1 Keiho a ahipoi, O Pakai keiho a ahipoi, amavang loupina jouse hi namingailut na longlou jeh a chun nang ding jingbou ahi. 2 Chitin namtin hohin a Pathen’u hoi a umham tia aseidingu ham? 3 Ka Pathen’u hi vanho chunga aum in thil adeidan dana abolji ahi. 4 Amaho semthu doihon vang sana le dangka a kisem ngenchang bou ahiuvin mihem khut in asemthu jeng ahiuve. ✡ Labu 135:15-18; Rev 9:20 5 Amahon kam anei un ahinla apaotheipon, chuleh mit anei un kho amuthei pouvin, 6 kol aneijun ajathei pouvin, nahkui anei un anahthei pouvin, 7 khut anei un ima tohnan amangthei pouvin chuleh keng anei un achele theipouvin, lolhom anei un ahin thucheng ahungdoh theipon ahi. 8 Hitia chu doilim semthu hohi hiche tobang ahiuve, hicheho tahsan hojong hitobang machu ahiuve. 9 O Israel Pakai chu tahsan un! Amachu napanhu na lum a pang ahi. 10 O thempuho Aaron ho Pakai chu tahsan un! Amahi napanpia leh na lumdel a pang’a ahi. 11 Nangho Pakai gingjing ho Pakai chu tahsan un! Amachu napanpi le nalumdal ahi. 12 Pakai in nahin geldoh jingin phatthei nabohjing ding ahi. Aman Israel mipite hi phatthei aboh ding ahi, chuleh thempuho le Aaron chilhah ho jong phatthei aboh ding ahi. 13 Mithupi hihenlang milham hijongleh Pakai ging hochu Aman phatthei aboh ding ahi. ✡ Rev 11:18; 19:5 14 Pakai in nangma nahin nachate ahin phattheina lhingset in napehen, 15 Van le lei sem a Pakai chun phatthei naboh hen, 16 Van hohi Pakai a ahin, leiset vang hi mihemte apeh ahi. 17 Mithin Pakai thangvah la asatheipoi, ajeh chu amaho chu lhan munthip gam a che ahiuve. 18 Ahinlah eihon tu le tonsot geija Pakai ithangvah theiju ahi. Pakai chu thangvah’in umhen!