48
Ki jiin Moab tiŋ biiru po
1 Linba ki Yabint Yennu pak ki jiin Moab tiŋ poe na a:
“Ii mɔk ninbatinu nan Nebo teeb man. Bi doo biira.
Bi nyann Kiriataim-a, ki yeer li joonwakita na, ki li niib dii fei.
2 Moab fant na bota.
Datai nyann Hesbonn-a, ki lorin a bin biir Moab teeb na.
Madmenn doo na ji sii ŋmine. Jab saa saan ki lekir.
3 Horonaim niib mɔe a, ‘Woribuk. Biiru.’
4 “Bi biir Moab-a, gbiintir waas nba mɔ.
5 Gbiintir bi mɔnii fuur, sɔnu nba saa Luhif na ni,
nan parbiir mɔnii, Horonaim sɔnu ni.
6 Bi yeen a, ‘Kakitir ki chiar tinn i mɔŋ.
Ii chiar nan kunkoouk paak bɔŋ na.’
7 “Moab tiŋ, a teen yada a paŋ nan mɔkint nie,
ŋaan mɔtana bi saa nyannawa,
ki bi saa jii a tingbann Kemos nan u nijaana nan mannteeb,
ki saan namm digbangann.
8 Dosau kaa ki saa nyi biiru na ni,
ki baauk nan paanu kur saa biir.
Min Yennu-e pak na.
9 Fiint katanu ki chaan guun Moab tiŋ.
Li saa biir mɔtana;
li doi saa biar langbent, ki sɔɔ ji kan kɔɔ leŋi.”
10 (A sat mɔtont wunba ki tuun Yennu toonn nan u yan kur na paak. A sat mɔtont wunba ki chɔɔn niib ki kpi na paak.)
Ki jiin Moab digbana biiru po
11 Ki Yennu yet a, “Moab teeb tun be bi yamanie, ki sɔɔ ki mi soorib saan namm digbanganni. Moab digbann tee nan daan nba ki bi tuu sennir a lin baa tint, ki ki laŋir, ki bia ki kpaan lebitir dalenlia ni nae. Li baauk ki biir, ki li manu bia ki gbenti.
12 “Li paak, yoo baate ki n saa tun niib ki bin baar kpaar Moab teeb ki mɔɔn nan daan na. Dalena na saa biar koont, ki bi bia saa yeerir buri buri. 13 Ki fei saa soor Moab teeb nan baa jiantir tingbann nba tee Kemos na, nan fei nba din soor Israel teeb, baa din teen bi dindann tingbann nba tee Betel ni na.
14 “Moab jab, bee ki i want nan i tee paarib,
ki tee pardamm nba ki bi bikinii tɔb ni?
15 Moab nan li doi kur biira;
bi kpii Moab naasinpaara na kura.
Min nba tee Kpanbar, ki tee Yabint Yennu-e pak na.
16 Moab boontu nakina, ki u biiru baate mɔtana.
17 “Yimm nba kpia digbann maŋ ki mi u sanjaann po na,
ii mɔ u kpemɔnii man. Ii yet a,
‘Li yiikoo dianu na biira, ki li dontir nan yabint na ji kaa.’
18 Yimm nba be Dibonn na, ii nyi i baakir boor maŋ,
ki sik ki tan kar tanbiinii ni,
Moab biirtɔɔ na be nna, ki teen li ŋapaara na langbenta.
19 Yimm nba be Aroer na, ii see sɔnkpiŋ kii guu,
ki boi binba tiin yaatir na, ki laan bee teeni.
20 Bi saa turi gatu a, ‘Moab tiŋ baawa.
Ii mɔ u paak man; u dii feiwa.
Ii kokin Arnonn mɔkir ki mɔɔnt nan bi biir Moab-a.’
21 “Tubdatu baar doi nba be kunkonn yur paak nawa. Doi maŋe tee Holonn nan Jasa nan Mefaf 22 nan Dibonn nan Nebo nan Bef Diblataim 23 nan Kiriataim nan Bef-gamul nan Bef-meonn 24 nan Keriof nan Bosra. Tubdatu baar Moab doi nba fɔk nan linba naak kur paaka. 25 Bi biir Moab tiŋ paŋ nan u yiikoo nawa. Min Yennu-e pak na.”
Biaŋinba ki Yennu saa sikin Moab tiŋ
26 Yennu yet a, “A te ki Moab tiŋ na n yib daan, kimaan u yêt n mɔba. Moab saa dɔɔr birint u mɔŋ siit ni, ki niib saa laau. 27 Moab, a tian faa din yisin Israel niib biaŋinba-a? A din diab ki li naan nan bi tɔk nanyuk tɔkue ki bi soorib na.
28 “Yimm niib nba be Moab tiŋ ni na, ii nyi i doi ni ki saan kɔɔ tanfiat ni. Ii tee nan ŋmann nba tuu tia u tiɔk tanfiiɔk mɔb boor nae. 29 Moab want u mɔŋ bonchiann. N gbat biaŋinba ki Moab niib want bi mɔŋ, ki mɔk garuk, ki bia dont bi mɔŋ, nan baa dukii bi mɔŋ po biaŋinbawa. 30 Min Yennu mi bi garuk po. Baa want bi mɔŋ na, ŋaan li kur tee yanne; linba ki bi tuun na kan wei. 31 Li paak, n saa bui wunba kur be Moab tiŋ ni paak, nan niib nba be Kir Heres doo ni na paak. 32 N saa bui Sibma doo niib paak, ki lin gar Jaser doo niib paaka. Sibma doo, a tee nan daan tiik nba ki li yiinii tant ki poot Mɔk-kpeenn ki saa baar Jaser nae. Ŋaan mɔtana, bi biir a sakoouk lɔɔna nan a daan lɔɔna nawa. 33 Parmaasir nan kpinkpammuk ji kaa Moab nba tee tinŋaŋ na ni. N te ki daan nyik tootu daŋaaboora, sɔɔ kaa ki sii tee daan ki hoot nan kpinkpammuku.
34 “Hesbonn nan Eleale teeb mɔe, ki bi mɔnii na saa gbia Jahas, Soar niib gbia, ki Horonaim teeb nan Eglaf Selisiya teeb bia gbia. Nimrim kpenu na gbaa fɔɔra. 35 N saa te ki Moab niib n nyik bi mujoonu maruŋ nba ki bi tee bi jiant boa nawa, nan maruŋ nba ki bi mann ki teen bi pata nan bi yenbis na. Min Yennu-e pak na.
36 “N mɔe Moab tiŋ paak, nan Kir Heres niib paak, nan sɔɔe peeb naagbaak ki yiin kuun yanii na, kimaan baa tuu mɔk linba kur ji kaa. 37 Bi kur koor bi yute, ki bia pɔɔ bi tianii. Bi ŋmaar ŋmaar bi niie, ki lia bɔtoot liant. 38 Moab ŋei paak* 48.38 Bi ŋei yura paak, bi din tuu sere. nan doo na kur po, siar kaa ki pukin kpemɔnii, kimaan n yeer Moab nan bobir nba ki sɔɔ ki loon nae. 39 Moab biira. Ii yikin man. Niib ji yisin Moab tiŋe. Li ji tee langbente, ki digbana nba kpiar na ji laar. Min Yennu-e pak na.”
Biaŋinba ki bi saa biir Moab tiŋ
40 Yennu yet a digbanne saa tabint Moab teeb nan baakir nba tuu lat u kpinkpant ki tabint biaŋinba na, 41 ki bi saa nyann doi nan ŋapaara na. Li daar, jaŋmaanii saa soor Moab jab, nan poo nba tuu kar matdaaŋ paak, ki jaŋmaanii mɔkɔ nae. 42 Bi saa biir Moab, ki li ji kii tee digbanni, kimaan li niib yêt n mɔba. 43 Jaŋmaanchiɔŋ nan bootit nan barit dɔɔe ki guu Moab teeb. Yennu-e pak na. 44 Wunba yabir a wun nyi jaŋmaanchiɔŋ na ni saa baa bootuk ni, ki wunba tab doo bootuk ni saa sik baruk ni, kimaan Yennu-e te ki li tee Moab biiru yoo. 45 Kunsɔntinna nba tee tarii na yiabe a bin la gungurboor, Hesbonn doo nba ki kpanbar Sihonn din dia na ni, ŋaan li mun di muue. Muu dii kpanbar Sihonn ŋaak nan u tiŋ nan li mɔyêtuk damm na kurawa. 46 Tinin Moab teeb ninbaauk man. Bi boont ŋamm nba jiantir tingbann Kemos nawa, ki jii bi bonjai nan bi bonpoi ki saan namm digbanganna.
47 Ŋaan yoo nba waa na, Yennu saa ŋamm donn Moab teeb. Linba na kure ki Yennu yet a li saa tun ki tur Moab teeb.