Chru HEBRƠ 8

Yàng Jêsu La Mơnih Gơnuăr Prŏng Apăn-Akŏ Pơyă Phơ̆n C̆ĕ-Pơyơ̆r Duh-Dơlbăt

1 Pơnuaĭ phŭn biă bloh buơl gudrơi dò đờm la: Buơl gudrơi hũ sa aràng mơnih gơnuăr prŏng apăn-akŏ pơyă phơ̆n duh-dơlbăt prŏng-màng biă, dò guh tơ gah hơnuă sơbàn Pô Màng-Rơyŭ tơ ngŏ lơngì, 2 ngă gơnuăr-bruă duh bruă lăm anih sơc̆ih-sri, la anih duh-dơlbăt biă, kơyoa Yàng ngă tơbiă bloh 'buh iơŭ kơyoa anà mơnih ngă tơbiă.

3 Gơnuăr-bruă du mơnih gơnuăr prŏng apăn-akŏ pơyă phơ̆n duh-dơlbăt la pơyă phơ̆n c̆ĕ-pơyơ̆r duh-dơlbăt sơ̆ng phơ̆n sì c̆ĕ-pơyơ̆r duh-dơlbăt tơ Yàng Pô Lơngì; kơyoa nư̆n, mơnih gơnuăr prŏng apăn-akŏ pơyă phơ̆n duh-dơlbăt ni kŭng păl hũ phơ̆n hơgĕ tô pơyă. 4 Yah Pô dò lăm dun-ya, nư̆n pô 'buh iơŭ la mơnih gơnuăr pơyă phơ̆n duh-dơlbăt, kơyoa lăm dun-ya hũ du mơnih gơnuăr pơyă phơ̆n duh-dơlbăt pơyă phơ̆n c̆ĕ-pơyơ̆r duh-dơlbăt tui adăt-adia hũ pơto bơjơ. 5 Du mơnih nư̆n duh bruă lăm sa anih sàng duh-dơlbăt mĭn la rơ̆p pơmơyơu sơ̆ng bơngă sàng duh-dơlbăt biă tơ ngŏ lơngì, kơyoa tŭ Môise kơjĕ bơ̆ ngă anih duh-dơlbăt sơdăng nư̆n hũ Yàng Pô Lơngì đờm kơkơi pơđăr lài: “Păl c̆ơ-kơrhia nĭ-nùn bĕ, ngă abih tơgrơ̆ bruă tui iơŭ yơu rơ̆p-nàl Kơu hũ pơto tơ anà tơ ngŏ c̆ơ̆.” *

6 Bloh tŭ ni Yàng Jêsu hũ đồ-mă sa gơnuăr-bruă prŏng-màng rơlau, kơyoa Pô la Pơtau Pơhơlàr Tơkrah tơ sa pơnuaĭ pơguăn-pơđoàn siàm rơlau, la pơnuaĭ pơguăn-pơđoàn hũ ngă tơbiă gơnàng tơ ngŏ du pơnuaĭ đờm pơguăn siàm rơlau. 7 Kơyoa yah pơnuaĭ pơguăn-pơđoàn sa hũ wĭl-tơ̆l bơjơ, nư̆n 'buh c̆àng păl ngă tơbiă pơnuaĭ pơguăn-pơđoàn dua. 8 Bloh Yàng Pô Lơngì hũ puaĭ 'buah tơ buơl làng Juđa tŭ Pô đờm:

“Ni, du hơrơi truh,

Kơu rơŭ ngă tơbiă sa pơnuaĭ Pơguăn-Pơđoàn Bơrhơu sơ̆ng sàng Israel sơ̆ng sàng Juđa.

9 Pơnuaĭ pơguăn-pơđoàn nư̆n rơŭ 'buh yơu pơnuaĭ pơguăn-pơđoàn Kơu hũ ngă sơ̆ng kơi-kŏ pàng-yau buơl guñu,

Lăm hơrơi Kơu apăn tơngàn buơl guñu, ba buơl guñu tơbiă klàh mư̆ng lơgăr Ejiptơ.

Kơyoa buơl guñu 'buh dơlhơu-hơdơi tơpă-kơjăp sa hơtai-hơtiàn păng-rơmiă pơnuaĭ pơguăn-pơđoàn Kơu,

Nư̆n Kơu luơi mơti buơl guñu,” Yàng đờm yơu nư̆n.

10 Yàng đờm wơ̆: “Ni la pơnuaĭ pơguăn-pơđoàn Kơu rơŭ ngă sơ̆ng sàng Israel:

Hơdơi du hơrơi nư̆n, Kơu rơŭ daŭ pơnuaĭ adăt-adia Kơu lăm hơtai-akŏ buơl guñu,

Sơ̆ng wă pơtơma lăm hơtai-hơtiàn buơl guñu.

Kơu rơŭ la Yàng Pô Lơngì buơl guñu,

Sơ̆ng buơl guñu rơŭ la buơl làng Kơu.

11 Buơl guñu rơŭ 'buh păl pơto-pơđăr buơl làng drơi,

Sơ̆ng adơi-ai drơi, lài: ‘C̆ơ-thơu bĕ Yàng.’

Kơyoa abih buơl guñu,

Mư̆ng mơnih tìt rơlau abih tơ̆l truh mơnih prŏng rơlau abih, rơŭ thơu Kơu.

12 Kơyoa Kơu rơŭ anĭt toh-luơi tơgrơ̆ pơnuaĭ mơsak-jơhà buơl guñu,

Sơ̆ng 'buh dò sơdơ̆r truh glài-sơnoh buơl guñu tra.” †

13 Tŭ Yàng Pô Lơngì đờm truh pơnuaĭ Pơguăn-Pơđoàn Bơrhơu, nư̆n Pô ngă tơ pơnuaĭ pơguăn-pơđoàn amăng sa tơbiă jiơ̆ng klă. Sơ̆ng tơgrơ̆ pơnuaĭ hơgĕ tơbiă jiơ̆ng klă jiơ̆ng tha bơjơ, nư̆n rơŭ sơmăr luĭ-lơhiă thĭt.

HEBRƠ
<
8
>

*8:5 8:5 Tơbiă Mư̆ng Ejiptơ 25:40.

†8:12 8:12 Jeremi 31:31-34.