1 Mürin, Josua a körifengeni chon ekewe ainangen Rupen me Kat pwal esopun ewe ainangen Manasa. 2 Iwe, a üreniir, “Ämi oua tümwünü meinisin mine Moses nöün ewe Samol mi Lapalap we chon angang a allük ngenikemi, oua pwal aleasochisi aloi lon meinisin mine üa allük ngenikemi. ✡ Num 32.20-32; Jos 1.12-15 3 Seni ekewe fansoun ra la tori ikenai ousap likitala pwimi kewe. Oua pwal fokun aleasochisi ekewe allük än ewe Samol mi Lapalap ämi we Kot. 4 Iwe, iei ewe Samol mi Lapalap ämi we Kot a fang kinamwe ngeni pwimi kewe, usun a fen pwon ngeniir. Iei mine oupwe liwiniti leniemi lon fanüemi, ewe fanü Moses nöün ewe Samol mi Lapalap we chon angang a ngenikemi me ötiuen ewe chanpupu Jortan. 5 Oupwe fokun aleasochisi ekewe allük me pwüüng Moses nöün ewe Samol mi Lapalap we chon angang a allük ngenikemi: Oupwe echeni ewe Samol mi Lapalap ämi we Kot, oupwe föri letipan o aleasochis ngeni an kewe allük, oupwe pwal fitipacheiti o angang ngeni ren unusen lelukemi me unusen ngünümi.” 6 Iwe, Josua a afeiöchüür o tinirela. Nge ir ra liwiniti lenier.

7 Moses a fen ngeni ewe esopun ainangen Manasa fanüer me lon Pasan. Nge Josua a ngeni pwal ewe esopun ainangen Manasa fanüer me ünükün fanüen pwir me lon ewe fanü lotoun ewe chanpupu Jortan. Iwe, lupwen Josua a tinirela ngeni lenier o afeiöchüür, 8 a üreniir, “Oupwe liwiniti leniemi fän pisekisek, fän nöümi man mi chomong, fän silifer, kolt, piras me mächä, pwal fän üf mi chomong. Oupwe aineti ngeni pwimi kewe liapemi seni chon oputakemi.” 9 Mürin, chon ekewe ainangen Rupen me Kat pwal ewe esopun ainangen Manasa ra imwüfesen me ekewe aramasen Israel me lon Silo lon ewe fanü Kanaan o liwiniti lenier lon ewe fanü Kiliat. Pun iei wesewesen fanüer ra fanüeni fän än ewe Samol mi Lapalap allük ngeni Moses.

10 Iwe, lupwen chon ekewe ainangen Rupen me Kat pwal ewe esopun ainangen Manasa ra tori Kelilot aropen ewe chanpupu Jortan me lon ewe fanü Kanaan, ra senätä eu rongen asor mi fokun watte ikenan. 11 Iwe, ekewe aramasen Israel ra rong pwe chon ekewe ainangen Rupen me Kat pwal ewe esopun ainangen Manasa ra senätä eu rongen asor lekiännin ewe fanü Kanaan lon Kelilot arun ewe chanpupu Jortan won ewe pekin fanüen aramasen Israel. 12 Nge lupwen ekewe aramasen Israel ra rong ei pworaus, unusen ar mwich a chufengen lon Silo pwe repwe maun ngeniir.

13 Mürin, ekewe aramasen Israel ra tinala Pineas nöün ewe souasor Eleasar we mwän ren chon ekewe ainangen Rupen me Kat pwal ren ewe esopun ainangen Manasa lon ewe fanü Kiliat. 14 Nge engol samol ra eti Pineas, akaeman seni eu me eu ainangen Israel, pwal ir souemwenin ekewe famili lon ekewe eterekesin Israel. 15 Iwe, ra tori chon ekewe ainangen Rupen me Kat pwal ewe esopun ainangen Manasa me lon Kiliat o üreniir, 16 “Iei alon unusen än ewe Samol mi Lapalap we mwich: Pwota oua kirikiringau ngeni ewe Koten Israel? Pwota oua tok seni ewe Samol mi Lapalap o senätä eu rongen asor fän itemi ikenai lon ämi ü ngeni ewe Samol mi Lapalap? ✡ Tut 12.13-14 17 Ifa usun, sisap mwo ker ren ewe tipis a fis me lon Peor, ewe tipis sisamwo limöch seni tori ikenai? Ifa usun, än ewe Samol mi Lapalap mwichen aramas esap fen feiengau ren mätter pokiten ewe tipis? ✡ Num 25.1-9 18 Ifa usun, oupwe le tok seni ewe Samol mi Lapalap ikenai? Nge are ämi oua ü ngeni ewe Samol mi Lapalap ikenai, i epwe song ngeni unusen ewe mwichen aramasen Israel lesor. 19 Nge are fanüemi esap öch ngeni ämi oupwe fel lon, oupwe feito pekito lon fanüen ewe Samol mi Lapalap, ewe ia an imwenfel seni mangaku a nom ie. Oupwe angei eu fanü fän itemi me lon fanüem. Nge ousap chök ü ngeni ewe Samol mi Lapalap, ousap pwal atolongakem le ü ngeni ren ämi senätä fän itemi eu rongen asor lükün ewe rongen asor än ewe Samol mi Lapalap ach we Kot. 20 Oupwe chechemeni, pwe lupwen Akan nöün Sera we mwän a aleasolap ngeni ewe allük ren an angei ekewe mettoch mi pin repwe kata, än Kot song a tori unusen ewe mwichen Israel. Sap Akan chök a mäla fän iten an tipis.” ✡ Jos 7.1-26

21 Mürin, chon ekewe ainangen Rupen me Kat pwal ewe esopun ainangen Manasa ra üreni ekewe souemwenin ekewe famili lon Israel, 22 “Kot i ewe Samol mi Lapalap, ewe mi Manaman! Kot i ewe Samol mi Lapalap, ewe mi Manaman, a silei met popun äm föri ei föför, nge Israel epwe pwal silei. Are äm aia föri ei föför ren äm ü ngeni ewe Samol mi Lapalap ika ren äm aleasolap ngeni, ousap amanauakem ikenai. 23 Nge are aia senätä eu rongen asor pwe aipwe tok seni ewe Samol mi Lapalap, ika aia eäni asoren kek ika asoren mongö ika asoren kinamwe won, ewe Samol mi Lapalap epwe ngenikem liwinin äm tipis. 24 Nge wesewesen popun äm aia föri ei, seni äm niuokus, pwe lon ekan fansoun mwach mwirimwirimi repwe üreni mwirimwirim, ‘Ifa lefilemi me ewe Samol mi Lapalap ewe Koten Israel? 25 Pun ewe Samol mi Lapalap a föri pwe ewe chanpupu Jortan kiän lefilem me ämi chon ekewe ainangen Rupen me Kat. Esap wor wisemi me won ewe Samol mi Lapalap.’ Ren ei mwirimwirimi repwe aükätiu mwirimwirim le fel ngeni ewe Samol mi Lapalap. 26 Iei mine aia kapasfengen, ‘Ousipwe senätä eu rongen asor iei, sap fän iten asoren kek ika sokun asor. 27 Nge ei rongen asor epwe eu pisekin pwärätä lefilach pwal lefilen mwirimwirich, pwe äm aia wesewesen fel ngeni ewe Samol mi Lapalap lon imwan mi pin ren äm asoren kek me sokun asor, pwal asoren kinamwe, nge mwirimwirimi resap tongeni apasa ngeni mwirimwirim lon ekan fansoun mwach, pwe esap wor wiser me won ewe Samol mi Lapalap.’ 28 Iwe, äm aia ekieki, are epwe iei alor ngenikem ika ngeni mwirimwirim lon ekan fansoun mwach, äm aipwe üreniir, ‘Oupwe nenengeni liosun än ewe Samol mi Lapalap rongen asor äm kewe lewo ra föri. Sap fän iten asoren kek ika sokun asor, ngei eu pisekin pwärätä lefilach me ämi’ 29 Äm aisap fokun ekieki ei sokun, pwe aipwe ü ngeni ewe Samol mi Lapalap o tok seni ikenai ren äm senätä eu rongen asor fän iten asoren kek, asoren mongö me sokun asor lükün än ewe Samol mi Lapalap äm we Kot rongen asor mi nom mwen imwan imwenfel.”

30 Iwe, lupwen ewe souasor Pineas me ekewe samolun ewe mwichen aramas, ir souemwenin ekewe familien chon Israel mi eti, ra rong alon chon ekewe ainangen Rupen, Kat me Manasa, ra pwapwa ren. 31 Nge Pineas nöün ewe souasor Eleasar we mwän a üreniir, “Ikenai sia silei pwe ewe Samol mi Lapalap a nom lefilach, pun ämi ousap ü ngeni ewe Samol mi Lapalap. Ren ei oua amanaua ekewe aramasen Israel seni än ewe Samol mi Lapalap apwüng.”

32 Mürin, Pineas nöün ewe souasor Eleasar we mwän me ekewe samol ra liwin seni chon ekewe ainangen Rupen me Kat me lon ewe fanü Kiliat o liwinla ngeni ewe fanü Kanaan ren ekewe aramasen Israel. Iwe, ra uwei ngeniir ei pworaus. 33 Iwe, ei pworaus a apwapwai ekewe aramasen Israel. Ra mwareiti Kot, nge resap chüen kapas usun ar repwe maun ngeni chon ekewe ainangen Rupen me Kat o atai fanüer ia ra nom ie. 34 Nge chon ekewe ainangen Rupen me Kat ra aita ngeni ewe rongen asor “Pisekin Pwärätä”, pun ra apasa, “Iei eu pisekin pwärätä lefilach pwe ewe Samol mi Lapalap i Kot.”