1 Ki Yennu ŋamm pak nan Job a: 2 Fin nba pakir nan min Yabint Yennu na, a saa ŋmin amii a saa jiinin gatue-e?

3 Ki Job jiin a: 4 Yennu, n pak jatiiwa; n saa jiin a bia? N ji kan bikin nan man yet siari. 5 N poŋ dɔŋ pak, ki li gar maa bo saa pak linbawa.

6 Ki Yennu ŋamm pak nan Job, ki li nyii wonpaaruk ni ki yet a:

7 Mɔtana, teent siir na jɔɔ na, ki gat n buboit na. 8 A koor a fan wann nan n ki tuun linba ŋane, ki sennin biit ni, ŋaan senn a mɔŋ ŋant ni-i? 9 A paar nan maa paar biaŋinba nae-e? A kunkɔr saa fit tant sanpaapo nan n yar nawa-a? 10 Li-i tee nnaie, fan fiir set nan a baakir nan dont-n-mɔŋ, ki tur a mɔŋ yabint nan ŋant. 11 Gotir binba mɔk dont-n-mɔŋ na, ki kpaar a wutoor bi paak, ki sikinib. 12 Nn, gotirib ki sikinib, ki biir toonbiit damm, baa see siaminba na, 13 ki piin bi kura tiŋ ni, ki baanib kpeentiŋ, 14 ki n sii tee sinsinn daanɔ nba saa pak donta, ki yet nan a nyann nyannu na a tiɔŋo.

15 Gotir bonkob-gbeŋir nba tee yeenn na; mine namɔ, ki bia nama. U ŋman mɔɔte nan naab na. 16 Paŋ ki namii u gbanant ni, ki yiikoo gbee u nanbɔna ni. 17 U joor see sinsonne nan kpek na, ki u taa nanbɔna mɔk paŋ. 18 U kpaba wakiie nan kutmɔnt na, ki u taa tee nan kut laana na.

19 Ŋɔɔe mantik tee yaarlituk, n naamii na ni. Ki wunba namɔ na kɔɔe saa fit nyannɔ. 20 Ki mɔɔt nba saa dinnɔ na pia kunkona paak, ki tee siaminba ki muuk ni bonkobit jerin. 21 U dɔɔ kunkonii nyakae, ki bɔrii kaar nba see bakir ni na. 22 Ki kunkonii nan warii nba see ki kpia kpenu na lintɔ ki teenɔ maasu. 23 U ki tiin nyunmɔnn jaŋmaanii; ki li-i tee Jɔɔdann mɔkir nyun na liatɔ yoo nba, ki u ŋmin soon nna. 24 Ŋmee saa fit jɔɔn u ninbina ŋaan soorɔ? Ŋmee saa fit soor ki fut u miana?