1 Lon eu rän Jonatan a üreni ewe alüal mi uwei an pisekin maun, “Etto, sipwe feila ren ewe mwichen sounfiun Filistia mi nom pekila.” Nge Jonatan esap üreni saman usun. 2 Saul a nom leamwüchülan ewe telinimw Kipea fän efoch apel lon Mikron. Nge ekewe sounfiu mi eti ina epwe ükükün wonopükü mwän. 3 Pwal Ahia nöün Ahitup we a nom ren, a üföüf echö üf itan efot. Ahia pwin Ikapot nöün Pineas we, nge Pineas nöün Eli, nöün ewe Samol mi Lapalap we souasor lon Silo. Iwe, ekewe aramas resap silei pwe Jonatan a la. 4 Nge lon ewe al mi chökis, ewe ia Jonatan a ekiekin feila ie ren ewe mwichen sounfiun Filistia, a wor ruu achau mi uluulukenitä me lepekin ewe al me ruepek. Iwe, iten ewe eu Poses, nge iten pwal ewe eu Sene. 5 Iwe, ewe eu achau mi uluulukenitä a nom efeng sap ngeni Mikmas, nge pwal ewe eu a nom ör sap ngeni Kepa.

6 Iwe, Jonatan a üreni ewe alüal mi uwei an pisekin maun, “Etto, sipwe feila pekila ren ewe mwichen sounfiu resap sirkomsais. Eli ewe Samol mi Lapalap epwe alisikich. Pun esap wor och a tongeni pinei än ewe Samol mi Lapalap alilis ren chomong ika chokükün.” 7 Iwe, nöün chon uwei pisekin maun a üreni, “Kopwe föri meinisin mine ka ekiekin föri. Ngang üpwe etuk, mine ka ekieki, pwal ina ai ekiek.” 8 Mürin, Jonatan a üreni, “Ina, sipwe feila pekila ren ekewe mwän o pwärikichela ngeniir. 9 Are repwe ürenikich pwe sipwe witiwit tori repwe feito rech, mürin sipwe chök üla lon leniach, nge sisap feitä rer. 10 Nge are repwe üra pwe sipwe feitä rer, mürin sipwe feitä, pun ewe Samol mi Lapalap a awinnakich pwe sipwe akufuur. Ei epwe eu asisil ngenikich.” 11 Iei mine ir me ruoman ra pwärirela ngeni ekewe sounfiun Filistia. Nge ekewe sounfiun Filistia ra apasa, “Nengeni, ekewe re Ipru ra towu seni ekewe pwang ia ra op ie.” 12 Mürin ra kökköla ren Jonatan me nöün we chon uwei pisekin maun o apasa, “Oupwe feito rem, äm aipwe apii ngenikemi och.” Nge Jonatan a üreni nöün we chon uwei pisekin maun, “Kopwe tapweto müri. Ewe Samol mi Lapalap a awinna chon Israel pwe repwe akufuur.” 13 Mürin, Jonatan a tötä won ewe chuk, nge nöün we chon uwei pisekin maun a tapwetä mürin. Iwe, Jonatan a akufu ekewe sounfiun Filistia, nge nöün chon uwei pisekin maun a nirela me mürin. 14 Lon ewe aeuin ninni Jonatan me nöün we chon uwei pisekin maun ra niela ina epwe ükükün rüe mwän me won eu leni ükükün esopun lainen eu eikerin fanü. 15 Mürin eu niuokus watte a tori ewe mwichen sounfiu, pwal tori ekewe aramas mi nom lemäl. Ewe mwichen sounfiu pwal ekewe aramas mi kütta liaper ra chechech fän ar niuokus. Iwe, ewe fanü a pwal chechech. Kot a tinato niuokus watte.

16 Iwe, nöün Saul chon mas mi nom Kipea lon ewe fanü Peniamin ra küna pwe chomong aramasen Filistia ra säfetal fän ar osukchöü. 17 Mürin, Saul a üreni ekewe aramas mi nom ren, “Oupwe aleani iteitemi o pii iö a towu senikich.” Iwe, lupwen ra aleani iteiter, a pwä pwe Jonatan me nöün chon uwou pisekin maun resap nom. 18 Iwe, Saul a üreni Ahia, “Kopwe uwato än Kot we pworofel ikei.” Pun lon ewe fansoun än Kot we pworofel a nom ren ekewe aramasen Israel. 19 Nge lupwen Saul a chüen kapas ngeni ewe souasor, ewe akürang lon ewe lenien sounfiun Filistia a lapala. Iwe, Saul a üreni ewe souasor, “Ina chök, esap wor fansoun ach sipwe angei öüröürach me ren Kot.” 20 Mürin, Saul me nöün kewe sounfiu meinisin ra chufengen o feila maun. Iwe, ra küna pwe iteiten eman me eman re Filistia a niela püsin chienan ren ketilas, nge ar fitikoko a fokun watte. 21 Ekoch re Ipru mi nom ren ekewe re Filistia me mwan o etiretä lon ewe lenien sounfiu ra kul o eti ekewe re Israel mi nom ren Saul me Jonatan. 22 Nge lupwen ekewe re Israel meinisin mi op won chukuchukutän ewe fanü Efraim ra rong pwe ekewe chon Filistia ra sü, pwal ir ra feito o choni chiener kewe le maun. Iwe, ewe maun a chöüla pekilan Pet-awen. 23 Iei usun ewe Samol mi Lapalap a angasa chon Israel lon ewe ränin.

24 Iwe, ekewe re Israel ra weires lon ewe ränin, pun Saul a eäni eu pwon fän akapel ngeni ekewe aramas o apasa, “Epwe anümamau ewe mwän mi mongö och me mwen lekuniol tori üpwe ngeni ekewe chon oputaei chappen ar föför.” Iei mine ekewe sounfiu resap neni och mongö. 25 Iwe, ekewe sounfiu meinisin ra tolong lon eu wöllap, nge a wor chönün chunen won ewe pwül. 26 Lupwen ra tolong lon ewe wöllap, ra küna pwe ewe chönün chunen a sup, nge esap wor eman a uwalong ekis lon awan, pun ra niuokusiti ewe pwon fän akapel. 27 Nge Jonatan esap rong mine saman we a allük fän akapel ngeni ekewe aramas. Iei mine a aitiela wokun mi nom lepöün, a chüralong ülülan lon ewe fasen chunen o ünümi chönün. Iwe, a mefi pöchökül ren. 28 Mürin, eman lein ekewe sounfiu a üreni, “Semom a fokun allük fän akapel ngenikem pwe eman mi mongö och ikenai epwe anümamau. Ina popun äm aia aiengauen echik.” 29 Mürin, Jonatan a üra, “Semei a aweiresi chon ei fanü. Nengeni, üa mefi pöchökül, pun üa neni ekis seni ei chönün chunen. 30 Epwe fen mürina, are ekewe aramas repwe mongö seni liaper mine ra angei seni chon oputer ikenai. Mürin epwe wor chomong chon Filistia mi ninnila.”

31 Lon ewe ränin ekewe re Israel ra akufu ekewe re Filistia seni Mikmas tori Aialon. Nge ekewe aramas ra fokun aiengauen echik. 32 Iei mine ra ürüng won liaper, ra angei sip me ätemwänin kow me nienifön kow o nirela lepwül. Mürin ra ochei ewe fituk fiti chan. 33 Iwe, mürin ra apworausa ngeni Saul, “Nengeni, ekewe aramas ra tipis ngeni ewe Samol mi Lapalap ren ar ochei fituk fiti cha.” Nge Saul a üra, “Ämi oua kirikiringau. Oupwe pünüoto rei eföü fau mi watte.” ✡ Ken 9.4; Lif 7.26-27; 17.10-14; 19.26; Tut 12.16,23; 15.23 34 Saul a pwal üra, “Oupwe fetalfeil lein ekewe aramas o üreniir, ‘Iteiten eman me eman mwän epwe uwato nöün ätemwänin kow ika nöün sip, epwe niela ikei o ochei. Ousap tipis ngeni ewe Samol mi Lapalap ren ämi ochei fituk fiti cha.’ ” Iei mine eman me eman lein ekewe aramas a uwato nöün ätemwänin kow lon ewe pwinin o niela ikenan. 35 Iwe, Saul a senätä eu rongen asor ngeni ewe Samol mi Lapalap. Iei aeuin rongen asor a senätä.

36 Mürin, Saul a apasa, “Ousipwe feitiu o tapweri ekewe chon Filistia lepwinei, sipwe liapeni seniir pisekir tori epwe ränila, nge sisap amanaua eman leir.” Iwe, ekewe aramas ra üra, “Kopwe föri mine a mürina me reöm.” Nge ewe souasor a apasa, “Ousipwe akom le mwir me won Kot.” 37 Iei mine Saul a aisini Kot, “Ifa usun, üpwe feitiu o maun ngeni ekewe chon Filistia? Ifa usun, kopwe awinna chon Israel?” Nge Kot esap pälüeni lon ewe ränin. 38 Mürin, Saul a üreni souemwenin ekewe aramas, “Oupwe etto ikei, ousipwe kütta iö a tipis ikenai. 39 Pun mwo manauen ewe Samol mi Lapalap mi amanaua Israel, are ewe mi tipis epwe fen Jonatan nei we mwän, epwe fokun mäla.” Nge esap wor eman lein ekewe mwän a pälüeni och. 40 Mürin, Saul a üreni ekewe chon Israel meinisin, “Ämi oupwe nom won epek, nge äm me Jonatan nei we mwän aipwe nom won epek.” Iwe, ekewe aramas ra üreni Saul, “Kopwe föri mine a mürina me reöm.” 41 Iei mine Saul a iotek ngeni ewe Samol mi Lapalap ewe Koten Israel, “Ai Samol mi Lapalap, pwota kosap pälüeniei ngang noum chon angang ikenai? Are ei tipis a nom woi ika won Jonatan nei we mwän, kopwe asisila ren ewe Urim. Nge are ei tipis a nom won noum aramasen Israel, kopwe asisila ren ewe Tumim.” Iwe, Jonatan me Saul ra sil, nge ekewe aramas ra ngasala. ✡ Num 27.21; 1.Sam 28.6 42 Mürin, Saul a üra, “Oupwe asisila lefilem me Jonatan nei we mwän.” Nge Jonatan a sil.

43 Mürin, Saul a üreni Jonatan, “Kopwe üreniei mine ka föri.” Iwe, Jonatan a üreni, “Üa neni ekis chönün chunen won ülülen ewe wok mi nom lepei. Ngang iei, üa molotä ngeni ai üpwe mäla.” 44 Nge Saul a apasa, “Kot epwe nieila, are en Jonatan kosap fokun ninnila.” 45 Mürin, ekewe aramas ra üreni Saul, “Ifa usun, Jonatan epwe mäla, ätewe mi awinna Israel ngeni eu win mi lapalap? Ese fokun tufich. Mwo manauen ewe Samol mi Lapalap, esap fokun morotiu emet meten möküran lepwül. Pun mine a föri ikenai, a föri ren än Kot alisi ngeni.” Iei usun ekewe aramas ra angasa Jonatan pwe esap mäla. 46 Mürin, Saul a ükütiu le maun ngeni ekewe chon Filistia. Nge ekewe chon Filistia ra liwiniti püsin lenier.

47 Iwe, mürin än Saul tolong lon wisan wisen king lon Israel, a maun ngeni chon oputan meinisin mi nom ünükün. A maun ngeni chon Moap, chon Amon me chon Etom, ngeni ekewe kingen Sopa pwal ngeni ekewe chon Filistia. Ekis meinisin ia a maun ie a win. 48 A fiu fän pwora o akufu chon Amalek. A angasa chon Israel seni ekewe sounfiu mi angei pisekir fän pöchökül.

49 Iwe, ikkei iten nöün Saul kewe mwän: Jonatan, Iswi me Malkisua. Nge nöün kewe ruoman fefin, iten ewe finichi Merap, nge iten ewe setiputur Mikal. 50 Iwe, iten pwülüen Saul Ahinoam nöün Ahimas we fefin. Nge ewe mi nemeni nöün mwichen sounfiu itan Apner nöün Ner we mwän, nge Ner pwin semen Saul. 51 Iwe, Kis semen Saul, nge Ner semen Apner. Nge Kis me Ner nöün Apiel.

52 Lon unusen ränin manauen Saul i a chök maun ngeni ekewe chon Filistia fän pöchökül. Iei mine, lupwen Saul a küna eman mwän mi waasöch ika eman mi pwora, a angei ngeni o atolonga lon an mwichen sounfiu.