1 Iwe, lon engol me ruuen ierin mwün Ahas ewe kingen Juta, Hosea nöün Ela we mwän a tolong lon wisan wisen king o nemeni Israel. A nom lon Samaria o nemenem lon ükükün tiu ier. 2 Hosea a föri mine a ngau me fän mesen ewe Samol mi Lapalap, nge esap kon usun ekewe kingen Israel mi akom mwan. 3 Iwe, Salmaneser ewe kingen Asiria a maun ngeni Hosea. Nge Hosea a fangatä o takises ngeni. 4 Nge lon eu rän Hosea a tinala chon künö ren So ewe kingen Isip o tüngorei pwe epwe alisi, esap pwal chüen takises ngeni ewe kingen Asiria, usun a piin föri iteiten ier. Iwe, lupwen ewe kingen Asiria a silei pwe Hosea a rawangauei, a turufi o aturalong lon imwen fötek. 5 Mürin, ewe kingen Asiria a tolong lon unusen ewe fanü o tori Samaria. Iwe, a pwelifeili ewe telinimw fän pisekin maun lon ükükün ülüngat ier. 6 Nge lon atiuen ierin mwün Hosea, ewe kingen Asiria a liapeni Samaria. A uweela ekewe chon Israel ngeni Asiria o anomu ekoch lon ewe telinimw Hala, ekoch lon Kosan arun ewe chanpupu Hapor, pwal ekoch lon ekewe telinimwen chon Metia.

7 Iwe, ei a fis pokiten ekewe aramasen Israel ra tipis ngeni ewe Samol mi Lapalap ar we Kot mi emwenirewu seni ewe fanü Isip, seni fän nemenemen Farao ewe kingen Isip. Iwe, ra fel ngeni pwal ekoch kot 8 o eäni örünien chon ekewe mwü ewe Samol mi Lapalap a fen asürela me mwen ekewe aramasen Israel, ra pwal eäni ekewe örüni ekewe kingen Israel ra atolonga. 9 Iwe, ekewe aramasen Israel ra föri sokun föför mi ngau ngeni ewe Samol mi Lapalap ar we Kot lemonomon. Ra aüetä fän iter ekewe lenien fel won ekewe leni tekia lon ar kewe telinimw meinisin, lon ekewe sop mi fokun kükün, pwal lon ekewe telinimw mi watte o pöchökül tittir. 10 Iwe, ra aüetä ür me uluulun ewe anüfefin Asera won iteiten chuk me fän iteiten irä mi muresires. ✡ 1.King 14.23 11 Ikenan won ekewe leni tekia meinisin ra keni apach mi pwokus, usun chon ekewe mwü ra föri, ekewe mwü ewe Samol mi Lapalap a fen asürela me mwer. Ra asonga ewe Samol mi Lapalap ren ar föföringau, 12 ra pwal fel ngeni uluulun anümwäl. Ikkei ekewe föför ewe Samol mi Lapalap a üreni pwe resap föri. 13 Nge ewe Samol mi Lapalap a tinala nöün kewe soukünö me soufos ren ekewe chon Israel me chon Juta, pwe repwe üreniir, “Oupwe likitala ämi föför mi ngau o aleasochisi ai kewe allük me pwüüng, ekewe allük meinisin üa allük ngeni ämi kewe lewo, üa pwal tinala remi nei kewe chon angang ekewe soufos, pwe repwe asile ngenikemi.” 14 Nge ekewe chon Israel resap aleasochis, pwe ra tipeförea, usun ar kewe lewo, ir chokewe resap lükü ewe Samol mi Lapalap ar we Kot. 15 Iwe, ra pöütala an kewe allük o atai ewe pwon a eäni ngeni ar kewe lewo, ra pwal aleasolap ngeni an kewe kapasen fön ngeniir. Ra fel ngeni ekewe uluulun anümwäl mi lomotongau o wiliti aramas mi lomotongau, ra pwal apirü föförün chon ekewe mwü mi nom pwelin ünükür, chokewe ewe Samol mi Lapalap a allük ngeniir pwe resap föri usun mine ir ra föri. 16 Ra aleasolap ngeni ekewe allük meinisin än ewe Samol mi Lapalap ar we Kot o föri ruu uluulun kow seni piras, ra pwal föri uluulun ewe anüfefin Asera pwe repwe fel ngeniir, ra pwal fel ngeni ekewe fün läng o angang ngeni ewe anü Paal. ✡ 1.King 12.28 17 Iwe, ra kenala nöür ät me nöür nengin pwe ar asor ngeni ekewe koten ekis, ra pwal föri pwee me roong o püsin fangala inisir, pwe repwe föri mine a ngau me fän mesen ewe Samol mi Lapalap o asonga. ✡ Tut 18.10 18 Iei mine ewe Samol mi Lapalap a fokun song ren chon Israel o asürela seni fän mesan. Esap wor eu ainang a chüen nom, chilon chök ewe ainangen Juta.

19 Pwal mwo nge ekewe chon Juta resap aleasochis ngeni ekewe allük än ewe Samol mi Lapalap ar we Kot. Ra eäni ekewe örüni ekewe chon Israel ra atolonga. 20 Iei mine ewe Samol mi Lapalap a pöütala ekewe chon Israel meinisin, a ariaföüür o asechirelong lepöün chon solä, tori a asürela seni fän mesan.

21 Mürin än ewe Samol mi Lapalap aimwüela chon Israel seni chon Juta, chon Israel ra seikätä Jeropoam nöün Nepat we mwän pwe epwe ar king. Nge Jeropoam a atupu chon Israel, pwe repwe likitala ewe Samol mi Lapalap o emweniir ngeni ewe tipis mi lap. 22 Iwe, ekewe aramasen Israel ra chök föri ekewe tipis meinisin Jeropoam a föri, nge resap kul seniir, 23 tori ewe Samol mi Lapalap a asürela seni fän mesan, usun nöün kewe chon angang meinisin ekewe soufos ra fen apasa fän alon. Iei usun chon Israel ra oola seni fanüer o nom lon Asiria tori ikenai.

24 Iwe, ewe kingen Asiria a emwenato aramas seni Papilon, Kuta, Awa, Hata me Sefarwaim o anomuur lon ekewe telinimwen Samaria siwilin ekewe aramasen Israel mi oola. Ekei aramas ra fanüeni Samaria o imweimw lon ekewe telinimw. 25 Lepoputän ar nonom ikenan resap fel ngeni ewe Samol mi Lapalap. Iei mine ewe Samol mi Lapalap a tinala laion leir mi niela ekoch me leir. 26 Iwe, ra asile ngeni ewe kingen Asiria, “Ekewe aramas ka uweerela o anomuur lon ekewe telinimwen Samaria resap silei än ewe koten ewe fanü allük, iei mine ewe kot a tinala laion leir mi niela ekewe aramas.” 27 Mürin, ewe kingen Asiria a allük, “Oupwe tinala eman lein ekewe souasor oua uweato ikei. Ätewe epwe liwinla, epwe nonom ikenan o aiti ngeni ekewe aramas än ewe koten ewe fanü allük.” 28 Iei mine eman lein ekewe souasor ra uwereto seni Samaria a liwinla o imweimw lon Petel. Iwe, a aiti ngeni ekewe aramas usun ar repwe fel ngeni ewe Samol mi Lapalap.

29 Nge iteiten eu me eu mwichen aramas a chök sopwela le föri en me an uluulun anü o iseniir lon ekewe lenien fel won ekewe leni tekia ekewe chon Samaria ra fen aüetä. Iwe, ekewe mwichen aramas ra föri ei lon en me an telinimw ia ra imweimw ie. 30 Ekewe aramasen Papilon ra föri uluulun ewe anü Sukot-penot, ekewe aramasen Kut ra föri uluulun ewe anü Nerkal, ekewe aramasen Hata ra föri uluulun ewe anü Asima, 31 ekewe aramasen Awa ra föri uluulun ekewe anü Nipas me Tartak, nge ekewe chon Sefarwaim ra keni nöür semirit ngeni ar kewe anü Atramelek me Anamelek. 32 Ekei aramas ra fel ngeni ewe Samol mi Lapalap, nge ra pwal filätä me leir sokopaten aramas, pwe repwe föri angangen souasor lon ekewe lenien fel won ekewe leni tekia, repwe pwal asor fän iter ikenan. 33 Iei usun ra fel ngeni ewe Samol mi Lapalap, nge ra pwal fel ngeni püsin ar kewe kot lon örünien ekewe mwü, ewe ia ra feito me ie.

34 Iwe, tori ikenai ra chüen föri usun örünier me lom. Resap fel ngeni ewe Samol mi Lapalap, resap pwal aleasochis ngeni ekewe pwüüng me ekewe allük ewe Samol mi Lapalap a allük ngeni ekewe mwirimwirin Jakop, ätewe Kot a aita ngeni Israel. ✡ Ken 32.28; 35.10 35 Iwe, ewe Samol mi Lapalap a föri eu pwon ngeniir o allük ngeniir, “Ousap fel ngeni pwal ekoch kot ika chapetiu ngeniir, ousap angang ngeniir ika eäni asor ngeniir. ✡ Eks 20.5; Tut 5.9 36 Nge oupwe chök fel ngeniei ngang ewe Samol mi Lapalap mi emwenikemiiwu seni ewe fanü Isip fän manaman mi lapalap, pwal fän pöchökül. Oupwe chapetiu ngeniei o eäni asor ngeniei. ✡ Tut 6.13 37 Oupwe pwal aleasochisi ekewe pwüüng me allük kana üa makei fän itemi. Ousap fel ngeni pwal ekoch kot. 38 Ousap fokun manlükala ewe pwon üa föri ngenikemi. Ousap fel ngeni pwal ekoch kot, 39 nge oupwe chök fel ngeniei ngang ewe Samol mi Lapalap ämi we Kot. Iwe, ngang üpwe angasakemi seni chon oputakemi meinisin.” 40 Nge ekewe aramas resap aüseling, pwe ra chök föri usun örünier me lom.

41 Iei usun ekewe mwichen aramas ra fel ngeni ewe Samol mi Lapalap, nge ra pwal fel ngeni ar kewe uluulun anümwäl mi fal. Iwe, tori ikenai mwirimwirir kewe ra chök föri usun mine ar kewe lewo ra föri.