1 Tɔn, ki Sofar wunba tee Naama booru ni nirɔ na jiin a: 2 Mɔbona na kur sii fit nyi, ki jiinu daa jiinta-a? Machiɔŋ kan fit tur nirɔ mɔnii. 3 Job, a dukii ti kan fit tura gatue-e? A baryana na saa fit te ki ti ŋmina-a? 4 A want a mɔŋ nan faa piak linba kur tee barmɔniie, ki want a mɔŋ nan a tee popeenn daanɔ Yennu boor. 5 N sunman ki Yennu n bo tura gatu. 6 U saa beta nan bonbɔrkara bonchiann be yanfoon ni; ki bonyena be ki mantik sumii ki gar nisaarik bannuwa. Yennu-e daar a tubir ki li ki jaŋ waa bo saa dat a tubir biaŋinba.

7 A saa fit bann Yennu yaarlituk toona nan u yabint nan yiikoo nba teewa-a? 8 Sanpagbouŋ na, Yennu mi li paak, ki li fɔk kaa terik nan nirɔ n baar. Yennu mi kpeentiŋ, ŋaan fin ŋarin ki mi. 9 Yennu yabint yarin ki gar tingbouŋ na, ki bia yarin ki gar mɔkgbeŋir. 10 Li-i tee Yennu soora, ki saan nana a wun bu a buuti, ŋmee be ki saa fit gɔɔrɔ? 11 Yennu mi niib nba ki mɔk nyɔɔt; u laat bi toonbiit kur. 12 Bɔŋ nba kan fit mar nirɔ biaŋinba na, nnae mun ki jatuk kan fit subiri.

13 Job, ŋaant ki a par-ii be nan Yennu, ki fii meiɔ. 14 Nyint toonbiit nan bonkpeta nba be a ŋaak ni, 15 ki ŋamm took durinya na fanu nan parcheenn, 16 ki a tan saa tamm a daamii powa, ki li saa gar nan nyunmɔnn nba tuu gar, ki bin tamm li po na. 17 A binbeŋ ni sii yeen ki gar yonnu nba tuu nyikintir yonsuuk ni nawa, ki a binbeŋ nba be bunbɔnn ni na tan saa yent nan sanyafaar nae, 18 ki a tan sii be weriku ni, ki gbee nan dindann; ki Yennu saa guura ki tura foon. 19 Ki a tan kii tiin a datai jaŋmaanii; ki niib bonchiann tan saa boia sommir po. 20 Ŋaan tondamm na tan saa got lint ki kɔŋ bi dindann, ki bi saa la nan sɔnu kaa ki bi saa paak, ki dindanyemmir nba ki bi mɔk na tee kuume saa baarib.