Nöün Paulus Toropwe ngeni
Titus
Kapas akom
I. Chon makkei ei toropwe: Ewe soukünö Paulus.
II. A mak ngeni iö: Ngeni Titus, ewe chon angang ngeni Kot.
III. Itelapemongen ei toropwe: Kapasen öüröür me kapasen fön usun än Titus epwe föri än Kot angang.
IV. Kapas aüchean ei toropwe: Sisap küna manau ren ach föföröch, nge sia küna manau, pwe sipwe föri föför mi öch.
V. Masouen ei toropwe: Titus, eman chon lükün Israel a soulängila, nge mürin a chieneni Paulus o alisi i lon an föri angangen missionari. Paulus a makkei ei toropwe ngeni ei alüal Titus nöün we chon alilis, i a likitätiu lon Kreta, pwe epwe tümwünü angangen lon ewe mwichefel. Ei toropwe a kapas usun ülüngat sokun ekiek mi aüchea:
Aeuin, Paulus a achema ngeni Titus met sokun manau eman chon emweni mwichefel epwe manaueni. Ei a aüchea, pokiten manauen chomong chon Kreta a ngau. Aruuan, Paulus a öüröüra Titus usun an epwe asukula ekewe sokopaten mwichen aramas lon mwichefel, ekewe chinlap mwän me chinlap fefin, (ir chokewe repwe asukula ekewe föpwül me mürin) pwal usun an epwe asukula ekewe alüal me ekewe amanau. Sopolan Paulus a öüröüra ngeni Titus usun ewe manauen souläng, akaeuin usun ar repwe kinamwefengen me kirikiröchfengen, nge resap koputfengen, aninifengen me kinikinfesen lon mwichefel.
VI. Tettelin masouen ei toropwe:
Kapas akom 1.1-4
Usun ekewe nöüwisen mwichefel 1.5-16
Wisen ekewe sokopaten mwichen aramas lon mwichefel 2.1-15
Kapasen pesepes me kapasen fön 3.1-11
Kapasen lesopolan 3.12-15
1
Kapong
1.1-4
1 Kapong seni ngang Paulus, eman nöün Kot chon angang me eman nöün Jesus Kraist soukünö.
Kot a filiei o tinieila, pwe üpwe alisi nöün Kot kewe mi fil lon ar lükülük o emweniir ngeni ar repwe silei ewe let sia kaiö seni ach lamalam. 2 Iei ewe let mi longolong won ach apilükülük ngeni ewe manau esemüch. Kot, ewe esap chofona, a pwon ngenikich ei manau me mwen fansoun esepop, 3 nge lon fansoun mi fich a pwärala ewe let lon an kapas. Kot, ach Chon Amanau, a lükü ngeniei ei kapas, pwe üpwe arongafeili ren an we allük ngeniei. 4 Üa makkei ei toropwe ngonuk, Titus, en wesewesen nei lon ewe lükülük sia eänifengeni. Samach Kot me Kraist Jesus ach Chon Amanau epwe ngonuk ümöümöch me kinamwe. ✡ 2.Kor 8.23; Kal 2.3; 2.Tim 4.10
Än Titus angang lon Kreta
1.5-16
5 Üa likituketiu lon Kreta, pwe kopwe akota ekewe mettoch resamwo kotöch, kopwe pwal filätä souakom lon iteiten ekewe mwichefel. Kopwe chechemeni ai kewe kapasen öüröür ngonuk: 6 Eman souakom epwe fokun unusöch lon manauan, epwe pwülüeni eman chök fefin, nge nöün kana repwe souläng, pwe esap wor eman epwe tip ngeniir pwe ra föföringau ika lükümach. 7 Pokiten eman soumas epwe tümwünü än Kot angang, i epwe eman mi unusöch lon manauan, esap eman mi lamalamtekia are songokai, are eman mi ünüpuch, are rochongau are tipemong won moni. 8 Epwe etiwöchü wasöla, epwe pwapwaiti le föri mine a mürina, epwe tufichin nemeni püsin inisin, epwe föri mine a pwüng, epwe apini manauan o eäni mirit lon manauan. 9 Epwe fokun kamwöchünük won ewe Kapasen Kot mi allükülük usun a kaiö ngeni, pwe epwe tongeni apöchöküla ekewe souläng ren an afalafala ewe kapas mi let usun ach lükülük, epwe pwal tongeni pölüeni chokewe mi ü ngeni. ✡ 1.Tim 3.2-7
10 Pun mi wor chomong aramas mi lükümach, ar kapas a lomotongau, ra atupu aramas, akaeuin ir seni ewe mwichen chon Juta mi soulängila. 11 Kopwe fokun aükätiu ar kapas, pun ra afitikokoi ekoch chon ekewe famili ren ar afalafala mine esap pwüng. Ra föri ei fän iten eu popun mi asäw, pun ra mochen angei moni. 12 Eman me lein nöür kewe soufos seni Kreta a apasa, “Chon Kreta ra kapas chofona fansoun meinisin, ra usun chök manmwacho mi ngau me chon mongömong mi chipwang.” 13 Ekei kapas ra let. Iei mine kopwe fokun apwüngüür, pwe epwe pwüng ar lükülük, 14 nge resap chüen aüseling ngeni än ekewe chon Juta tutulap, pwal ngeni ekewe allük mi pop seni ekewe aramas mi likitala ewe let. 15 Mettoch meinisin ra limöch ngeni chokewe mi limöch manauer, nge esap wor och a limöch ngeni chokewe mi limengau manauer, ir chokewe mi lükümang, pun ar ekiek me mwelien letiper a fen limengau. 16 Ra apasa pwe ra silei Kot, nge ar föför a pwärätä pwe resap silei i. Ra anioput me ren Kot, ra lükümach, resap tongeni ar repwe föri och mi mürina.