1 Devitgo te bidi sese hauwa umabo 1,000 ami bidi tonalu, me te bidi sese a naga 100 bidi tonalubo ofisa bidi dabe augwali dali te po mibadi, te gasa tobolu bidi dabe dali me te po pusalio. 2-3 Tialima nosali te miani po agai te aga dali sisalu bidibo te tigidali Israelba te po pusalio. Agai augwaliba te tiwai po wali, “Eno te tama homu yali, da pelama, te Godigo Dąų Wali Bomai Po Muani Halobage sigi pelama sela asobaso, te wiegi yai egowe te homu ebao, magi baso meni, dago te Dąų Wali Bomai Po Halobage te Sol king bidali sogo homu kone me isąma tagalalio. Tibaso, dagego te tama homu ebo usu da olama, tama te God, dago Genuai Bidigo, homugo dago te Dąų Wali Bomai Po Munalubo Halobage sela asomaina homu ebaso da, teda dago dena abagi dabe te tigidlai habu badu te Israel tǫ pedai kantride bidalubo bage tigidali i waibao. Tama dago te pris dabe me Livai dabe te augwa taunde bidalubo me i waibao. Tama te hani tigidali da dali deliba sisinagasomainao,” te po walio. 4 Te we bidi tigidali augwaligo homugo te wali po godolo mu elama, Devitgo te po usu da po walio.

5 Tibaso, Devitgo te tigidali Israel dabe te tigidali tǫ pedaiba i wali, te wę Sihor te Isip tǫ dąį igi pali te saut badu gagalama, tama te bulu Hamatba pabo te sunumi tunu mage si te not badu usu nigi palio. Tialima augwali sisinagaselama, te bulu Kiriat Jearimba pelama, te Dąų Wali Bomai Po Munalubo Halobage muani te sigi peyu yalio. [1 Sml 7:1-2] 6 Tama Devit dali te tigidali Israel te Juda tǫba pali, te Bala taunba pali, te aga gasa nogi me Kiriat Jearim. Augwaligo te Godigo Dąų Wali Bomai Po Muani Halobage sigibu palio. Te halobage te nogi augwa e tiwai wali, Genuai Bidigo Dąų Wali Bomai Po Munalubo Halobage dao wali. Te halobagede te mobo bidi ensel si noma ugwadu daide elaluali, te Genuai Bidi king dugulalubo sia sai tiwai dao. [Sai 25:22] 7 Tialima augwali pelama, te taun Balaba sabolali, tama augwali te Abinadapgo beba pali. Tama augwa te Dąų Wali Bomai Po Munalubo Halobage selama, te gesi karis me deliba muani, te augwa dali sela painu yali. Tialima augwali hogodasa peyu, tama Usa dali Ahio dali sigo te karis pogolobo sę ela palio. 8 Tama Devit dali te tigidali Israel dali dwagi yai homu eyu, te karis sela pelayu, te augwa tęąbi wabo sę genuai eyu musik weyu, te Godigo nogi ugwaba mu salio. Augwa te bu wabo nai biugel ponoyu, te hąbidi me gita eleyu, te musik wabo sę haniani mu yalio.

9 Tialima augwali te bidi me deligo tǫ badu sabolali, te bidi Kidon, te bidi dabego tubo nai wit ge naga siyu, te wit wali sela sąbo pesageba sabolali. Tama te pesagede te karis kegebo bulmakau dabe degasa painu, tama tebogo te Dąų Wali Bomai Po Munalubo Halobage tǫba tula palainogo ilali. Tibaso, te bidi Usago te halobage nogogo dįayanio. 10 Tama Genuai Bidi sębę mu yai, magi baso meni, Usago nogo te Dąų Wali Bomai Po Muani Halobageba muani. Tama tede digi tama te Genuai Bidigo aga ela muani, te Genuai Bidi aga gedude tiwai dao. 11 Devitgo suali, Genuai Bidigo te Usa ela muani sę sulama, tama Devitgo wado yali. Te bulu nogi augwaligo te tiwai nogi yai, Godigo Usa Ela Muani Pesage dao, wali. Tama te buku asęani bidi bidali sogo te we bidi augwaligo te tiwai nogi me udalio.

12 Tama Devit te Genuai Bidide wi ebaso te tama po wali, “Magi elama mu eno te Godigo Dąų Wali Bomai Po Muani Halobage ena dali te buluba sela paibawe?” 13 Tama tialima, Devitgo te halobage te Devit agai taun, te Jerusalemba sela pabeo. Menio. Agai te Jerusalemba pabo sunumi tagalama, te Dąų Wali Bomai Po Muani Halobage te bidi Obetidomgo beba mugi pali, te Get taun bidi me deli dao. 14 Tama te Dąų Wali Bomai Po Muani Halobage te bidi Obetidomgo bede munalubadi te polua sela bidali. Te tiali sogo Genuai Bidigo te Obetidom te aga we wai augwaliba wiegi yai sę ilama, te augwa tididali nai doado bage wiegi yai usu mu ilalio. [1 Sto 26:4-5]