1 Iwe, Rupen nöün Jakop we mwänichi. (I a uputiu akom, nge pokiten an kon ren ülüpwülüen saman, ewe wisen mwänichi a tori nöün Josef kewe mwän, nge Josef nöün Jakop we mwän. Iei mine esap makelong lon ewe uruwo lon tettelin mwänichi. ✡ Ken 35.22; 49.3-4 2 Iei mwo än Juta pöchökül me lein pwin kewe, pwal eman samol a pop seni, nge ewe wisen mwänichi a küw Josef.) ✡ Ken 49.8-10 3 Iwe, nöün Rupen kewe mwän, nöün Jakop we mwänichi: Hanok, Palu, Hesron me Karmi. 4 Ikkei ir ekewe mwirimwirin Joel: Nöün Joel Semaia, nöün Semaia Kok, nöün Kok Simei, 5 nöün Simei Mika, nöün Mika Reaia, nöün Reaia Paal, 6 nge nöün Paal Pera. Ätei Tiklat-pileser ewe kingen Asiria a liapeni o uweala. Pera eman än chon ewe ainangen Rupen samol. ✡ 2.King 15.29 7 Iwe, ikkei ir märärin Pera kewe lon famili me famili, lupwen ra makelong lon tettelin uruwor: Jeiel ewe samol, Sakaria, 8 me Pela nöün Asas we mwän, Asas nöün Sema, nge Sema nöün Joel. Ätekei ra nonom lon ewe fanü seni Aroer tori Nepo me Paal-meon. 9 Ra pwal nonom ötiuen ewe fanü tori ewe fanüapö mi chöüla ngeni ewe chanpupu Oifrat, pun nöür pwiin man ra chomongola lon ewe fanü Kiliat. 10 Lupwen fansoun mwün ewe king Saul, chon ewe ainangen Rupen ra maun ngeni ekewe mwirimwirin Hakri o nirela. Iwe, ra nom lon imwer o fanüeni unusen ewe fanü ötiuen Kiliat.

11 Iwe, chon ewe ainangen Kat ra nonom peliefengin fanüen chon ewe ainangen Rupen me lon ewe fanü Pasan atowura ngeni Saleka: 12 Joel ewe samol, Safam ewe kisin fan, pwal Janai me Safat mi nom lon Pasan. 13 Nge ikkei ir märärir kewe lon tettelin ar kewe fisu cho: Mikael, Mesulam, Sepa, Jorai, Jakan, Sia me Eper. 14 Ir ekewe mwirimwirin Apihail nöün Huri we mwän: Huri nöün Jaroa, Jaroa nöün Kiliat, Kiliat nöün Mikael, Mikael nöün Jesisai, Jesisai nöün Jato, nge Jato nöün Pus. 15 Iwe, Ahi nöün Aptiel we mwän, nge Aptiel nöün Kuni, i mwänirelan än saman we cho. 16 Ra nonom lon Kiliat, lon Pasan me wisoposopun kewe, pwal lon ekewe maasies meinisin me lon ewe fanü Saron tori kiännir. 17 Iwe, ekei aramas meinisin ra makelong lon tettelin uruwor lon fansoun mwün Jotam ewe kingen Juta, pwal lon fansoun mwün Jeropoam ewe kingen Israel.

18 Iwe, chon ekewe ainangen Rupen, Kat me esopun ewe ainangen Manasa a wor nöür mwän mi pwora o sip le maun, ra uwou tittin maun me ketilas me esefich, iteiter faik me rüanüngeröü füpükü wone sounfiu mi molotä ngeni maun. 19 Ra maun ngeni chon ekewe ainangen Hakri, Jetur, Nafis me Notap. 20 Iwe, ra anomu ar apilükülük won Kot o siö ngeni pwe epwe alisiir le maun. Iei mine Kot a aüselinga ar tüngor, pwe ra tongeni akufu chon ewe ainangen Hakri me pelier meinisin. 21 Iwe, ra liapeni seniir limengeröü kamel, rüepükü limengeröü sip me rüengeröü aas, pwal ipüküngeröü aramas. 22 Nge ra pwal niela chomong aramas, pun Kot a alisiir lon ewe maun. Iwe, ra nonom lon fanüer tori ra oola.

23 Iwe, chon ewe esopun ainangen Manasa ra fokun chomong. Ra nom lon ewe fanü seni Pasan tori Pal-hermon, Senir me ewe chuk Hermon. 24 Ikkei ir ekewe mwänirelan ar kewe cho: Efer, Isi, Eliel, Asriel, Jeremaia, Hotawia me Jatiel. Ir meinisin sounfiu mi pwora o mwän mi iteföüla lon ar kewe cho. 25 Nge ir ra tipis ngeni än semelaper we Kot, ra kul seni ren ar kirikiringau ngeni o fel ngeni pwal ekoch kot än chon ekewe mwü, Kot a fen aroserela me mwer. 26 Iei mine ewe Koten Israel a föri pwe Pul ewe kingen Asiria mi pwal iteni Tiklat-pilneser epwe liapeni fanüer. Iwe, a uweala chon ekewe ainangen Rupen, Kat me esopun ewe ainangen Manasa o anomuur lon Hala, Hapor, Hara me arun ewe chanpupu Kosan. Iwe, ra nonom ikenan tori ikenai. ✡ 2.King 15.19; 2.King 15.29; 2.King 17.6