16
Ega ada natuna Isimeli.
1 E Ada Ebelamo gimiyamiya fafali Kenani wagaine malamala teni aku vavinena Selai kakalina, ada keke tamo kwamana gida venatune. Aku Selai wayana togugai vavine banae vineItipita, anayegana Ega. 2 Ada Selai moganena Ebelamo givonena, “Uitana, Yaubada keke gida awaegeku venatuna wagaine. Ada unanau yaku togugai vavine vovona una kiluvaluvana, kai anaita banae wagaine yaku gabu gana vetubulalagina.” ** Tayuwe adigiduwa taidei anafaiweya: kai vavine tauna gina itanuwagana banae kakalina aga yana togugai vavine gina awaegena moganena wagaine. Taidei wagaine yana tubudelideli gina kiveinalina. Gava biyabiyama togugai-dina ina venatunena ani keke taudi natudiyavo, aku banae tokakala natunavo.
Ada Ebelamo giawaveiwakana gavana Selai givonayena. 3 Taidei tova-nai Ebelamo gimiyamiya Kenani wagaine malamala teni, anatoveya Ebelamo vavinena Selai ani yana togugai vavine vineItipita anayegana Ega giatuegena moganena wagaine. 4 Ada Ebelamo Ega vovona gikiluvaluvana ke giveumatana.
Tova-nai Ega gilutovonina vaita bademowa giveifuga, au givebutu ginuwalaka-mowa anatoveimeya Selai wagaine. 5 E ada Selai Ebelamo givonena, “O ya koyona wagaine Iya vita ganuwanuwagana. Yaku togugai gaawaegena wagainiya, aku tova-nai gialamanena vaita bademowa giveifuga, au ginuwalaka-mowa wagaikuya. Yaubada gina veimeya adaiselu wagaideya gaito ani tunutunugina!”
6 Ada Ebelamo Selai givonena, “O ya togugai ada o ya ebaveimeya. Gavana ya nuwanuwa gilubodana mamauwe unagana.” E ada Selai gigugai koyona Ega wagaine, tayuwe faine giota anatoveimeya wagaine-deya.
7 Aku Yaubada yana anelose ginuwagana Ega gufa tovoga lilivane makama kavovona wagaine. E, gufa tovoga-nai tainei wai ginaunau Suwa ani afaine. 8 Ada anelose-nai givonena, “Ega, Selai yana togugai, gadamamauwe waina uela, ada gadedeku unauna?”
Ada gilufata, “Iya gaotaota akutoveimeya Selai wagaine-deya.”
9 Ada Yaubada yana anelose givonena, “Una yewani atoveimeya wagaine ke una awaegeni yana veimeya dibune. 10 Aimo ya tubudelideliyavo gana kiveinalina ada keke adiebaveyawa.
11 Tova taidei kwamana kamoniya,
ada una venatunena kwamana kaliva.
Anayegana una vewagana Isimeli,** 'Isimeli' anakivila anafaiweya 'Yaubada ginoganogala'.
faina waya nuwavita lakaina umiyamiya ke
nuwavita-nai uulouloloyena ani
bademowa Yaubada gialamanena.
12 Ada aimo natu banae yana dewa anafaiweya
doniki walawalaa.
Kaliva matatabuna ina venibainena ada banae kaduwe
kaliva matatabuna gina venibainedi, ada
aimo venibaina ginamiya tubuiyanavo wagaidiya.” ** Doniki walawalaa yadi dewa anafaiweya debai toyoga, ada keke meyameyaganina kaliva gina vewaledi.
13 Tainei wagaine Ega givona, “Velemoena Yaubada gaita-moena.” E ada Ega Yaubada anayegana ivelena, ‘Oyeni Yaubada Uitaitaku’. 14 Tayuwe vuvuna-nai wagaine tovoga anayegana ivewagana ‘Biya Laai Loi’.** Tovoga-nai anayegana anakivila anafaiweya, 'Tomiyavagata giitaikaku, ani yana tovoga'. Ada tovoga-nai malinai aimo gimiyamiya Kedesi ke Beledi aku nefanidiya.
15 Ada Ega giyewa ke Ebelamo natuna kaliva ivenatunena ada Ebelamo anayegana gidouwena Isimeli. 16 Tova-nai Ebelamo anamalamala 86 wagaine Ega natuna ivenatunena.
**16:2 Tayuwe adigiduwa taidei anafaiweya: kai vavine tauna gina itanuwagana banae kakalina aga yana togugai vavine gina awaegena moganena wagaine. Taidei wagaine yana tubudelideli gina kiveinalina. Gava biyabiyama togugai-dina ina venatunena ani keke taudi natudiyavo, aku banae tokakala natunavo.
**16:11 'Isimeli' anakivila anafaiweya 'Yaubada ginoganogala'.
**16:12 Doniki walawalaa yadi dewa anafaiweya debai toyoga, ada keke meyameyaganina kaliva gina vewaledi.
**16:14 Tovoga-nai anayegana anakivila anafaiweya, 'Tomiyavagata giitaikaku, ani yana tovoga'.