Echö Toropwe seni
Jutas
Kapas akom
I. Chon makkei ei toropwe: Eli Jutas pwiin James.
II. A mak ngeni iö: Ngeni ekewe souläng mi manau lon ena fansoun.
III. Itelapemongen ei toropwe: Kapasen fön usun ekewe chon afalafal chofona.
IV. Kapas aüchean ei toropwe: Oupwe apöchökülakemi lon ämi maun fänäsengesin ewe lükülük.
V. Masouen ei toropwe: Jutas a makkei ei toropwe an epwe fönöü ekewe souläng pwe resap tup ren ekewe chon afalafal chofona, ir ätekewe mi apasa pwe ir chon lükü Kraist. Lon ei toropwe mi mochomoch masouan mi chök wewe ngeni ewe aruachön toropwe seni Petrus. Ewe chon makkei a apöchöküla letipen ekewe chon aleani ei toropwe, pwe repwe maun fän iten ewe lükülük Kot a ngeni nöün kewe chon pin.
VI. Tettelin masouen ei toropwe:
Kapas akom 1-2
Än ekewe chon afalafal chofona lapalap, masouen ar afalafal me ar feiengau 3-16
Kapasen fön pwe repwe kamwöchünük won ar lükülük 17-23
Kapasen afeiöch 24-25
1
Kapong
1-2
1 Ngang Jut, eman chon angang ngeni Jesus Kraist, ngang pwal pwiin James, üa kapong ngeni chokewe mi kö o chen me ren Samach Kot o nom fän tümwünüen Jesus Kraist. ✡ Mat 13.55; 6.3 2 Ümöümöch, kinamwe me chen epwe chomongola remi.
Ekewe chon afalafal chofona
3-16
3 Ämi chiechiei kana mi achengicheng, üa achocho ngeni ai üpwe mak ngenikemi usun ewe manau mi fö sia eänifengeni. Nge iei üa mefi pwe a aüchea ai üpwe müttir mak ngenikemi o apöchökülakemi, pwe oupwe maun fänäsengesin ewe lükülük Kot a ngeni ekewe chon pin. Iei ewe lükülük esap tongeni siwil. 4 Pun ekoch aramas resap meniniti Kot ra anifilong leich, ir chokewe mi sorei ewe kapas usun än Kot ümöümöch, pwe epwe wor ar künetipingen won ar kewe föför mi fokun ngau. Ra pwal amamäsini Jesus Kraist, i chök ach Sounemenem me ach Samol. Me lomlom ekewe Toropwe mi Pin ra osuni usun ewe kapwüng ra tolong lon.
5 Pun inamwo ika oua silei ekei mettoch meinisin, nge üa chök mochen ai üpwe achema ngenikemi usun än ewe Samol a amanaua ekewe aramasen Israel seni Isip, nge mürin a arosala chokewe resap lükü. ✡ Eks 12.51; Num 14.29-30 6 Oupwe chechemeni ekewe chon läng resap menemenöch ren wiser, nge ra likitala wesewesen lenier. Ra föfö ngeni sein esap tongeni mwü lon ewe rochokich mi nom fan, ia Kot a fötekiniirelong ie tori ewe Rän mi lap i epwe apwüngüür lon. 7 Oupwe chechemeni Sotom me Komora me ekewe telinimw mi nom ünükür, aramasen lor ra föri sokun föför usun chök ekewe chon läng. Ra föri sokun föförün lisowu mi ngau o lapalapangau. Ra nom lon riaföün ewe ekkei esekun pwe ina liwinin ar tipis. Iei eu kapasen fön mi fatöch ngeni aramas meinisin. ✡ Ken 19.1-24
8 Lon ewe chök sokun lapalap, ekei aramas a wor künaer mi aselipa ngeniir ar repwe tipis ngeni püsin inisiir. Ra turunufasei än Kot nemenem o esita ekewe meilap lon läng mi wor ar ling. 9 Sap mwo nge ewe meilapen chon läng Mikael a föri ei sokun. Lupwen a aninifengen me ewe Tefil ika iö leir epwe nemeni somän Moses, Mikael esap mochen apwüngü Tefil ren kapasen aitengau, nge a apasa, “Ewe Samol epwe apwünguk!” ✡ Tan 10.13,21; 12.1; Tut 34.6; Pwär 12.7; Sek 3.2 10 Iwe, ekei aramas ra eäni kapas ingau usun ekewe mettoch resap weweiti. Nge ekewe mettoch ra weweiti seni chök ar mefi mi usun chök mefien ekewe manmwacho, ikkei ekei mettoch ra feiengau ren. 11 Epwe ifan me watten feiengauer! Ra manaueni manauen Kain. Ra atolongeer lon ewe sokun ruongau Pileam a föri fän iten ar repwe angei moni. Ra ü ngeni Kot usun chök Kora, iwe, repwe rosola usun chök i. ✡ Ken 4.3-8; Num 22.1-35; 16.1-35 12 Ekei aramas ra usun chök och limengau lefilemi lupwen oua chiechifengen lon ämi kametip ren ar säwemang lon ar momongö o ükün. Ra chök püsin tümwünüür. Ra usun chök ekewe kuchu esor koluk lor, äsepwäl a ässirela. Ra usun irä esap wor uar lon fansoun kinikin, irä mi üttütä fiti warer, ra wesewesen mäla. 13 Ra usun chök ekewe nongauen lematau mi puropuretä ren ar föför mi asäw. Ra usun chök füün amwalech, Kot a fen amolätä fän iter eu leni lon rochokichin rochopwak tori feilfeilachök. 14 Iwe, Enok ewe afümanün täppin aramas seni Atam a osuni usur me lomlom, “Ewe Samol epwe feito fiti ngeröün chon läng mi pin ✡ Ken 5.18,21-24 15 pwe epwe apwüngü aramas meinisin, epwe pwal atipisiir meinisin pokiten ar kewe föför ra föri ren ar resap meniniti Kot, pwal pokiten ekewe kapas mi fokun ngau ekewe chon tipis resap meniniti Kot ra apasatä lon ar ü ngeni.”
16 Ekei aramas ra chök lal o atipisi aramas. Ra chei mochenin letiper mi ngau, ra eäni kapasen tunomong usun püsin ir, ra pwal kapas amichimich, pwe repwe angei mine ra mochen.
Kapasen fön me kapasen öüröür
17-23
17 Nge ämi chiechiei kana mi achengicheng, oupwe chechemeni mine ekewe soukünö nöün ach Samol Jesus Kraist ra osuni me lom. 18 Ra ürenikemi, “Lon ekewe ränin lesopolan epwe wor aramas repwe takirikemi, aramas mi chei mocheniangauen letiper.” ✡ 2.Pet 3.3 19 Ir ekewe aramas mi afisätä imwüfesen, ra nom fän nemenien mochenin fituker, resap eäni ewe Ngünün Kot. 20 Nge ämi chiechiei kana mi achengicheng, oupwe chök sopwela le apöchöküla ämi lükülük mi unusen pin. Oupwe iotek ren manamanen Ngünmifel. 21 Iwe, oupwe püsin tümwünükemi lon än Kot chen lupwen oua witiwiti ach Samol Jesus Kraist pwe epwe ngenikemi manau esemüch lon an ümöümöch. 22 Oupwe eäni tong ngeni chokewe mi tipemwaramwar lon ar lükü, 23 oupwe amanaua ekewe ekoch aramas ren ämi angeerewu seni ewe ekkei, iwe, ngeni pwal ekewe ekoch oupwe eäni tong ngeniir fiti niuokus, nge oupwe fen mwo nge oput ewe üf a limengau ren mocheniangauen fituker.
Eu iotekin mwareiti Kot
24-25
24 Iwe, ngeni i, ewe mi tongeni amwöchükemi pwe ousap tur lon tipis, a pwal tongeni aükemiitä, pwe oupwe unusen limöch o uren pwapwa me mwen an we ling, 25 ngeni ewe eman chök Kot ach Chon Amanau epwe ling, tekia, manaman me nemenem ren Jesus Kraist ach Samol lon ekewe fansoun ra la, ikenai tori fansoun esemüch. Amen.