1 Are eman leimi a wor an fitikoko ngeni eman chiechian souläng, pwota a tongeni uwala ren soukapwüng resap souläng, nge esap uwala ren ekewe chon pin? 2 Ousap silei pwe ekewe chon pin repwe apwüngü fanüfan? Nge are oupwe apwüngü fanüfan, ifa usun ousap tufich ngeni ämi oupwe apwüngü ekewe mettoch mi kisikis? 3 Ousap silei pwe kich sipwe apwüngü ekewe chon läng? Iwe, sipwe fokun apwüngü ekewe mettochun lon ei manau. 4 Are ekei sokun osukosuk a fis, pwota oupwe uweerela ren ekewe aramas esap wor wiser lon mwichefel? 5 Asäwemi! Ifa usun, esap wor eman mi tipachem me leimi epwe tongeni apwüngü fitikokon lefilen souläng? 6 Nge eman souläng a uwala lon kapwüng an fitikoko ngeni pwal eman chiechian souläng, pwe eman soukapwüng esap souläng epwe apwüngü.

7 Ämi uwala lon kapwüng fitikokon lefilemi a pwärätä pwe oua kuf lon ämi souläng. Ifa usun, esap fen öch än eman epwe föri mine a mwäl ngenikemi? Esap fen öch än eman epwe soläni pisekimi? 8 Nge fen püsin ämi oua föri mine a mwäl o soläni pisekin eman, ei mwo nge oua fen föri ngeni chiechiemi souläng. 9 Enlet, oua silei pwe ekewe chon föföringau resap mwüni Mwün Kot. Ousap püsin atupukemi! Chon föri föförün lisowu, ika chon angang ngeni anümwäl, ika chon lisowu ngeni mi pwüpwülü, ika chon amömö inisir, ika chon lisowufengen lefilen mwän me mwän ika fefin me fefin, 10 ika chon solä, ika chon tipemong, ika chon ünüpuch, ika chon aitengaua aramas, ika chon achomau resap mwüni mwün Kot. 11 Iwe, ekoch me leimi ra föri ekei sokun föför me lom. Nge oua fen küna limöch seni ämi tipis, oua küna pin, oua küna pwüng fän iten ach Samol Jesus Kraist, pwal ren ewe Ngünün ach Kot.

12 Ekoch repwe apasa, “A mwümwütä ngeniei ai üpwe föri mettoch meinisin.” Ewer, nge esap mettoch meinisin ra mürina ngonuk. Üa tongeni apasa, pwe a mwümwütä ngeniei ai üpwe föri mettoch meinisin, nge üsap mwütätä pwe och mettoch epwe nemeniei. ✡ 1.Kor 10.23 13 Ekoch repwe apasa, “Mongö a wor fänäsengesin lukach, nge lukach a wor fänäsengesin mongö.” Ewer, nge lon eu rän Kot epwe atala ir me ruu. Sisap aea inisich fänäsengesin föförün lisowu mi ngau, nge sipwe aea fänäsengesin ach angang ngeni ach Samol, iwe, ach Samol epwe tümwünü inisich. 14 Ren än Kot manaman a amanauasefäli ach Samol seni mäla, epwe pwal amanauasefälikich.

15 Ousap silei pwe inisimi eu kinikinin ewe inisin Kraist? Ifa usun, üpwe angei eu kinikinin inisin Kraist o föri pwe epwe eu kinikinin inisin eman fin lisowu? Apwi, esap fokun ina! 16 Ousap silei pwe eman mwän mi chufengen me eman fin lisowu a iniseu ren? Pun iei usun a mak lon ekewe Toropwe mi Pin, “Ekewe ruoman repwe wiliti eu chök inis.” ✡ Ken 2.24 17 Nge iö a chufengen me ach Samol a eufengen me i lon ngün. 18 Ousap fokun föri sokun föförün lisowu! Ekewe sokun tipis meinisin eman aramas a föri esap küü inisin, nge are eman aramas a föri föförün lisowu a tipis ngeni püsin inisin. 19 Ousap silei pwe inisimi eu imwenfelin Ngünmifel a nom lomi, ewe Ngün Kot a ngenikemi? Ousap püsin nemenikemi, pwe ämi nöün Kot, 20 i a mönikemi ren eu liwin, iei mine oupwe alinga Kot ren inisimi.