1-2 Josuey, mishat Israelchichtamsin mang yusur yakat Aíyaatssha kachingaranganaya. Sheersin, anumun yakat Gabawonshuchpasha tputs amikurtaranganaya. Anpurshat zar, Irusarinash yakat kurak Adonisedek sur taarangiya. Anshat kurak, yuwaa Josuey yaktaa Jericoya pachampat kachingarangana, anumun minootssha yakat Aíyaa kachingarangtamsina, anoo tsiyatsis mazinarangu kapung punirangiya. Sheeru, yuwaatssha Gabawonshuchpat kurak Israelchich amikurtarangusin, kapung Israelchicheem istamaam zandarangu, anootsshat yusur mazinarangu, aranginasha kizpur punirangiya. Watam Gabawon yakat kapunguwa. Aíya yakat kasiriya. Mishat, anumari yakat wanasiri ichingaroo kasiriya. Sundarshat anush kizpurinandari taaranganaya. 3 Ashirucha, kuraksha Adonisedek anoo tsiyatsis mazinarangu kapung puniku, kurakaam sur Hoham, minshucheem kurak Piram, minshucheem kurak Jafiyam, minshucheem kurak Debireemtam, zapan k'kuzee piyam zangata, zangata ashirangiya. 4 Anshat zanganku tárangiya, Naanints ningeem. Nuwaam istangasinda. Papcha; nuwaa Gabawonshuch mapukchinllinpa. Mang Josueypat amikurtarangusin, washunand ipuneenllinaya, mishat Israelchichtamsina, táyaru tsiyatssee zanganirangiya. 5 Ashirucha, uwshtisin anoo tsiyatsis mazinarangusin, zameetpat kurak Amorrewshuch tsap karanganaya. Irusarinshuch, Hebronshuch, Jarmutshuch, Lakisshuch, Eglonshuchtam. Ashirusin, washunandarisha yápandayarandsin, ashpari wasundururpat Gabawonshucheem pachakatssin naataranganaya.

6 Ashirucha, Gabawonshuchshat kurak k'kuzee mikeeru zanganirangiya kurakaam Josueyaama. Anpurshat zar Josuey Guilgaalash yakat taarangiya. Amb Gabawonshuch tputs k'kuzee kapeetarangiya. ¿Tamaksha? Nuwaam mikeerush kuseerush istanda. Nuwaa ngatishpa, watam shiyapa kizpur amikuriniwa. Natu, tpachindanda. Papcha. Amorrewshuchinand kurak washunand yápandayarandsin, nuwangaz pachakatssin, na nish machish shaneeranaya, tárangiya. 7 Ashiriya, Josueysha anuritam Guilgaalamand tsap káyarandsin, ashpari wasundurur kizpurinandari naataranganaya. 8 Apanllshat Josueyaa, Punirintspa. Nuw siyaam kapung istachintspa. Pachampanee tputs siyaam tuyamandachintspa. Nuwshat napuxtamash wayayaruri kasachima. Amb ashkachuri, siyaa nda pakchiyam tistachinllinaya, tárangiya.

9 Anshat Josuey Guilgaalamand tsap káyarandsin, psaanpatari zar naataranganaya. Anushshat kusarangsin, Amorrewshuchee tputs pacharanganaya. 10 Apanll waana tputsee tpuxtamash wayayaru kasarangiya. Ashirucha, Israelchichee parangusin, kapung punirustaranganaya. Amb ashirangsin, ndushat waritaranganaya. Anush Josueysha wasundururpat tputsee zapan Amorrewshuchee Gabawonash tsap pacharanganaya. Anumun yapshat suwayaranllina ambshat Betorunap ngoots tachitaranganaya. Ambiri Amorrewshuchee tachitarusin, pchakatarandsin, tsap Asekamun mishat Makedamun kasarangana. 11 Ashiriya, Amorrewshuch chawpitamsin Israelchichee puniksin, Betorunungiri tsap wazawapshat karuweersin, suwaranganaya. Apanllshat kachizamashee zanganirangu, wazawapshat zapan, kapunguw paratzurangu, tputsee zapannaashat pacharangiya. Israelchich sundar pachayarana anoo kánurinashat kachizamash pacharangiya. 12 Apanll waana Amorrewshuchee tputs Israelchicheem tuyamandarangu, uwshtisin pacharanganaya. Josueyshat anush Apanllee tsiyatku, Apaa, zar musá putpa. Zaree yuwar wayangcha Gabawonpatari tsap tasasaru. Tsupeetstam Aiyalonpat tsap tándsapa tasasaru wayangcha, tárangiya. 13 Josuey tárangu, Apanllshat anuritam zaree, tsupeetstam anootsiri tuxiykeerangiya. Ashirangu, zar tsuppatari anootsiri xiyarangu, nda pakchiyam karuwarangiya. Ashirucha amb ashirangu, Israelchich undararee minum zar tsindas tamapari ashiru pacharangusin, izuuru kachingaranganaya. Nee tsiyatsis tputs sur Jaser zurampatari yandarangiya. Anoo nuwshat na zurampatartatam yandakina. Mang zaree Apanll anootsiri kanindap tuxiykeerangu, nda pakchiyam karuwku, minum zar tamapari ashiru taarangiya. 14 ¿Antaati sirútama anootsiri zar xiyaru, minumtiyam patareezinllinaja? Mishat, ¿ayamtaati nimun zapish ashtacheeja? Itaru, Apanll Josueyaamam kapung chinaku, amb sheerangiya. Mishat, watam Apanll Israelchicheem kapung istamaam zandaranguwa. Ashirucha, waani undararee kasipana átu, zaree anootsiri tuxiykeerangiya. 15 Amb ashirangsin, anumun Josuey ichingaru tiptsirpatari, mishat Israelchichtamsin, yusur waptam watsapuniptamsin Guilgaalap kanapuranganaya.

16 Yuwatamsin Amorrewshuch zameetpat kurak kusarangana, antamsin mang puniksin, suwayarandsin, tsap Makedash wach wantsush pshtuyarusin, wanaatssin tapishuranganaya. 17 Zapish tputsshitisin mang wachush tputsee paranganaya. Ashirucha, Josueyaatsshat kamanirangsin, 18 Josueyshat yusur wasundururee kamachtarangiya. Natu, naayarus patumbich kapung turputeerus anpat wachoo mbamari shtandayarus ksashinints. Itaru, sheerus, izuuru ksarintspa. Ksutamapaneem tutsangayarus, ksangtsa nda shitungamaama. 19 Sheerus, siysat sundaris anootsiri k'xinintspa. Arang yap kundararis suwayaranllina amb tachiteerus pchashinints. Watsapunip kususinapa. Izuuru ashpari kchingangints; kparintspa. Watam Apanll waana siyaam, kundarareetsis pachamaam kamachtaranguwa, Josuey tárangiya. 20 Amb ashirangsin, Josuey Israelchichpat izuuru Amorrewshuchee tpachingayarusin kasaranganaya. Zapan Amorrewshuchee tputs pacharanganaya. Pakchimshitisin yaktarinpini suwarangusin, izuuru yaktareetsini watandpun wach mbamari shtandayarusin kasaranganaya. Sheersin, nda pakchiyam shitungaranganaya. 21 Itaru, Israelchichshitisin tputs nda tapazish tsiparanganaya. Ashparitisin tsas yusur Makedpitam tsap kanapuranganaya. Amb ashkana anumandari tputs yasaksin, Israelchichee mantsir tsiyatamaam puniranganaya.

22 Josuey yusur wasundururee kamachtarangiya. Ashiri natu, wachoo yusur tawateerus, zameetpatari kurak putayarus, ishitungangints, tárangiya. 23 Israelchichshitisin sundar anuritam wachoo tawateersin, ashpari kurakaa putayarusin ishitungaranganaya. Irusarinshuchee, Hebronshucheetstam, Jarmutshucheetstam, Lakisshucheetstam, Eglonshucheetstam ashpari kurak putaranganaya. 24 Putayashinusin, Josueyashshat yushindaranganaya. Josueysha ashpari sundaroo kuruzeeru, sundarootsshat urkar kamachtarangiya. Natu, naanints. Nee kurakaa putayarus, tsapush kpitangints. Sheerus, wayarpunish ktsiptis katitarus ksangints, tárangu, sundarshitisin urkar ayu tárangusin, kurakaa tsapush kapeeteersin, tushineersin, wayarpunish katitangat ashiranganaya. 25 Ashirangsin, Josueyshat yusur tsiyatarangu, Ashiri siysat kundararpatini waratamaam punirintspa. ¿Mayaamaja sambaytachich? Arang kizpurtayarus, nee kurakaa kiyung yachangints, watam waana siyaam nee kurakaa piy ashimaam kamachtaranguwa. Ashiri siysat anuritam tuminungints, tárangu, 26 Natu pachayarus, wayarpunish wasikpa spuyarus, yuwar yasinamun kayxuyarus ksangints, Josuey tárangiya. Sundarshitisin pachayarusin, wayarpunish spuyarusin, minumtawari yasinamun yuwar kayxuyarusin, waani neetsiri zar pup atusin, anootsiri kasaranganaya. 27 Zar pukamatshat Josuey wasundururee kamachtarangu, wasundururshitisin tsapush yusur yaruwayarusin, yuwashtam wach tapishurangana, anshutam tapshuyarusin kasaranganaya. Sheersin, yuwaptatam patumbich shtandarangana anpatatam yusur shtandaranganaya. Anoo nuw zurampatari atina, An patumbich na wandaritam taariya.

Ashiriya, na kamaneena yuwaa Amorrewshuchee kurak Israelchich kachingarangana anootsi.