1 Apanll Taarashipan nuwaa putayaru, wizpurpa machtarangiya. Watandsap yuwash wanap xanaru anush nuwaa yushindarangiya. 2 Anushsha watandsash nuwaa machichtara iturpiptara ashirangiya. Yuwash wanap puzanandari xanaru anush, ashirangiya. 3 Sheeru, nuwaatssha tárangiya. Shiy ¿amaksha? ¿In wanap yusur támeecheeja? nuw shiyaa atina, tárangu, nuwsha, Apaa Taarashipanee, shaanacha nee yasatasha, tárangina.

4 Ashiri Apanllsha nuwaa, Nuwamun suri tsiyatkush, Wanapoo, ichingarus chiyzayarus, Apanllee kuk mazinangtsa, tángcha. 5 Apanll Taarashipan siyaa ateeja. Nuw siyaa ituyamayaruri, yusur taarashee pangatssa. 6 Yanxeemtamtis wayakchuri, nutsis nutseenkachus, tasiritamtis taachiya. Sheeruri, siyash yusur tapuseeruri, sitarnasush taatssa. Ashkachuri, uwshtisin nuwaa Apanlleetsi Taarashipaneetsi yasachinllinaya, Apanll átcha tángcha, tárangiya. 7 Ashiri nuwsha anuritam tsiyataranguri, kizpur zunganeerangu anoo mazinarangina. Muntaz kizpur muntaztarangu, tsiparsha wanap yuw piyamaw tamutamuru ansha washunand ptsutaranganaya. 8 Anootssha wanapoo nap ashkuri, wayanxaam, misha nutsaseemtam kinarangiya. Ashirangu, anumun iwaz zapsha túmartarangiya. Itaru, nda kchitamuna.

9 Ashiri Apanllsha Taarashipan nuwaa tárangiya. Anoo tsiparee wan sur kuruzungi, tsipar yusur kchitamaama. Ashiri tángcha. Tsipareewis wanis naanints. Yap tsapurunas tspakatu taaris ambchiwis ichingarus naanints. Kuseerus, tsiparish pshtungints, in tsipar wanap yusur kchitamaama, tángcha, Apanll tárangu, 10 nuwsha anuritm tsiyataranguri, ansha tputs wan tsiparish pshturangusin, waanapsha yusur kchitaranganaya.* Apanll wanichu anu 11.11 tsiyatsis nipta tatsamooru taaritamta. Ashpartarishtisin tsipar támandarangsin, aship sundar wazapan shaniyaranganaya.

11 Anootssha Apanll nuwaa tárangiya. Israelchichin in napuz tamaparee ashirusin taaksin, in napurini izuuru puzama. Ashirucha, Chinashini nduneeru, masatangat ashkiniya, atanaya. 12 Ashiri shiysha nuwaa kuki kamaningcha, Apanll siyaa átcha tángcha. Nuw Israelchichee tsipar ashirusin, mapshishush taarana, anoo tashitungayaruri, yusur watsapuniptam wayachima, átcha Apanlli, tángcha. 13-14 Nuw siyaa mapshishishpaz taarus ashiris anoo tashitungachintspa. Ashiri nuw siyaa taarashis ituyamakpaz sheeruri, tsapunshis wayachintspa. Ashkachuri, anush siy nuwaa Apanlleetsi yasatssa. Nuw yuwaa tsiyatki anoo uru tatsamchina, nuw siyaa Apanlli atina, Apanll siyaa Israelchicheetsis átcha, nuw Esekiyeli siyaa atina.

Ashiriya, kamaneena yuwaa Apanll Israelchichee yusur napuz tamapari ashirusin, kiyung kachiykana anoo ituyamayaru, waanshutam watsapun wayachu anootsi.

15 Apanll nuwaa yusur tárangiya. 16 Apaya yasina. Nimun yandangi, Utaáchich Israelpa amikurtayanllina anootsi, tárangu, anumunsha yusur, Apaya misha yasina. Nimun Osiyarinchich Israelshuchpatatam amikurtayanllina anoo yandangtamcha. 17 Sheerush, yasinaa washunandarisha minumarisha kinamaam kpatstayarush ksangcha. 18 Wandaya Utaáchich anoo mashkatssin, ¿In maya áta? kamaninda, ateesinaya ashiru, 19 shiysha nee Apanll átcha tángcha. Utaáchich Israelchichpa washunandarisha yapandarsin taachinlliniya, Apanll átcha, tángcha. 20 Táyarush, anootsiri yandamaa payupayucha, wani yuwaa yandarangish anoo pangpana. 21 Ashiramchush, anumunsha tángcha. Apanll siyaa ateeja. Siy minup tsap naatambarus taakis, anoo tashitungayaruri, washunand tushaneeyaruri, tsapunpitamtis wayachintspa. 22 Ashkachuri, washunandarisha Israelshuchpat wayachintspa. Anush minumarisha kurak taakchu, ndusha chawpishtambarus taatssa. 23 Mishat, ndutam apanllputsireetsis mantsirimshee ungirtakus, arangeem ndusha minu yutaritshish chinakus taatssa. Nuw yuwaa yutari zapan ashirangis, anoo izuuru tachikchima. Ashkachuri, tputsireemi siyaa ínchima. Siysa nuwaa Apanllireemis ínatssa. 24 Dapiyarinchicheetssha tputsireetsi kurakareemis ínatssa. Ansha ichingurootsis ksutku, siysa nuwaa kuki izuuru payukus, kamachtamareetsi tuminutssa. 25 Nuwash tputsiri Akoparinshini watsapun taatssa. Yuwashtam zitaminaris taarangu anshutamtaya. Taakus, ichingarus iparis, chinllinitamtis izapaneerus, urutamari taatssa. Anush nuw tputsiri Dapiyarinchich nlluranur urutamaritam kurak taachiya. 26 Ashiri Israelchicheetsis tatsuyakchuri, wanasirsha taatssa. Yuw ashkachi an urutamari taamaama ashtachima. Mishat, tputsireemtamtis izapaneekchuri, anush pangeemi wanasirimshee wayachima. Ashkachuri, an urutamari taachiya. 27 Anush nuw taakuri, nuwaa Apanllireemis ínatssa. Nuwsha siyaa tputsireemi ínachintspa.* Yuwaa nish átu anootstam 2 Koríndshucheema 6.16 tayusima kamankiya. Itaru, Apanll wanichu anu 21.3 tsiyatsis nipta tatsamooru taaritamta. 28 Ashiri nuw pangi anush urutamari taaku, tputstisin nuwaa Apanlleetsi yasachinllinaya, Apanll átcha siyaa Israelchicheetsis, nuw Esekiyeli siyaa atina.

Ashiriya, kamaneena yuwaa Israelchich Utaáchchipa washunand minumtashumarisha taachinllina anootsi.

[Ashiri wappari. Watamaricha nuw Esekiyeli kuki.]