1 Ki Job jiin a: 2 N bia lek daa yêene, ki jikit n daamii ki beer Yennu. N kan fit nyik ki daa kurii. 3 N sunman ki n bo mi maa saa lomɔ siaminba, kii mi maa saa tɔkin sian ki saan u boor. 4 N bo saa jii n daamiie ki turɔ, ki nɔi mɔniɔk kur a lin sommin. 5 N loon man bann linba ki u saa yete, nan waa saa turin gatu biaŋinba. 6 Yennu saa jii u paŋ na kur ki kɔn nanima-a? Aaii, u saa gbiint ki turime, li-i tee ki n pak. 7 N tee niŋanɔe, n saa fit pak nan Yennu-wa; ki u saa ŋaan yann nan n ki mɔk biiti.

8 N lon Yennu yondo po, ŋaan ki u kaa leŋ, ki bia lomɔ yonbaa po, ki ki lau. 9 Yennu be u toona ni niigaŋ po nan niidiitu po, ŋaan ki n bia lek ki lau. 10 Ŋaan Yennu mi taaŋmaatir nba kur ki n ŋmaa. Li-i tee ki u bikinin, u saa la nan n yeene. 11 N waa sɔnu nba ki u gann na nan barmɔnii, ki ki turin siar po.

12 N yɔɔ tuun linba ki Yennu senn nae. N tuun waa loon biaŋinbae; n ki tuun n mɔŋ nba loon biaŋinba kaa.

13 Yennu ki ban lebitir. Sɔɔ kaa ki saa fit kɔn nanɔ, koo ki gɔɔr waa loon wun tun linba. 14 U saa gbeen waa lor a wun tun linba ki turima; lor maŋ tee u lora nba ki u mɔk na yenne; 15 li paak teen mi-i dukin linba na kur po, ki n jekir ki tiinɔ jaŋmaanii. 16 Yabint Yennu te ki n parcheenn bot, ki li kɔɔnin jijeet. 17 Ŋaan bunbɔnn na kan fit te ki n ŋmini, bunbɔncheenn nba dɔɔk n numpo na.