1 Iwe, mürin ekoch fansoun Tafit a maun ngeni ekewe chon Filistia, a akufuur o atolongeer fän nemenian. Iwe, a angei Kat me wisoposopun kewe seni fän nemenien ekewe chon Filistia. 2 Iwe, Tafit a pwal akufu chon Moap, pwe ekewe chon Moap ra nom fän nemenien Tafit o takises ngeni.

3 Tafit a pwal akufu Hatateser kingen Sopa mi kan ngeni Hamat, lupwen ätewe a feila, pwe epwe anüküchara an nemenem won ewe fanü arun ewe chanpupu Oifrat. 4 Tafit a liapeni seni Hatateser ükükün engeröü woken, fisungeröü chon wawa oris me rüengeröü sounfiu mi fetal. Iwe, Tafit a pökü selin pechen ekewe oris meinisin mi nukunuk woken, nge a likiti ekoch oris fän iten ükükün ipükü woken. 5 Nge lupwen ekewe sounfiun Siria seni Tamaskus ra feito pwe repwe alisi Hatateser ewe kingen Sopa, Tafit a maun ngeniir o niela ükükün rüe me ruungeröü me leir. 6 Mürin, Tafit a anomu mwichen sounfiu lon Siria, nge ekewe chon Siria ra nom fän nemenien Tafit o takises ngeni. Iwe, ewe Samol mi Lapalap a awinna Tafit ekis meinisin ia a feila ie. 7 Tafit a angei o uweela Jerusalem ekewe tittin maun seni kolt nöün Hatateser meilapen sounfiu ra uwei. 8 Iwe, Tafit a pwal angei chomong piras seni Tipat me Kun ekewe telinimwen Hatateser. Ren ei piras Salomon a föri ewe sepien koluk mi fokun watte, ekewe ür me ekewe sokopaten sepi seni piras fän iten ewe imwenfel. ✡ 1.King 7.40-47; 2.Kron 4.11-18

9 Iwe, lupwen Toi ewe kingen Hamat a rong pwe Tafit a akufu nöün Hatateser ewe kingen Sopa kewe mwichen sounfiu meinisin, 10 a tinala nöün we mwän Joram ren ewe king Tafit, pwe epwe uwei an kapong ngeni o eäni kapasen etiwetiw ngeni, pokiten an akufu Hatateser lon maun. Pun Hatateser a maun ngeni Toi fän chomong. Iwe, Joram a pwal uwala lifang ren Tafit sokopaten pisek seni kolt, silifer me piras. 11 Ekei pisek ewe king Tafit a apini fän iten ewe Samol mi Lapalap o achu ngeni ewe silifer me kolt, a fen liapeni seni ekewe mwü meinisin, seni Etom, Moap, pwal seni ekewe chon Amon, ekewe chon Filistia me Amalek.

12 Iwe, Apisai nöün Seruia we mwän a niela engol me walungeröü chon Etom me lon ewe Lemolun Salt. ✡ Kölf 60 13 Tafit a anomu mwichen sounfiu lon Etom, nge chon Etom meinisin ra nom fän nemenien Tafit. Iwe, ewe Samol mi Lapalap a awinna Tafit ekis meinisin ia a feila ie.

14 Iwe, Tafit a nemeni unusen Israel o föri mine a öch o pwüng ngeni nöün aramas meinisin. 15 Joap nöün Seruia we mwän i meilapen ewe mwichen sounfiu, nge Jehosafat nöün Ahilut we mwän a soumak. 16 Satok nöün Ahitup we mwän me Ahimelek nöün Apiatar we mwän ra souasor, nge Seraia a seketeri. 17 Iwe, Penaia nöün Jehoiata we mwän i meilapen ekewe chon Cheret me chon Pelet, ir chon tümwünü ewe king, nge nöün Tafit kewe mwän ir meilapen chon angang ngeni ewe king.