1 Hichun Pakaiyin Job komma aseijin: 2 Hatchungnungpa chu nakinelpi nom nah laijam? Pathen thutan dihlouna podohpa nahin, ahileh donbutna ding nanei nahlai em? 3 Hichun Job in Pakai chu adonbut in, 4 Keima ima hilou kahi, adonbutna ding chu iti kaholdoh jou ding ham? Kakhut in kamuh kisip ing katin, 5 Thu tamtah kaseidoh ahitan, seibe ding kanei tapoi. 6 Hiti chun Pakaiyin chimpei lah a kon in Job ahin donbut in, 7 Pasal phatah bangin nakong kigah in, keiman nangma doh ding thudoh themkhat kaneijin, chuleh nangin hiche ho chu nadonbut ding ahi. 8 Kathutan dihna hi tahsan louva nakoija, chule nangma dihna photchetna dinga kei themmo neichan joh ding ham? 9 Pathen banga thahat nahin, Pathen ogin banga nangin van nagin sah thei ding ham? 10 Aphai naloupina leh nagun chenan kivon in lang, ja naumna leh aming than nan kivon temin. 11 Nalung hanna ngoh ding hol in lang, mikiletsah teho jouse chunga chuhen. 12 Mikiletsah techu namit hei chun jachat sah in lang, migiloute chu adin nauva chun chot phan. 13 Leivui lah a chun vui in lang, amaho chu mithigam songkul'a hunk hum den tan. 14 Chutia chu kei jengin jong kapachat ding nahi, ijeh inem itile nabangol thahat chun nahuhuhdoh ahitai. 15 Behemoth khu vetemin, nang kasem banga kasem ahin, bongchal bangin hampa ane e. 16 Akengphang athahat nale, a oipoh a aphe ho khu ven. 17 Amei jong khu Cedar thing bangin atah in, akhel teni a aphe ho khu detchet a kipheh khomahi. 18 Agu ho jong sum-eng long abangin atibah ho jong thihjol tobang ahi. 19 Pathen khutsem ho lah a vetkah theipen ahin, chuleh asempa bouvin agihsal thei ahi. 20 Gam'a gamsa jouse lhatle namun hiche molsang hohin amaho dinga anneh phapen pen chu apeh nom u ahi. 21 Thambal pahcha phung noija chun akol jin, pengphung boh lah a akisel jin ahi. 22 Vadung pang thingnem ho lah a pahcha phungho chu amadin lim in apange. 23 Vadung twisoh in ama asunoh phah pon, Jordan vadung soh hen lang chup jongle alungkham deh poi. 24 Koima chan amandoh joupoi, ahiloule anah avu a, thihkol abu peh a chuleh akaimang theilou ahi.