3
Än Jerusalem tipis me an ngasala
3.1-20
1 Feiengauen Jerusalem, ewe telinimw mi ngau o ü ngeni Kot, a ariaföüü püsin nöün aramas. 2 Esap mochen rongorong mwelien Kot, esap etiwa an kapasen emirit. Esap lükü ewe Samol mi Lapalap, esap pwal kanoto ren.
3 Nöün kewe nöüwis ra usun chök laion mi wörüwör, nöün kewe soukapwüng ra usun chök wolif mi echik, resap likiti och tori lesosor. 4 Nöün kewe soufos ra tunosikesik o uren atuputup, nöün kewe souasor ra apiningaua mine a pin o fokun sorei än Kot allük. 5 Nge ewe Samol mi Lapalap mi nom lon ewe telinimw a fokun pwüng, esap föri och mi mwäl. Iteiten lesosor a pwärawu an pwüng, esap etiwala eu rän. Nge ekewe chon pwüngingau ra chök föri mine a ngau, nge resap sile säw.
6 Iei alon ewe Samol mi Lapalap, “Ngang üa ärala chon ekewe mwü. Ar kewe imw tekia o pöchökül ra tala. Üa föri pwe ekewe al ra pön, pwe esap wor eman a fetal wor, pwal ar kewe telinimw ra tala, pwe esap wor eman aramas a nonom lor. 7 Üa apasa, ‘Amwo itä nei aramas repwe meninitiei, repwe etiwa ai kapasen emirit, pwe imwer esap tala, esap pwal toriir ewe apwüng üa amolätä fän iter.’ Nge ir ra chök achocho le alapala ar föför mi ngau.”
8 Iei alon ewe Samol mi Lapalap, “Oupwe chök witiwitiei, oupwe witiwiti ewe rän, lupwen üpwe ütä o atipisi chon ekewe mwü. Pun üa fen apwüngala pwe üpwe achufengeni chon ekewe fanü me mwü, pwe üpwe awarato wor ai chou me ai song mi fokun watte. Pun unusen fanüfan epwe tala ren ekkeiin ai lingeringer.
9 Mürin, üpwe awili letipen chon ekewe mwü, pwe resap chüen fel ngeni ekewe uluulun anümwäl, nge repwe chök iotek ngeniei, Ngang ewe Samol mi Lapalap, o angang ngeniei fän tipeeu. 10 Nei kewe aramas mi fel ngeniei, ir mi toropasfeil, repwe uwato ar asor ngeniei seni pekilan ekewe chanpupun Itiopia.
11 Lon ena fansoun ousap chüen säw pokiten oua ü ngeniei. Pun üpwe atowu seni me leimi chokewe mi lamalamtekia o tunosikesik, pwe ousap chüen ü ngeniei me won chuki mi pin. 12 Nge üpwe likiti me leimi eu mwichen aramas mi tipetekison o tipefesir, repwe anomu ar apilükülük woi. 13 Iwe, chokewe mi chüen manau me lon Israel resap chüen föri föför mi mwäl, resap pwal chüen eäni kapas chofana me kapasen atuputup. Repwe fefeitä o nom fän kinamwe, nge esap wor eman epwe eniwokusuur.” ✡ Pwär 14.5
14 Oupwe leüomong le köl fän pwapwa, ämi chon Israel!
Oupwe meseik o mwänek ren unusen lelukemi, ämi chon Jerusalem!
15 Ewe Samol mi Lapalap a aükätiu ämi kewe apwüng
o asüela chon oputemi.
Ewe Samol mi Lapalap ewe Kingen Israel a nom remi,
pwe ousap chüen niuokusiti och feiengau.
16 Lon ena fansoun repwe apasa ngeni Jerusalem,
“Kosap niuokus, en Sion,
kosap aitietiu poum.
17 Ewe Samol mi Lapalap om we Kot a nom reöm,
a wor an manamanen amanaua aramas.
Epwe meseik reöm fän pwapwa,
epwe asöföök ren an tong.
Epwe ingemwareituk fän köl mi leüömong,
18 usun aramas ra pwapwa lon ar ränin chulap.”
Iei alon ewe Samol mi Lapalap,
“Üa aükätiu ewe niuokusun feiengau
o angei senuk om itengau.
19 Lon ena fansoun üpwe apwüngü chokewe meinisin mi ariaföüük.
Üpwe angasa ekewe mi pechemä o aliwinisefäli ekewe chon oola.
Üpwe akasiwili ar säw ngeni iteüöch,
nge chon fanüfan meinisin repwe mwareitiir.
20 Lon ena fansoun, lupwen üpwe achufengenikemi,
üpwe aliwinisefälikemi ngeni leniemi.
Üpwe aiteüöchükemi me lein chon fanüfan meinisin pwe repwe mwareitikemi,
lupwen üpwe aliwinisefäli ekewe chon oola.”
Iei alon ewe Samol mi Lapalap.