1 ཡེ་ཤུ་ལ་དད་ལྡན་རྣམས་ཀྱི་གྲངས་མང་དུ་འཕེལ་བའི་དུས་སུ། ཉིན་རེའི་ཟས་ཀྱི་བགོ་སྐལ་གནང་སྐབས་ཡ་ཧུ་དཱ་པའི་སྐད་ཆ་ཤོད་པའི་ཡ་ཧུ་དཱ་པ་རྣམས་ཀྱིས་གྷི་རིག་སྐད་སྨྲ་བའི་ཡུགས་མོ་རྣམས་ལ་སྣང་མེད་དུ་བཏང་བས་ཁོ་ཚོའི་བར་མི་མཐུན་པ་ཞིག་བྱུང་བས། 2 བཅུ་གཉིས་པོས་དད་ལྡན་ཐམས་ཅད་ཀྱི་ཚོགས་བོས་ནས་ཁོ་ཚོར་“ཉིན་རེའི་བགོ་སྐལ་གནང་བའི་ཆེད་དུ་དཀོན་མཆོག་གི་བཀའ་སྣང་མེད་དུ་འཇོག་མི་རུང་བས།* 6:2 བཅུ་གཉིས་པོ་ནི་གཙོ་བོ་ཡེ་ཤུའི་ཉེ་གནས་བཅུ་གཉིས་པོ་ཡིན་ཏེ་སྐུ་ཚབ་ཀྱང་ཟེར། 3 སྤུན་ཟླ་རྣམས། ཁྱེད་ཚོ་ལས་ཡོན་ཏན་ཅན་ཡིན་ཏེ། དམ་པའི་ཐུགས་ཉིད་དང་ཤེས་རབ་ཀྱིས་གང་བའི་སྐྱེས་པ་བདུན་འདོམས་ཤིག ང་ཚོས་ཁོང་རྣམས་ལ་ལས་ཀ་འདི་བསྐོས་ནས། 4 སྨོན་ལམ་འདེབས་པ་དང་དཀོན་མཆོག་གི་བཀའ་སྒྲོག་པའི་ལས་ལ་བརྩོན་པར་བྱ་”ཞེས་གསུངས། 5 དེ་ཐོས་ནས་ཆོས་ཚོགས་ཀྱི་དད་ལྡན་ཐམས་ཅད་བློ་སེམས་བདེ་བར་གྱུར། ཁོ་ཚོས་དད་པ་དང་དམ་པའི་ཐུགས་ཉིད་ཀྱིས་གང་བ་སེ་ཏེ་ཕཱན་དང༌། ཕི་ལིབ། པོ་རོ་ཀོ་རུ། ནི་ཀ་ནོར། ཏི་མོན། པར་མེ་ནཱ། སྔར་ཡ་ཧུ་དཱ་པའི་ཆོས་ལུགས་ལ་ཞུགས་ཏེ་ཨན་ཏི་ཡོག་ཡཱ་གྲོང་ཁྱེར་ནས་ཡིན་པ་ནི་ཀོ་ལཱ་བཅས་བདམས། 6 ཁོ་ཚོས་མི་འདི་ཚོ་སྐུ་ཚབ་རྣམས་ཀྱི་མདུན་དུ་འཁྲིད་ནས་ཁོང་རྣམས་ཀྱིས་སྨོན་ལམ་བཏབ་སྟེ་མི་དེ་ཚོར་ཕྱག་འཇོག་པར་མཛད།† 6:6 ཕྱག་འཇོག་པར་མཛད་པ་ནི་ལས་འགན་བསྐོས་པ་དང་དད་ལྡན་རྣམས་ཀྱི་མོས་མཐུན་ཡོད་པའི་རྟགས་ཡིན། 7 དཀོན་མཆོག་གི་བཀའ་ཕྱོགས་ཀུན་ཏུ་ཁྱབ། ཡེ་རུ་ཤ་ལེམ་ལ་དད་ལྡན་རྣམས་ཀྱི་གྲངས་ཤིན་ཏུ་མང་པོར་འཕེལ། ཡ་ཧུ་དཱ་པའི་བླ་མའི་ནང་ནས་མང་པོ་ཞིག་གིས་འཕྲིན་བཟང་ལ་དད་པ་རེད།

8 ཡང་ཐུགས་རྗེ་དང་ནུས་མཐུ་ཡིས་གང་སྟེ་སེ་ཏེ་ཕཱན་གྱིས་ཡུལ་མིའི་ནང་ནས་རྟགས་དང་ངོ་མཚར་ཆེ་བའི་དོན་བསྟན། 9 འོན་ཀྱང་རང་དབང་ཅན་ཞེས་བྱ་བའི་ཡ་ཧུ་དཱ་པའི་འདུ་ཁང་ནས་སེ་རེ་ནཱ་དང་ཨ་ལིག་ཟན་དྲི་ཡཱ་གྲོང་ཁྱེར་ནས་ཡིན་པ་དང༌། གཞན་ཡང་ཀི་ལིག་ཡཱ་དང་ཨེ་ཞེ་ཡཱ་ཡུལ་པ་ཁ་ཤས་ཀྱིས་སེ་ཏེ་ཕཱན་དང་རྩོད་གླེང་བྱས། 10 འོན་ཀྱང་སེ་ཏེ་ཕཱན་གྱིས་ཤེས་རབ་དང་དམ་པའི་ཐུགས་ཉིད་ཀྱིས་གསུངས་པ་དེར་ཁོ་ཚོས་རྒོལ་མ་ཐུབ། 11 དེ་ནས་ཁོ་ཚོས་མི་ཁ་ཤས་ལ་ལྐོག་ཏུ་བློ་འགུགས་བྱས་པས་མི་དེ་ཚོས་“ཁོས་དཀོན་མཆོག་དང༌། ལུང་སྟོན་པ་མོ་ཤེ་ལ་སྐུར་བ་འདེབས་པ་ང་ཚོས་ཐོས་”ཞེས་ཟེར། 12 ཁོ་ཚོས་ཡུལ་མི་དང༌། རྒན་པོ། ཆོས་ཁྲིམས་ལ་མཁས་པའི་མི་རྣམས་ལ་ངན་བསྐུལ་བྱས་ནས་ཡོང་སྟེ་སེ་ཏེ་ཕཱན་བཟུང་ཞིང༌། གྲོས་ཚོགས་ཀྱི་མདུན་དུ་འཁྲིད། 13 དེ་ནས་ཁོ་ཚོས་རྫུན་གྱི་དཔང་པོ་གྲ་སྒྲིག་བྱས་ཤིང༌། ཁོ་ཚོས་“མི་འདིས་གནས་མཆོག་དང་ཆོས་ཁྲིམས་ལ་རྒྱུན་ཆད་མེད་པར་སྐུར་བ་འདེབས། 14 གང་ལགས་ཤེ་ན། ཁོས་ཡེ་ཤུ་ཟེར་བའི་ན་ཙ་རེལ་པ་དེས་གནས་མཆོག་བཤིག་ནས་མོ་ཤེ་ཡིས་ང་ཚོར་གནང་བའི་ཁྲིམས་སྲོལ་སྒྱུར་བར་བྱ་ཞེས་ཟེར་བ་ཐོས་”ཞེས་བཤད། 15 གྲོས་ཚོགས་ལ་སྡོད་མཁན་ཐམས་ཅད་ཀྱིས་སེ་ཏེ་ཕཱན་ལ་ནན་གྱིས་བལྟས་ཏེ། ཁོང་གི་ངོ་གདོང་ནི་དཀོན་མཆོག་གི་ཕོ་ཉ་ཞིག་གི་ཞལ་དང་འདྲ་བར་ཡོད་པ་མཐོང་ངོ༌། །