1 Iwe, ämi pwiim kana, esap wor lomoten aipwe mak ngenikemi usun ewe fansoun ika ewe rän ekei mettoch repwe fisitä lon. 2 Pun ämi oua püsin silefichi, pwe ewe rän ach Samol epwe war lon epwe usun chök än eman chon solä war lepwin. ✡ Mat 24.43; Luk 12.39; 2.Pet 3.10 3 Lupwen aramas ra apasa, “Mettoch meinisin a kinamwe o nükünüköch”, mürin feiengau epwe müttir toriir usun cheuchen fam a tori eman fefin, nge esap wor eman aramas epwe tongeni sü seni. 4 Nge ämi pwiim kana, ousap nonom lon rochopwak, pwe ousap serengau ren ewe Rän usun än eman serengau ren eman chon solä. 5 Ämi meinisin oua aramas mi nom lon saram, oua chon lerän. Kich sisap chon lepwin ika nonom lon rochopwak. 6 Iei mine sisap möür usun pwal ekoch, nge sipwe nenela o mamasafichi. 7 Pun chokewe mi möür, ra möür lepwin, nge chokewe mi puch, ra puch lepwin. 8 Nge kich sia chon lerän, ousipwe mamasafichi. Sipwe üföüf lükülük me chen usun chök eman a üföüf echö chechen leupw mi för seni mächä, sipwe pwal eäni apilüköchün manau pwe ina imwach akau. ✡ Ais 59.17; Ef 6.13-17 9 Kot esap afilikich pwe sipwe angei riaföün an song, nge a afilikich pwe sipwe küna manau ren ach Samol Jesus Kraist, 10 i ätewe a mäla fän itach pwe sipwe nonomfengen me i, ese lifilifil ika sia manau ika sia mäla lupwen an epwe liwinsefälito. 11 Iei mine oupwe apöchökülafengenikemi o alilisfengen lefilemi, usun oua fen föri iei.

12 Ämi pwiim kana, aia tüngormau ngenikemi pwe oupwe meniniti ätekewe mi angang ngenikemi, ir mi emwenikemi o öüröürakemi lon manauen ämi souläng. 13 Oupwe asamoluur fän watten suföl me chen pokiten ewe angang ra föri ngenikemi. Oupwe kinamwefengen lefilemi.

14 Ämi pwiim kana, aia pesekemi pwe oupwe fönöü chokewe mi chipwang, oupwe apöchöküla letipen chon niuokus, oupwe alisi ekewe chon apwangapwang, oupwe pwal mosonotam ngeni aramas meinisin. 15 Oupwe pii pwe esap wor eman epwe liwiningauei föföringauen eman ngeni, nge fansoun meinisin oupwe achocho le föri mine a mürina lefilemi, pwal ngeni aramas meinisin.

16 Oupwe pwapwafochofoch, 17 oupwe iotek fansoun meinisin, 18 oupwe kilisou lon mettoch meinisin, pun iei letipen Kot ngenikemi lon Kraist Jesus. 19 Ousap kunuela ewe Ngünmifel, 20 ousap turunufasei ekewe kapasen osuni, 21 nge oupwe sotuniir meinisin. Iwe, oupwe amwöchü mine a mürina 22 o pöütala meinisin mine a ngau. 23 Kot, ewe mi fang ngenikich kinamwe epwe unusen apinikemi, pwe unusen ngünümi me letipemi me inisimi epwe unusöch tori ach Samol Jesus Kraist epwe war. 24 A allükülük ewe mi körikemi, i ewe epwe föri ngenikemi iei usun. 25 Ämi pwiim kana, oupwe iotek fänäsengesim. 26 Oupwe kapong ngeni ekewe chon lükü Jesus meinisin ren ewe kapongen souläng. 27 Üa allük ngenikemi fän iten ach Samol pwe oupwe aleani ei toropwe ngeni ekewe chon lükü Jesus meinisin. 28 Ümöümöchün ach Samol Jesus Kraist epwe nonom remi meinisin.