1 Sol te bulu Naiotba sabalubo si, te Devitgo te bulu taga soyu, tama Jonatan bidibo madi wi ma soali. Tama agai Jonatanbolo te tiwai po wali, “Ei, Jonatan! Magi baso nago ayago ena ela muainu ebawe? Eno magi dwai sę me deli isiąyu, ma dwai kolesaga me deli agaba me ebeo. Mu tama, eno magi dwai sę me deli me ebeo,” wali.

2 Tialima, Jonatango Devitba po wei ponoyu, te po wali, “Menio. Nage me isigobeo. Eno ayago enabolo te agai yabo sę po tigidali waibao, te dwasianu sę yabo me, genuai sę me, te enabolo weyu yaibao. Tama agai te tobage sę yabo po geme me dualugobeo. Tama tiyu, eno koneani, te agai nage me ela muainu ebo usu me egobeo,” wali.

3 Tiali goli, Devitgo agabolo te po wali, “Nago ayago bugagia koneani, te nago ena godolo homu ebo agai koneani. Tama tiyu, te agai ena ela muabo homu ebo po te nageba me walogobe homu yaibao. Agai homugo te sęde nago homu sęgę idali homu yaibao. Tiali goli, te Sesemane Sogo Bidibo Genuai Bidigo nogide eno mu po obao, nago ayago ena ela muabo homu ebao. Eno te koneanio, te eno koneani megi nage ena dali bidibo tiwai. Tama dwasianu sogo pąde te nago ayago te tama tiaibao,” wali.

4 Tama Jonatango Devitbolo te po wai, “Nago homugo eno magi sę ebogo nage tau somainuwe? Te mena sę yaibaso, eno ebaso te usu yaibao,” wali.

5 Tialima, Devitgo te tama po agabolo wali, “Do da, te gesi poluago te genuai side tama eno te king dali nai tugi pabo da. Tiali goli, nago homugo te wiegi yai da eyu da, teda ena te giba geme duala sigi pelama, te gasa do da wabo sogo te be pio eboba usu naibao. [Nam 28:11] 6 Tama nago ayago suali, ena te tebol te nai tubo madi dugulalusiąbaso, tama agai nageba hanalu, ena menade bidibowe obaso da, teda nago agabolo te tiwai po wao, ‘Devit te aga asesa polo te aga bulu Betlehemba painu yali, magi baso meni, te sogo te tigidali kibu bede te aga hani sibi deliba sisinama, te ofa ebo da po wali. Agai enabolo hanalu, te ena pao waibawe obaso, tama eno agabolo usu da wai dao.’ Nago te po agabolo wao. 7 Nago te kingba po walama, tama agai te po weyu, ‘Wiegi yai da,’ obaso da, teda nago koneani, te ena bugagia bidimainu ebao. Tiali goli, te aga haliga sębę ebaso da, teda nago koneao, te agai enade dwai sę yabo homu eyu tebao. 8 Eno koneani, ena te olo bage nai tiwai yali, tiali goli nago ena wiegi yai bugagia ilao, magi baso meni, te Genuai Bidigo gedude nago te bomai po me deli dąų walu, te ena nago abagi mu sesemane sogo bidaibao po wai. Tiali goli, eno dwai sę elama, tama eno te sę yali sęgę elalubaso da, teda nago digi ena ela muagameo. Tiyu, nago ena te naga aya bidibo madi selama, pelama, te agai ena ela muidalio,” Devitgo te po wali.

9 Tama Jonatango agabolo te tama wali, “Tagalao, nago te tama homu tiwai homu me igio. Te eno ayago dwai sę nageba yainu ebo te eno konebaso da, teda eno nageba walaibao. Eno munu me geme dualugobeo,” wali.

10 Tialima, Devitgo agabolo te po wali, “Nago enade po ayabolo walali madi, tama agai te wado pogo naga te po wei ponobaso da, teda dego enabolo te po wagasogowe?”

11 Tama Jonatango Devitbolo te po wai, “Da si te giba pelama, po migi pinao.” Tialima, augwa si hogodama palio. 12 Augwa si teba sabolama, tede Jonatango Devitbolo te tiwai po wali, “God, te da Israelgo Genuai Bidi, te dago e wabo po odomainao. Tama eno tibo po weyu da, teda agai enaba te dene momainu yaibao. Do, ma duba, e tiwai tobage sogo, eno ayabolo te nagede po hanalu waibao. Tama agai nagede usu da po obaso da, teda eno nageba po ola tolaibao. 13 Tiali goli, eno ayago nage dolabo homu ebaso da, teda eno nagebolo walaibao. Te eno nageba walisiąyu, tama eno nage wi pomainu tau sisąbaso da, teda Genuai Bidigo te genuai dene enaba momainu yaibao. Genuai Bidi te eno aya dali bidu, tama eno homugo me te nage dali bidiba homu ebao. 14 Tama nosali, ena me bididubaso da, teda eno homugo te nago ena isimainu me iligobeo. Menio. Nago wiegi yai homu eyu, olo tau mabo kolesagago te ena wiegi yai bugagia ilao, te nago Genuai Bidigo gedude te bomai po dąų walali po te tiwai yao. 15 Tama sesemane sogo nago eno wai hani sibiba me te wiegi yai bugagia ilao. Nago dwai sę augwaliba me elamuo. [2 Sml 9:1] 16 Tama Genuai Bidigo te nageba boi bidi yali tigidali silibo sogo da, teda nago dago te dąų walali bomai po te nago homugo me gegeda palamuo. Nago te dąų wali bomai po wali pisąwani da, teda Genuai Bidigo nageba dene mawaibao,” wali.

17 Tama Jonatango Devitba ma weyu, te Devitgo aga sesemane sogo godolo homu ebo bomai po dąų wao po wali. Magi baso meni, Jonatango te Devit godolo homu mu yali, te aga digi aga godolo homu ebo tiwai yai. Tama Devitgo te Jonatango wali po tiwai gilama te bomai po dąų walali. 18 Tama Jonatango Devitba te tiwai po wali, “Do da, te gesi poluago genuai side dao. Tama nage te nai tubode bidisiąbaso da, teda ayago te nago sia sai te olo elalubo subaso, tama aga homu hauwa yaibao. 19 Tama duba nage te genuai masigi tudi badu pelama, te polobadu yali tiwai gilama teba geme duala sigi pelama bidao,” wai. 20 “Tama ena asama, tama eno te ene te wali po selama, te tiwai sa muani madiba eneyu, tama eno te ene sela te masigiba enaibao. 21 Tama eno ena sę bidibolo weyu, te eno ene te gegegi pao po waibao. Tama eno agabolo weyu, te edanu ma asao po waibao, magi baso meni, te ene eda badu munalubaso waibao, teda Devit, nage enaba asao. Te Genuai Bidigo nogide eno mu po obao, te nago eno tama po wabo odobaso da, te nago koneama te nage bugagia bidimainu eyu, tama te magi nai me deligo nage me dologobeo. 22 Tiali goli, eno te sę bidiba po weyu, te ene dabe uga badu munalubao obaso da, teda nage hogodama, gasa badu pao, magi baso meni, Genuai Bidigo digi nage te tagala palobao. 23 Tama nage bugagia bidibo sogo, nago te Genuai Bidigo dago e po dąų wabo suali, te homugo me gegeda palamuo, tama sesemane sogo nago te dąų wali po wali pao,” Jonatango te po wali.

24 Tama tiyu, Devit te giba geme duala sigi pelama bidali. Tama do te king Sol te gesi polua side te genuai nai tugi peyu palio. 25 Tama aga te be paliali daga pąde elalubo sia saide dugayu, te aga sesemane sogo ebo tiwai gilama yali. Tama Jonatan hogodama, dolugulali, tama Apner te king pąde dulaluali. Tiali goli, te Devitgo sia duabo sai te olo elaluali. 26 Tialima, Solgo suali, te Devit bidibo subeo, tiali goli te sogode agai te sęde po me mibeo. Aga homugo naga kone palali, ‘Te Devit mena sę yaliwe? Te magi nai me deli agaba pedelama, tama aga te God gedude wiegi yai me egobe da homu ebaso, te aga asobewe?’ 27 Tialima, te gesi polua te si sogo wabode augwali te nai ma tueinu sisinani, tama te side me te Devitgo sia olo elaluai. Tialima, Solgo Jonatanbolo wali, “Ae, tegobao! Do bidali sogo, me megi me, te Jesi aga ogwa te nai tuboba me asobeo. Magi baso aga asobewe?” Solgo te po hanalu wali.

28 Tama Jonatango te po wali, “Agai bomo elama, enaba hanalu, aga te Betlehemba pomainu yao po wali. 29 Agai enabolo te tiwai po wali, ‘Eno homugo nago ena pomainu yao, magi baso meni, te eno hani sibigo bulude te ofa yainu, tama eno amago te po ola tolai baso, ena augwali dali sisinagasao po wali. Tama nage eno abagi mu da wida, teda nago ena pomainu elama, te eno hani sugi pomainogo yao.’ Agai te tiwai po obaso, teda eno aga pomainu ilalio. Tama te pagede naga tama aga te nage dali te nai tubode dulalu bidibe dao,” te po wai.

30 Solgo te po odama, tama aga te Jonatan dali dwai haliga sębę mu yali, tama agabolo te tiwai po wai, “Nage sunumidu bilama ame nai wede wai dao! Nage te dwai hagoma ebo we mugo wai dao! Nage eno koneani, nago te Jesigo ogwa dali abagi hai namu olasa bilali. Tama nago te kolesaga eyu, nage te olo bidi tiwai pedaliyu, tama teyu, te genuai hale ebo te nageba dali te nago idaba me pedalubao. 31 Magi baso meni, te bidi bidibo sogo digi, nago te tǫ pedaide king bidi me pedalugobeo. Tama tiyu, nago te bidi polo tagala palama, te aga selasa asao, te eno aga ela muaibao,” wali. 32 Tama Jonatango Solgo po wei ponoyu, te tiwai po wai, “Magi baso aga isimainu obawe? Agai magi dwai sę yaliwe?”

33 Solgo te po odama, tama polo tama aga te sesemone ene Jonatanba sąyu aga dolomainu yali, tiali goli Jonatango te enani ene geda muani. Tama megi da agai koneani, te aga ayago Devit ela muabo homu bomo ebo koneanio. 34 Tialima, Jonatango te aga aya dali haliga sębę umabo mu elama, tama te nai tudali tebol sai taga peyu, palio. Tama aga te gesi polua side te nai tubo si sogo wabode te nai me tubeo. Agai homugo te ayago aga dolali homu eyu, tama aga te Devitde homu dene mu elama, tama haliga sęgę mu yalio.

35 Te nosali badu kigamu, Jonatan te giba pelama, te Devit dali deliba sisinainu yali, te augwa si wali po gilama tiwai yai. Tama agai te ogomani me deli aga dali selama pai. 36 Tama Jonatango te ogwabolo te tiwai po wali, “Eno te enesigi ene meba te uba elainu ebao. Te ene dabe eno ena silibo si da, teda nage pelama, gegegi pagameo. Ae, megi da nage pao.” Tialima, te ogwa udulama pobadi, tama Jonatango ene me deli enani, te ela soyu, tama u badu tulalugi pai. 37 Te ogomani pelama, te ene tulaluali madiba sabalubo side, teda Jonatango te tiwai i wali, “Nage ugaba dwasianu gana pao. Te ene uga badu munalubo homu ebao.” 38 Tama Jonatango te ogwanuba te tiwai i ma wali, “Asesa polo pao! Nage olo tede dolalugio.” Tama te ogwago te ene sela asu, aga bidiboba ma asai. 39 Tiali goli, te ogwago Jonatango te wali po page agai me konebeo. Menio. Jonatan de Devit dali sigo naga koneani. 40 Tama Jonatango enesigi dali te ene dabe me te ogwabolo menama, tama agabolo weyu, te taunba ma tolasa pao po wai.

41 Te ogwa pai madi, teda Devit hogodama, tama te masigi tudi badu geme dualaluali taga soyu asama, tama Jonatan pąba kidu sugunagaselama, tama aga tobolu tǫba sela sogo basi gulali. Tama aga dolugulama, tama augwa si nono nenama, tama gela wai. Tama Devitgo homu dene eyu, hobede ebo homugo te Jonatango homu dene eyu hobede ebo homu te aiyaba elalualio. 42 Tialima, Jonatango Devitbolo te po wai, “Nage te wiegi yai homu nagame dali pao. Dago te Genuai Bidigo nogide te po dąų waliyu, te dena digi dena bugagia wiegi yai sesemane sogo ilao, tama nago hani me eno hani nosali pedalubo bage me, augwa me te tobage deli kolesaga emainu yaibao. Tama Genuai Bidigo dago te dąų walubo po odali, tama dago wali paibao.” Agai po ola siminama, tama Devit gasaba peyu, tama Jonatan te taunba ma begasa palio.