14
Pwal ekoch kapasen öüröür usun ekewe lifang seni ewe Ngünmifel
14.1-25
1 Iwe, oupwe fokun achocho ngeni ämi oupwe eäni chen. Nge oupwe pwal kütta ekewe lifang seni Ngünmifel, akaeuin ewe lifangen afalafala än Kot kapas. 2 Pun eman mi fos lon kapasen ekis, esap kapas ngeni aramas pwe a kapas ngeni Kot, pun esap wor eman a weweiti an kapas. Ätewe a pwärätä monomonen ewe let ren manamanen Ngünmifel. 3 Nge ewe eman mi afalafala än Kot kapas, a kapas ngeni aramas, a alisiir, a apöchöküla ar souläng o echiper lon manauer. 4 Iwe, ewe eman mi fos lon kapasen ekis a chök püsin alisi won inisin, nge ewe eman mi afalafala än Kot kapas a alisi unusen mwichefel.
5 Üa mochen pwe ämi meinisin oupwe fos lon kapasen ekis, nge üpwe fokun mochen pwe epwe wor remi ewe lifangen afalafala än Kot kapas. Pun ätewe mi afalafala än Kot kapas a lap seni ewe eman mi fos lon kapasen ekis. A chök wor lomoten än eman fos lon kapasen ekis are a wor eman a aföüü an kapas, pwe unusen ewe mwichefel epwe fefeitä ren. 6 Iei mine, ämi pwii kana, lupwen üpwe feito remi, met sokun feiöch üpwe ngenikemi are üpwe fos lon kapasen ekis? Ese fokun wor, are üsap ngenikemi och kapasen pwärätä seni Kot, ika och kapasen silelap, ika och kapasen osuni, ika och kapasen kait.
7 Oupwe ekieki usun ekewe pisekin ettik esap wor manau lor, usun ewe likaangün ika ewe kitar. Epwe ifa usun än eman epwe silei ngingiin echö köl, are ewe chon ettik epwe chök ettikichou, nge esap fiti notenin pwe epwe fatöch ngingin? 8 Nge are ewe mwän mi ettiki ewe rappwa esap fat an ettiki asilesilen maun, iö epwe amolätä ngeni maun? 9 Ina chök usun met a fis remi. Are ämi afalafal lon kapasen ekis esap fat wewen, ifa usun än eman epwe tongeni weweiti? Ämi kapas epwe chök morola lon asepwäl. 10 A wor chomong sokun än aramas fos lon ei fanüfan, nge esap wor eu me leir esap wor wewen. 11 Nge are üsap silei ewe fos eman a kapas lon, ewe aramas mi kapas epwe usun eman chon ekis ngeniei, nge ngang üpwe usun eman chon ekis ngeni. 12 Pokiten ämi oua fokun mochen an epwe wor remi ekewe lifang seni ewe Ngünmifel, oupwe fokun achocho ngeni an epwe chomongola ekewe sokun lifang mi alisi mwichefel pwe epwe fefeitä ren.
13 Iei mine ewe aramas mi fos lon kapasen ekis epwe iotek, pwe epwe wor an tufich an epwe aföüü mine a apasa. 14 Pun are üpwe iotek lon kapasen ekis, ngüni a wesewesen iotek, nge ai ekiek esap nom lon. 15 Iwe, met üpwe föri? Üpwe iotek lon ngüni, nge üpwe pwal iotek fiti ekiekin letipei. Üpwe köl lon ngüni, nge üpwe pwal köl fiti ekiekin letipei. 16 Lupwen oua kilisou ngeni Kot lon ngünümi chök, epwe ifan usun än eman mi fiti ämi mwich epwe tongeni apasa “Amen” wesin ämi iotekin kilisou, are esap silei met oua kapas usun? 17 Inamwo ika ämi iotekin kilisou ngeni Kot a mürina, nge esap alisi ekewe ekoch aramas.
18 Üa kilisou ngeni Kot pwe üa tongeni kapas lon kapasen ekis lap seni ämi meinisin. 19 Nge lon imwenfel, lupwen ach fel ngeni Kot, üa efich ai üpwe apasa limu kapas pwe aramas ra tongeni wewe ren lupwen üpwe asukuler, lap seni ai üpwe fos lon ngeröün kapasen ekis.
20 Ämi pwii kana, ousap wewe ngeni semirit lon ämi ekiek. Oupwe semirit lon föför mi ngau, nge oupwe mirit lon ämi ekiek. 21 Pun iei usun mine a mak lon ekewe Toropwe mi Pin,
“Üpwe kapas ngeni nei aramas
ren aramas mi fos lon kapasen ekis.
Üpwe kapas ngeniir ren awen chon ekis,
nge iei mwo nei aramas resap mochen aüselingaei.” ✡ Ais 28.11-12 22 Iei usun ewe lifangen ach fos lon kapasen ekis eu asisil fän iten chokewe resap lükü, sap fän iten chon lükü. Nge ewe lifangen afalafala än Kot kapas eu asisil fän iten ekewe chon lükü, sap fän iten chokewe resap lükü. 23 Iei mine are unusen ewe mwichefel a mwichfengen o ir meinisin repwe fos lon kapasen ekis, are ekoch chon lükün ika chon resap lükü repwe tolong remi, ifa usun, resap apasa pwe ämi oua umwes? 24 Nge are eman a afalafala än Kot kapas lupwen eman aramas esap lükü ika eman chon lükün epwe tolong remi, i epwe mefi an tipis ren met a rongorong. Epwe küna apwüng ren meinisin mine a rongorong, 25 ekiekin letipan mi monomon epwe pwäpwäla. Iwe, epwe chapetiu o fel ngeni Kot, epwe pwal pwärätä, “Enlet, Kot a nonom lefilemi!”
Kokoten lon mwichefel
14.26-40
26 Iwe, ämi pwii kana, iei met üpwe kapas usun. Lupwen oua mwichfengen pwe oupwe fel ngeni Kot, oupwe apasa en me mefian eman echö köl, eman eu afalafal, eman eu kapasen pwärätä seni Kot, pwal eman eu fos lon kapasen ekis, nge pwal eman eu kapasen aföüü met ätewe a apasa. Nge ekei alilis meinisin repwe fokun afefetai mwichefel. 27 Are eman epwe fos lon kapasen ekis, ruoman ika ülüman echök repwe fos, eman mürin eman, nge epwe pwal wor eman epwe aföüü met ra apasa. 28 Nge are esap wor eman a tongeni aföüü, ätewe mi fos lon kapasen ekis epwe fanafanala, epwe chök fos ngeni püsin i me Kot. 29 Ruoman ika ülüman chon afalafal ra tongeni kapas, nge ekewe ekoch repwe apwüngü mine ra afalafal won. 30 Are eman mi mot lon ewe mwich a angei eu kapasen pwärätä seni Kot, ewe eman mi kapas epwe köüla, nge ewe mi angei ewe kapasen pwärätä epwe kapas. 31 Ämi meinisin oua tongeni afalafala än Kot kapas, eman mürin pwal eman, pwe ekewe aramas meinisin repwe kaiö seni o ar souläng epwe pöchökül ren. 32 Iwe, ewe lifangen afalafala än Kot kapas epwe nonom fän nemenien ewe chon afalafal, 33 pun Kot esap mochen pwe epwe wor fitikoko, nge a mochen pwe epwe wor kinamwe.
Lon ekewe mwichefelin chon pin meinisin 34 ekewe fefin repwe fanafanala lon ekewe mwich. Esap mwümwütä ngeniir ar repwe kapas, usun mine a mak lon än ekewe chon Juta Allük pwe esap wor ar nemenem. 35 Are ra mochen silei och, repwe aisini pwülüer lon imwer. Pun a fokun asäw ngeni eman fefin an epwe kapas lon ekewe mwich lon imwenfel.
36 Ifa usun, än Kot kapas a pop senikemi? Ika ewe kapasen Kot a chök torikemi? 37 Are eman a ekieki pwe i eman nöün Kot chon afalafal, ika a wor ren eu lifang seni Ngünmifel, epwe mefi pwe mine üa mak ngenikemi, iei än Kot allük. 38 Nge ika esap afäli ekei kapas, ousap pwal afäli.
39 Iei mine ämi pwii kana, oupwe fokun achocho ngeni ämi oupwe afalafala än Kot kapas. Ousap pinei chokewe mi fos lon kapasen ekis, 40 nge mettoch meinisin epwe fis fän pwüng me kokotöch.