11
Än Kot ümöümöch ngeni chon Israel
11.1-12
1 Iwe, üa ais: Ifa usun, Kot a pöütala nöün kewe aramas? Apwi, esap fokun ina! Püsin ngang eman chon Israel, eman mwirimwirin Apraham, eman chon ewe ainangen Peniamin. ✡ Filip 3.5 2 Kot esap pöütala nöün aramas i a fen filiiretä seni lepopun. Oua silei mine a mak lon ekewe Toropwe mi Pin usun pworausen än Elias tüngormau ngeni Kot o tip ngeni chon Israel, 3 “Ai Samol, ra niela noumw kewe soufos o ataetiu om kewe rongen asor. Ngang chök üa chüen manau. Nge ra pwal ekiekin nieila.” ✡ 1.King 19.10,14 4 Met Kot a eäni pölüen ngeni Elias? “Üa aimwüela fän itei fisungeröü aramas me lon Israel, ir chokewe resap fel ngeni ewe anü Paal.” ✡ 1.King 19.18 5 Iei usun mine a pwal fis ikenai. Mi wor eu kükün mwichen aramas, ir chokewe Kot a filiiretä pokiten an ümöümöch. 6 An afiliiretä a longolong won an ümöümöch, nge sap won mine ra föri. Pun are an fil a longolong won met aramas ra föri, mürin an ümöümöch esap chüen enletin ümöümöch.
7 Iwe, met? Ekewe aramasen Israel resap küna mine ra kütta. Eu chök kükün mwich Kot a filiiretä ra küna. Nge ekewe ekoch Kot a föri pwe resap tongeni rongorong ngeni an kö. 8 Usun a mak lon ekewe Toropwe mi Pin, “Kot a föri pwe resap tongeni mefi ika weweiti och. Tori ikenai resap tongeni küna ika rongorong.” ✡ Tut 29.4; Ais 29.10 9 Tafit a pwal apasa,
“Amwo ar kewe kametip repwe wiliti eu sär
me eu likatuputup fän iter.
10 Amwo meser kewe repwe chunula,
pwe resap tongeni küna mwer.
Kopwe pwal föri pwe sökürür epwe pwor
ren ar riaföü fansoun meinisin.” ✡ Kölf 69.22-23 11 Üa pwal ais: Lupwen ekewe chon Juta ra chepetek, ra turula o unusen feiengau? Apwi, esap ina! Pokiten ra tipis, manau esemüch a tori ekewe chon lükün Israel, pwe ekewe chon Juta repwe lolloletä rer. 12 Än ekewe chon Juta tipis a atoto watten feiöch ngeni chon fanüfan, nge ar wöüngau lon ngünür a atoto watten feiöch ngeni ekewe chon lükün Israel. Epwe ifan me watten ewe feiöch lupwen unusen chon Juta meinisin repwe kapachelong!
Än Kot amanaua ekewe chon lükün Israel
11.13-24
13 Iwe, iei üpwe kapas ngenikemi chon lükün Israel: Lupwen fansoun üa eman soukünö ngeni ekewe chon lükün Israel, ngang üpwe alapala ai angang. 14 Eli üpwe tongeni föri, pwe püsin aramasei repwe lolloletä, pwe lupwen üpwe angang ngeniir, Kot epwe amanaua ekoch me leir. 15 Pun lupwen Kot a pöütiirela, chon fanüfan ra chä ngeni Kot. Iwe, met epwe fis lupwen Kot epwe etiweer? Epwe fis manau seni mäla. 16 Are a pin och kinikinin pilawa eman a eäni asor ngeni Kot, unusen ewe pilawa a pwal pin. Nge are eman a eäni asor waren efoch irä ngeni Kot, palan kana ra pwal pin. 17 Ekoch palen ewe irä olif eman a tümwünü ra kuputiu, nge palen ewe irä olif mi chök püsin pwükütä lein pötöwöl a kapachelong lepökün. Ämi chon lükün Israel, oua wewe ngeni ewe irä olif mi pwükütä me lein pötöwöl, nge iei oua angei watten feiöch seni ekewe chon Juta, usun chök ewe palen irä olif mi pwükütä lein pötöwöl a angei feiöch seni chönün ewe irä olif eman a tümwünü. 18 Iei mine ousap turunufasei chokewe mi usun chök ekewe palen irä mi kuputiu. Pwota oupwe lamalamtekia? Ämi oua usun chök efoch palen irä. Ämi oua manau seni waren ewe irä, nge waren ewe irä resap manau senikemi. 19 Nge eli oupwe apasa, “Ewer, nge ekewe palan ra kuputiu, pwe epwe wor leniem.” 20 Mi pwüng. Ra kuputiu pokiten resap lükü, nge ämi oua nomotiu lon lenier pokiten oua lükü. Iwe, ousap lamalamtekia usun ei, nge oupwe niuokus. 21 Pun Kot esap achika ekewe chon Juta, ir wesewesen palen ewe irä, ifa usun, oua ekieki pwe epwe achikakemi? 22 Iei mine oupwe ekieki usun än Kot kirikiröch me an pöchökül. A fokun pöchökül ngeni chokewe mi turutiu, nge a kirikiröch ngeni ämi. Are oua sopwela le föri mine a mürina, epwe sopwela le kirikiröch ngenikemi, nge are ousap föri iei usun, pwal ämi oupwe kuputiu. 23 Iwe, are ekewe chon Juta repwe likitala ar lükümang, repwe liwinsefälilong lon lenier me mwan, pun Kot a tongeni aliwinisefäliir. 24 Ämi chon lükün Israel, oua wewe ngeni efoch palen ewe irä olif mi püsin pwükütä lein pötöwöl a kuputiu o kapach ngeni efoch irä olif eman a tümwünü, nge esap iei pwüngün ei sokun angang. Ekewe chon Juta ra usun chök ewe irä olif eman a tümwünü. Iwe, epwe fokun mecheres ngeni Kot an epwe apachasefälielong ekewe palen irä mi kuputiu lon lenier me mwan.
Än Kot ümöümöch ngeni aramas meinisin
11.25-32
25 Ämi pwii kana, mi wor eu monomon mi enlet üa mochen pwe ämi oupwe silei, pwe ousap ekieki püsin ämi tipachem. Iei ewe monomon: Än chon Israel ülöförea lon letiper esap soposopola, nge epwe chök müchüla lupwen epwe unus iteiten chon lükün Israel repwe feito ren Kot. 26 Iwe, iei usun chon Israel meinisin repwe küna manau, usun a mak lon ekewe Toropwe mi Pin,
“Ewe chon Amanau epwe feito seni Sion
o angei seni ekewe mwirimwirin Jakop ar föföringau meinisin. ✡ Ais 59.20
27 Üpwe föri ei pwon ngeniir,
lupwen üpwe angei seniir ar kewe tipis.” ✡ Jer 31.33-34 28 Iwe, pokiten ekewe chon Juta resap etiwa ewe Pworausen Manau, ir chon oput Kot fänäsengesin ämi chon lükün Israel. Nge pokiten Kot a filiiretä, ir ra chen me ren fänäsengesin ar kewe lewo. 29 Pun Kot esap akasiwili ekiekin letipan ren iö a filätä o afeiöchü. 30 Iwe, ämi chon lükün Israel oua aleasolap ngeni Kot me lom. Nge iei oua angei än Kot ümöümöch pokiten än ekewe chon Juta aleasolap. 31 Pwal ina chök usun, ekewe chon Juta ra aleasolap ngeni Kot iei, pwal ir repwe angei än Kot ümöümöch iei, pun Kot a pwal ümöümöch ngenikemi. 32 Pun Kot a föri pwe aramas meinisin repwe fötek fän nemenien aleasolap, pwe epwe pwärala an ümöümöch ngeniir meinisin.
Sipwe mwareiti Kot
11.33-36
33 A ifan me watten wöün Kot! A ifan me alololun an tipachem me silelap! Iö a tongeni awewei an apwüng? Iö a tongeni weweiti an kewe föför? ✡ Ais 55.8 34 Usun a mak lon ekewe Toropwe mi Pin,
“Iö a silei ekiekin ewe Samol?
Iö a tongeni öüröüra? ✡ Ais 40.13
35 Iö a ngeni och mettoch,
pwe epwe wisen aliwinisefäli?” ✡ Hiop 41.11 36 Pun Kot a föri mettoch meinisin, mettoch meinisin ra manau ren o nom fänäsengesin. Kot epwe ling tori feilfeilachök! Amen. ✡ 1.Kor 8.6