54
Yennu lomm nba jiin Israel teeb po
1 Jerusalem, a tee nan poo nba ki mar nae,
ŋaan mɔtana a saa fit yin yaŋ kii hoot nan kpinkpammuk.
Mɔtana a sii mɔk waas bonchiann
ki gar poo nba ki u sɔrɔ ki ban nyikɔ.
2 Yarikit a ŋaak nba ki a be leŋ na,
tantir li ŋmiit ki pukin li dachaata paŋ.
3 A saa tant a kpaar lokir kur po,
a niib saa gaar tiŋ nba ki digbangana niib kar leŋ na.
Doi nba dɔɔ koont na saa gbee nan niib.
4 Daa tiin jaŋmaanii, a ji kan di fei, a kan sik tiŋi.
A saa tamm biit nba ki a din tee poopaaŋ ki tuun na,
ki bia tamm faa tuu be a kɔɔ nan pakɔɔk na.
5 A nantɔɔ sii tee nan sɔrɔ nae ki tura.
U sanne tee Yabint Yennu.
Israel teeb kasii Yennu saa tinna,
ŋɔɔe tee durinya na munn diatɔɔ.
6 Israel, a tee nan poopaaŋ nba ki u sɔrɔ tuu yaat ŋaan nyikɔ,
ki u yamin yêt nae, ŋaan Yennu yia a fan jen u boor,
ki yeen a:
7 “Yoo waaminnae ki n nyika,
ŋaan n saa ŋamm gaara nan lonchiɔŋo.
8 Yoo waaminnae ki n donn wutoor ki nyika,
ŋaan n saa wanna n lomm yaayoo siiyoo.”
Yennu nba tinta nae pak linba na.
9 “Nowa yooewa ki n din senn mɔsonn
nan n ji kan biir tingbouŋ na nan nyumi.
Mɔtana n senn mɔsonn nan n ji kan ban donn wutoor a paak,
n kan ban ŋmakita nan biak, koo ki dat a tubiri.
10 Jɔɔt nan kunkona-i lekii but but,
ŋaan n lomm nba be a ni na kan ban gbenn;
n sii yɔɔ dia mɔsonn nba ki n senn
nan n saa tura parmaasir nae.”
Yennu nba loona nae pak linba na.
Ki jiin Jerusalem paann na po
11 Ki Yennu yet a, “Jerusalem, fin doo nba di biak ki kaa sommtɔɔ,
ki sɔɔ kaa ki saa maan a par na,
n saa ŋamm maa a fiakir nan tanbinyinyira nba ki li daauk paare.
12 N saa jii tana nba mɔn, ki li daauk paar na,
ki maa a ditɔɔtii, ki jii tana nba nyirii nan muu na,
ki maa a tammɔi, ki jii tanbinyinyirlia nba ki li daauk paar na
ki maa joonjouk nba saa linta.
13 “N tiɔŋo saa tumii a niib, ki turib gor nan parmaasir.
14 Mamɔmm nan binbenŋaŋ saa tura paŋ.
A saa nyi biak nan jaŋmaanii ni.
15 Li-i tee ki sɔɔ leka, u tun nna ŋaan ki n nuu kaa leŋ.
Wunba kur kɔn nana, see ki u baa.
16 “Mine nan saauk damm nba tuu joo muu ki pur kut
ki nan jatiat na,
ki bia nan jɔɔ nba tuu jii jatiat maŋ ki kpi kuun na.
17 Ŋaan jatiɔk kaa ki saa fit paana daŋi,
ki a sii mɔk gatu ki tur binba kur piak biira na.
N saa kɔn n toontunna paak ki turib nyannu.”
Yennu-e pak na.