1 Iwe, eman a apworausa ngeni Joap pwe ewe king a kechü o ngüngüres fän iten Apsalom. 2 Iei mine ewe pwapwan win a wiliti letipeta lon ewe rän fän iten nöün Tafit kewe sounfiu meinisin, pun ra rong pwe ewe king a ngüngüres pokiten nöün we mwän. 3 Lon ewe ränin ekewe aramas ra änifelong lon ewe telinimw, usun sounfiu ra änifelong ren ar säw, lupwen ra kuf lon maun. 4 Iwe, ewe king a pwölüela mesan o leüömong le kechü, “Wo ko nei mwän Apsalom, Apsalom nei mwän, nei mwän.” 5 Mürin, Joap a tolong lon imwen ewe king o üreni, “Ikenai ka asäwa noum kewe aramas meinisin mi amanauok, mi amanaua noum kewe mwän me fefin, pwal pwülüom kewe me ülüpwülüom kewe. 6 Ka echeni chokewe mi oput en, nge ka oput chokewe mi echenuk. Pun ikenai ka afata ngenikem pwe esor aüchean noum kewe chon nemenem me noum kewe aramas me reöm. Ikenai üa mefi pwe are Apsalom epwe manau, nge äm meinisin aipwe mäla, kopwe pwapwa ren. 7 Iei mine kopwe towu o chärisefäli noum kewe aramas. Pun üa eäni pwon fän akapel iten ewe Samol mi Lapalap, pwe are kosap feila, esap wor eman me lein ekewe mwän epwe nom reöm lepwinei. Ei epwe kon ngau ngonuk lap seni ekewe feiengau meinisin ra toruk seni om alüal tori ikenai.” 8 Mürin, ewe king a feila o mot leasamalapen tittin ewe telinimw. Lupwen ei pworaus a tori ekewe sounfiu meinisin, pwe ewe king a mot leasamalapen tittin ewe telinimw, ir meinisin ra feito ren.

Iwe, chon Israel ra fen süla lon en me lenian. 9 Mürin, chon ekewe ainangen Israel meinisin ra aninifengen lefiler o apasa, “Ewe king a angasakich seni ekewe chon oputakich o amanauakich seni ekewe chon Filistia. Nge iei a süla seni ei fanü pokiten Apsalom. 10 Nge Apsalom, ätewe sa epiti pwe ach king, a mäla lon maun. Iei mine pwota ousap apasa pwe ewe king epwe liwinsefälito?”

11 Iwe, lupwen ewe king Tafit a rongorong usun än ekewe aramasen Israel kapas, a tinala pworaus ren ekewe souasor Satok me Apiatar o apasa pwe repwe üreni ekewe souakomwen Juta, “Pwota ämi oupwe kukumwir le aliwinisefäliei ngeni imwei? 12 Ämi märäri pwal ämi chai me fitukei. Pwota chök ämi oupwe kukumwir le aliwinisefäliei?” 13 Repwe pwal üreni Amasa, “Ifa usun, sap en chai me fitukei? Kot epwe nieila, are kosap tolong lon lenien Joap le meilapeni ai mwichen sounfiu seni ikenai.” 14 Ren ei kapas Tafit a liapeni leluken ekewe re Juta meinisin pwe ra fokun tipeeu. Iwe, ra tinala pworaus ren ewe king o apasa, “Kopwe liwinto, ämi me noum kewe aramas meinisin.” 15 Iei mine ewe king a liwinto ren ewe chanpupu Jortan. Nge chon Juta ra feila Kilkal, pwe repwe souni ewe king o emwenala pekilan ewe chanpupu Jortan.

16 Iwe, Simei nöün Kera we mwän ewe re Peniamin seni Pahurim a müttir chu ngeni ekewe re Juta le feito pwe epwe souni Tafit. ✡ 2.Sam 16.5-13 17 Iwe, engeröü mwän seni ewe ainangen Peniamin ra eti Simei. Sipa ewe chon angang lon imwen Saul me nöün kewe engol me limman mwän me rüe nöün chon angang ra pwal müttirila ren ewe chanpupu Jortan me mwen än ewe king epwe war. 18 Ra feila won petepeeten ewe chanpupu, pwe repwe uwato chon leimwen ewe king o föri mine ewe king a mochen. Nge lon ewe otun ewe king a amolätä an epwe feito pekiton ewe chanpupu Jortan, Simei nöün Kera we mwän a chapetiu me mwen ewe king 19 o üreni, “Ai samol, kose mochen kosap amwöchü ai tipis, kosap pwal chechemeni ai we föför esepwüng üa föri ngonuk, en ai samol me ai king, lon ewe rän ka feil seni Jerusalem. Kose mochen kosap chüen ekieki usun. 20 Pun ngang noum chon angang üa silei pwe üa tipis. Iei mine üa akomwoto ikenai me lein chon ekewe ainangen Israel meinisin, pwe üpwe churuk, en ai samol me ai king.” 21 Nge Apisai nöün Seruia we mwän a pälüeni, “Simei epwe fokun ninnila pokiten a otteki nöün ewe Samol mi Lapalap we mi kepit.” 22 Mürin, Tafit a üra, “Met wewen ngenikemi, ämi nöün Seruia mwän, pwe oua sotuniei. Pwota epwe wor eman epwe ninnila me lon Israel ikenai? Pun ikenai üa silei pwe üa kingsefäl lon Israel.” 23 Iwe, ewe king a üreni Simei, “Iei üa pwon ngonuk fän akapel pwe kosap mäla.”

24 Mürin, Mefiposet nöün nöün Saul we mwän a pwal feito pwe epwe churi ewe king. Esap chiri pechen, esap fichi alusan ika sopuni üfan seni ewe rän ewe king a towu seni Jerusalem tori ewe rän a liwinto fän kinamwe. ✡ 2.Sam 9.1-13; 16.1-4 25 Iwe, lupwen Mefiposet a feito seni Jerusalem pwe epwe churi ewe king, ewe king a aisini, “Pwota kosap etiei, Mefiposet?” 26 Nge Mefiposet a pälüeni, “Ai samol me ai king, nei chon angang a atupuei. Pun üa üreni pwe epwe rietä ewe lenien mot won nei aas, pwe üpwe tongeni wawa o etuk, pokiten a mä pechei. 27 Nei chon angang a aitengauaei reöm, en ai samol me ai king. Nge en ka usun chök eman nöün Kot chon läng. Iei mine kopwe chök föri mine a öch me reöm. 28 Pun pwüngün pwe en, ai samol me ai king, kopwe niela chon leimwen semei meinisin. Nge en ka aleniaei ngang noum chon angang lein chokewe ra mongö seni om chepel. Esap chüen wor ai pwüng pwe üpwe siö ngonuk, en ai king.” 29 Iwe, ewe king a üreni, “Kosap chüen pwal apasa och usun. Pun üa fen apwüngala pwe ämi me Sipa oupwe inetifengeni fanüen Saul kewe.” 30 Nge Mefiposet a üreni ewe king, “Sipa epwe angei meinisin, üa menemenöch pwe en, ai samol me ai king, ka liwinto fän kinamwe.”

31 Iwe, Parsilai ewe re Kiliat a pwal feila seni Rokelim pwe epwe etala ewe king pekilan ewe chanpupu Jortan. ✡ 2.Sam 17.27-29 32 Parsilai eman mwän mi fokun ieritam, a walik ierin. Ätei a fokun pisekisek, a amongöni ewe king, lupwen a nom Mahanaim. 33 Iwe, ewe king a üreni Parsilai, “Kopwe etiei le feila Jerusalem, nge ngang üpwe wisen tümwünuk me ikenan.” 34 Nge Parsilai a üreni ewe king, “Esap chüen chomong lusun ierin manauei. Pwota ngang üpwe chüen fituk en ai king le feila Jerusalem? 35 Iei üa ierini walik. Üsap chüen tongeni alefila lefilen öch me ngau. Üsap chüen tongeni neni nennen enei ika ünümei, üsap pwal chüen tongeni rongorong ngingin än mwän me fefin köl. Pwota ngang noum chon angang üpwe alapala weiresum, en ai samol me ai king. 36 Pwota en ai king kopwe liwiniei lon ei sokun lapalap? Ngang noum chon angang üpwe chök ekis etukela pekilan ewe chanpupu Jortan. 37 Üa tüngor ngonuk, kopwe mwüt ngeniei pwe üpwe liwinla, pwe üpwe mäla lon ai telinimw arap ngeni peiasen semei me inei. Nge iei i nei mwän Chimham epwe angang ngonuk, kopwe angei pwe epwe etuk, en ai samol me ai king. Kopwe föri ngeni i meinisin mine a öch me reöm.” 38 Iwe, ewe king a üra, “Chimham epwe etieila Jerusalem, nge ngang üpwe föri ngeni meinisin mine a öch me reöm, pwal meinisin mine en ka mochen seniei üpwe föri ngonuk.” 39 Mürin, Tafit me nöün aramas meinisin ra feila pekilan ewe chanpupu Jortan. Iwe, Tafit a mitiri Parsilai o afeiöchü. Nge wesin an afeiöchü, Parsilai a liwiniti poputän fanüan. 40 Lupwen ewe king a feila pekilan ewe chanpupu Jortan o feila Kilkal, Chimham a etala. Iwe, ekewe re Juta meinisin me esopun re Israel ra pwal emwenala ewe king.

41 Mürin, ekewe re Israel meinisin ra feito ren ewe king o aisini, “Pwota pwiüm kewe re Juta ra angeek lemonomon me chon leimwom pwal noum kewe mwän o emwenikemiito pekiton ewe chanpupu Jortan?” 42 Mürin, ekewe re Juta ra pälüeniir, “Pokiten ewe king i märärim. Pwota oua song won ei mettoch? Ifa usun, ewe king a möni enem? Ifa usun, a ngenikem och lifang?” 43 Nge ekewe re Israel ra pälüeniir, “A wor engol tupwuum ren ewe king, iei mine a wor äm pwüng won Tafit lap senikemi. Pwota oua aücheangauakem? Ifa usun, sap äm aia akomwen kapas pwe sipwe aliwinato ach king?” Nge a pöchökül än ekewe re Juta kapas lap seni än ekewe re Israel kapas.