1 Iwe, Hiop a sopwela an pworaus o apasa,

2 “Amwo manauei iei epwe usun chök manauei me lom,

usun chök lon ekewe rän, lupwen Kot a tümwünüei,

3 lupwen a nom rei fansoun meinisin,

nge üa fetal lon rochopwak fän an saram.

4 Amwo manauei epwe usun chök lon fansoun ai pöchökül,

lupwen än Kot chiechi ngeniei a tümwünü chon leimwei,

5 lupwen Ewe mi Unusen Manaman a chüen rom rei,

lupwen nei kewe ra nom ünüki,

6 lupwen a wor chomong ünümei milik,

pun nei pwin kow me kuuch a fokun lölö oupwur,

pwal ai irä olif mi mär lein föüföü ra fokun uamong.

7 Lupwen üa feila ren asamalapen ewe telinimw

o mot won ai lenien mot lon ewe lenieichu,

8 ekewe alüal ra künaei o nimärämärsefäl,

nge ekewe chinlap ra ütä me mwei.

9 Ekewe samol ra ükütiu le kapas o pwölü awer ngeni pöür,

10 ekewe chon itetekia mwo nge ra osokükünüela mwelier,

chönawer a pachetä fän fongochur.

11 Chokewe mi rongorong usi ra apasa pwe üa feiöch,

nge chokewe mi künaei ra kapas mürina usi,

12 pun üa angasala ekewe chon wöüngau mi siö,

pwal ekewe mi mäsen esap wor eman a alisiir.

13 Chokewe mi arap ngeni ar repwe mäla ra afeiöchüei,

üa pwal apwapwai leluken ekewe fefin mi mä pwülüer.

14 Üa aüföüfa ngeniei pwüng,

ai pwüngüöch a usun chök echö owokot me eu akau.

15 Ewe chon chun a meseniei,

pwal ewe chon pechemä a pecheniei.

16 Üa eman sam ngeni ekewe chon wöüngau,

üa pwal peni ekewe chon ekis lon kapwüng.

17 Üa aükätiu pöchökülen ekewe chon pwüngingau

o amanaua ekewe aramas ra ariaföüür.

18 Üa ekieki pwe ränin manauei repwe chomongola usun föün pien aroset,

nge üpwe mäla lon püsin imwei.

19 Üa wewe ngeni efoch irä mi töla waran lon ekewe koluk,

nge palan kewe ra chöchön ren amurenipwin.

20 Aramas meinisin ra mwareitiei fansoun meinisin,

ai pöchökül esap sü seniei.

21 Aramas ra aüselingaei,

ra fanafanala o witiwiti ai kewe kapasen öüröür.

22 Wesin ai kapas resap chüen fossefäl,

pun ai kewe kapas ra tolong lon selinger.

23 Ra witiwitiei usun ar witiwiti püngün üt,

ra etiwa ai kewe kapas usun fanüfan a ünümi ewe ütten leres.

24 Üa emelimen ngeniir, lupwen esap wor ar apilükülüköch,

nge ai wopwapwa ngeniir a apöchöküleer.

25 Üa üreniir mine repwe föri o mot leir pwe üa ar samol,

üa emweniir usun eman king a emweni nöün mwichen sounfiu.

Üa usun eman mi achipa ekewe chon letipeta.”