pao. 11 Dagego homu kolesaga tomode bomo elama, tama dagego homu dwagi yai nagamea peyu, tama duga bidibo bugagia tonaluao. Tama dagego duga digi duga masigi sabo sę yao, dago polobadu dagebolo te po wali gilama. 12 Dage magi nai me menia sidali weyu, te duga masigi sabo sę yao. Tama te Godigo po wali pesiąwai we bidi augwaligo dagego te dwagi yai kolesaga ebo sumainogo, tama dagego homu dwagi yai nagamea peyu, tama duga bidibo bugagia tonaluao.

13 Dago abagi dede o, edao. Te Godigo po wali pisiąwani we bidi augwaligo augwa homu Godiba musiąyu, te isali we bidi gų pagede ma hodalobo sogo augwaligo tonalusiąma, tama te isibo we bidide augwali homu dene eyu, gela mu wabo dao. Tiali goli, dago homugo te Godigo po wali pelama isali we bidide te dagego bugagia koneao. Dagego te buluba bidibo we bidigo gela wabo tiwai waidali weyu, dago e po dagebolo obao. 14 Da tigidaligo te Jisas aga isilama, tama ma hodaloai dao, te dago te mu po da homu eyu, konealubo dao. Tama tibaso, da tigidali Jisas dali wadoloyu bidibaso, dago e po me konealubo dao, te Godigo te Jisasgo bomode te agai po wali pelama isali we bidi Jisas aga dali ma hodasa sela asaibao. 15 Tama Genuai Bidigo po naga dago dagebolo megi obao. Nosali Genuai Bidi ma asobode, da e tǫde isisiąwani we bidi, da polo hasia polasa te Godigo po odolama, isali we bidi taga peyu da polo pogobeo. [1 Ko 15:51-52] 16 Te menio. E tiwai pedalaibao. Te Godigo bomo elama po weyu, tama polalubo genuai ensel mobo bidigo i weyu, tama Godigo moni bu wabo nai biugel po weyu, tama tebo sogo Genuai Bidi Jisas aga digi dagalu tagalama, dulubo gagalaibao. Tama polobadu Jisasde konealubo po dąų olama isali we bidi, augwali polo hasia mu gų pagede hodaloaibao. 17 Tama te sogo da tǫde isisiąwani we bidi, Godigo da te ma hodolali we bidi dali pǫgo odasa dagaluba holaibao, te da te asobo Genuai Bidi tiąba pomainogo yaibao. Tama elama, da te Genuai Bidi Jisas dali sesemane sogo bidada peyu, mu bidada paibao. 18 Te sę pedalama, tama da tigidali te tiwai bidaibao. Tama tibaso, dage tomode we bidi meba augwali isibaso, dagego te pogo duga hasi tau siyu, duga homu dąų walao.