JOB
LEKHABU
Job Lekhabu Sung Thu Umdan
Phatkhat teng mihem hinkhoa thudoh hahsa tah ho toh ikibon jiuvin: Ipi dinga aphalou ahilouleh thilse leh thohgimna hohi vannoija umjia hintem? Ipi dinga midih ho thohgim jiu ham? Hahsatna aum teng Pathen hoiya umji ham? tin idong jiuve. Thudoh ho chungah bailamtah donbutna aum ji nan hinlah Pathen hina ho thudoh nasatah in aumden ji’e. Lunghem tah a Job in gimtah nat thohpum'a donbutna dihtah ahol chun, Pathen toh kimutoa kikhelna mun alhut in ahi. Ahintosa umchan chun thudoh nasatah inei hou donbutna neipa Pathen toh ei kimai ngat tosah un ahi.
Amavang eiho bou – asimhon – akiselguh hetdohna chu ineijun ahi. Job in ahet chasun chu phulou helouva ahinkhoa thilpha jouse suhmanga aum chu ahi. Ipijeh ahivang ahepoi. Hetdoh ding jong kinem lou ahi. Anat thohgim pet tah’a Pathen toh athahbeh’a akimuto kahse in thudoh tamtah aneijin hilchetna angaichan ahi. Pathen toh akimuto chun ijakai akhelsoh tan ahi. Job in aseijin, “Nang hi masangin kana jah tho in, hinlah tun vang kamit tah in nang kamutai,” ati (Job 16). Job thusim nasim bangin nangin jong Pathen athahbeh’a namu nadin Pathen koma thum’in.
Lekhabu pumpia ogin jatchom chom kijaho ngaiton – hahsatna ito teng ikimaito pi jiho thakhat – Pathen, Satan, golphatah ho, insumgmi chuleh Job lungchang ahi. Hiche lekhabu’a thil kijih: kihoulimna, la a, thuchih, paochamtuh, lhasetna, gaosapna leh tekahna ho ahoplet dan vechen tem in; Job leh aloihon aneilou akiselguh dihtah hetdoh theina inei-u geldoh jing pum’in ching thei tah in sim’in.
Lekhabu Jihpa, Akijih Kum Chule Akijih Lona
Hiche lekhabu hi koijin, hetchet ahipoi. Chule Job lekhabu hi 2000 BC, Hebrew puluiho phat laiya kijih hidin ginchat ahi. Ajeh chu Job lekhabu hi Bible a-dia gollui lekhabu luipen hinte. Mi tampin Job thusim hi akhang khanga thusim seithoa, ana kisei jing hichu khonung’a hung kijih doh ahi tin, aseijun ahi.
Thohgimna chung changa thudoh ho seidohna dinga kijih ahi. Asimhon Lhagao leh Thudih kholgilna’a Job kiham bolna tobanga kigel theina dinga Job thusim hi kijih ahi. Hiche hin apha’a Pathen in ama ngailuho adih monge tia, aphon khontehna ahi thudol mudoh ahi.
1
Job Hinkho, Ainsung Le Atahsanna
1 Phatkhat hin Uz gam sunga Job kiti mikhat ana cheng in, amapa chu nolnabei leh lungtheng sel ahi. Amapan Pathen aging in thilphalou jousea kona kikangse jinga um ahi. 2 Joh hin chapa sagi le chanu thum aneije. 3 Chule Job hin kelngoi sang sagi, sangongsao sang thum, bongchal kop janga, le sanganpi janga aneije. Amapa hin soh jong tamtah anei ahi. Atahbeh in Job hi hiche gamkai sungse dinga ahaopen ahi. 4 Job chapate aphat lhingpen pen chun ainnuva nehkhom donkhom abol tenguleh, asopiu numei thumho jong chu golvah bolkhompi din akou jiuve. 5 Hiche golvah chu akichai teng nikho phabep jouleh Job chun achate athenso jin ahi. Job chu jingkah matah in athou jin khat cheh a din govam thilto abolpeh ji'e. Ajeh chu Job in hiti hin aseijin, “Kachate hi ana chonseuvin tin chule alungthim uva jong Pathen agaosap sao himai theijinte,” ati. Hiti hin Job in abol jing jenge.
Satan In Job Patep Dia Thu Adoh
6 Nikhat hi van thutanna in na thutanho ama ho cham chamin Pakai masanga ahung kikhomun chule hehhatpa Satan chu amaho toh ahung lhung khome. ✡ Semtilbu 6:2 7 “Hoiya konna hung nahim?” tin Pakaiyin Satan adonge. Satan in Pakai adonbut in, Leiset chung kaga vet lhih lea, thilsoh jouse kaga vetle ahi. 8 Chuin Pakaiyin Satan jah a, “Kalhachapa Job khu nahet em? Leiset a dinga miphapen ahi. Amahi nolnabei, milungthengsel ahin, aman Pathen aging in chule thilphalou jousea konin akikangsen ahi,” ati. 9 Satan in Pakai adonbut in, “Henge Job in Pathen aginna ajeh hoitah anei ahi. ✡ Rev 12:10 10 Ama ahin ain ahin chule anei jouse kulpi kikai khum banga, akim vella pal banga naum chahkheh’a nangin atohna jousea nakhan tousah jeh’a bou ahi. Ven ichan geija haosa hitam? 11 Nakhut lhangin lang anei jouse lahmang peh le chun; chuteng leh namai chang tah’a na gaosap jeng ding ahi,” ati. 12 Pakaiyin Satan jah’a aseijin. “Aphai, amapa khu napatep thei ahi. Chule anei jouse chunga nabol nom chan nabol thei ahinai, atahsa vang suhset peh hih in,” ati. Chuin Satan in jong Pakai umna adalhatai. 13 Nikhat Job achapate le achanuten aupa pen pao in’a an anehkhom adonkhom laitah un, 14 Thupole khat in Job in'ah hiche thusoh hi ahinpoi; “Nabongchal hon lou akhoijuva, akimvella sangan hon an aneh laijun, 15 Seba miten eihin bulhu tauvin, ganchaho jouse akiguh manguvin chule natong ho athat gamun, keima changseh hi nangma seipeh dia hung sohcha kahi,” ati. 16 Amapan hiche thuhi asei nalaijin thupole dang khat in hiche thusoh hi ahinpoi, “Vanna konin Pathen meikong ahung lhan kelngoite le achingho akavam gamtai; keima changseh hi nangma seipeh dinga hung sohcha kahi,” ati. 17 Amapan hiche thuhi asei nalaijin, thupole athum channa pa ahung lhungin, hiche thusoh hi ahinpon, “Chaldea mite loithum jenin ahin delkhumun sangongsao jouse agumang un; chule nasaohte athatgam tauve, keima changseh hi nangma seipeh dinga hung sohcha kahi,” ati. 18 Hichepan thu asei nalaijin, thupole adang khat in hiche thusoh hi ahinpo paijin, “Nachapate le nachanu ten aupa pen pao in na anekhom adonkhomun ahileh, 19 Photlot chang in, gammang lah a konin huipi hattah khat in aumnau in chu aninglang jousea ahin nuh leh in chu ahung chimlhan nachate jouse athigam soh tauve. Keima changseh hi nang seipeh dinga hung sohcha kahi,” ati. 20 Job adingdoh in thilsoh lunggim najeh in asangkhol chol chu abottel in, alu akivo chaijin, chule chibai boh din tolla akun lhatai. 21 Aman, “Kanu naobua konna kasagoh keuva hungdoh kahin, chule kadalhah teng sagoh keu kahi ding ahi. Kanei jouse Pakaiyin eipeh ahin, chule Pakaiyin akilah mang ahi; Pakai min chu vahchoijin umhen,” ati. 22 Hicheng jouse ahin Pathen themmo chansah nan achonsepoi.
DRAFT COPY