9
1 Sɔnsau sii kaa ki bi saa tɔkin ki nyi daamii yoo na ni.
Ki jiin wunba tan saa di naan po
Sebulunn nan Naftali booru tiŋ din ban dii feiwa, ŋaan yoo baat ki yent maŋ saa la baakir, laa nyii sinsuuk ni mɔkgbeŋir na ki saa yondo po, ki saa tuu Jɔɔdann mɔk-pootir tiŋ, ki bia gar Galilii yent, siaminba ki boorganu kar na.
2 Niib nba tuu somm bunbɔnn ni na ji la yentchiɔŋa.
Bi tuu be bunbɔnn tiŋ na nie, ŋaan mɔtana yeeuŋ yent bi paaka.
3 Yennu, a turib kpinkpamjaanna, ki te ki bi mɔk parpeenn.
Bi kpamm faa tun linba na paake,
nan niib nba tuu jaan bi jeet ki kpamm,
koo ki chentir mɔkint nba ki bi fat ki kpamm biaŋinba na,
4 kimaan a kɔnn bi yɔkit nba tuu yɔɔk bi paak nawa,
ki bia jint gbann nba tuu boob bi sai ni na.
A nyann digbann nba tuu diin ki ŋmaŋit a niib nawa,
nan faa din nyann Midiann jab sianyoo biaŋinba na.
5 Jab nba lek na taasaat, nan bi tiat nba ki sɔn tarin na kur,
muue saa di.
6 Bi mar bik ki turita. Bi turit bonjaka.
Ŋɔɔe sii tee ti diatɔɔ. Bi sii yiu, “Bakitnauŋ ŋmakit-tɔɔ,”
nan “Yabint Yennu,” nan “Baa nba yɔɔ be,”
nan “Parmaasir kpanbar.”
7 U naan yiikoo sii kpaatire yoo kur;
u naan sii yɔɔ be parmaasir nie,
ki u saa gaar kpanbar Defid naan yent ki dia,
ki u yiikoo sii gaa linba took nan barmɔnii paak,
laa nyi mɔtana nan yoo nba waa mɔkmɔk nan mɔkmɔk.
Yabint Yennu-e lor wun tun linba na.
Biaŋinba ki Yennu saa dat Israel teeb tuba
8 Yennu sat mɔb nan u saa bu Israel teeb nba tee Jakɔb yaaboona na buut. 9 Israel teeb kur nba be Samaria doo ni saa bann nan ŋɔɔ Yennu-e tun linba na. Mɔtana bi mɔk garuko, ki want bi mɔŋ, ki yeen a, 10 “Tant ŋaak na baawa, ŋaan ti saa ŋamm maar nan tanae. Bi kɔnn kɔnn sinsabik yɔkaa nawa, ŋaan ti saa jii kpek yɔkaae ki ŋamm yɔk.”
11 Yennu donn bi datai wutoae ki bi lekib. 12 Siria teeb nba be yondo po, nan Filistia teeb nba be yonbaa po na yaat mɔi-e, ki nak Israel teeb. Linba na lek, ŋaan Yennu wutoor ki maaki, u nuu bia tiane a wun dat bi tuba.
13 Israel teeb ki nyik bi toonbiiti; Yabint Yennu nba lek dat bi tuba na, ŋaan bi ki jen u boori. 14 Dayenn kɔɔe ki u saa dat Israel teeb kur nan bi tɔɔndamm tuba; u saa pot yur nan joor kur. 15 Nikpera nan nijaana nae tee yur, ki faak sɔkiniinba na mun tee joor. 16 Binba din dia niib na diab tuntunae, ki ŋmatib fas. 17 Li paak, Yennu kan chab ki bi naasimm na nan yenɔkɔɔwa n paaki, ki bia kan tin bi pakɔi koo bi kpeebii na ninbaauk, kimaan niib na kur tee binba ki waa Yennu-e, ki tee nɔɔnŋmiant damm, ki bi maan kur tee biit. Linba na lek, ŋaan Yennu wutoor kan maaki, u nuu bia sii tiane a wun dat bi tuba.
18 Niib na biit di nan muu nba tuu di jagotuk nan kunkonii nae. Li di nan muu nba tuu di fɔɔr, ki munyuuk do nae. 19 Yabint Yennu wutoor nba doo na paak, ki u tubdatu na di nan muu na tiŋ na kur po, ki kpi niib maŋ, sɔɔ kur gbaa a wun tinn u mɔŋe. 20 Tiŋ na siar kur po niib bibit jeet nba kur ki bi laate, ŋaan bi kon na kan ban gbenn. Bi poŋ ŋman bi tiɔŋ waase. 21 Manase booru nan Efraim booru wor bi leebe, ki bia taan leeb ki wor Juda. Linba na lek, ŋaan Yennu wutoor ki maaki, u nuu bia tiane a wun dat bi tuba.