FIRIFIANI
Firifianido Vua Amure
Maza ije Foru fu uria dibure fima ijia fu fasi be isoena e ma vierafevo Firifae ijia karivo ije nijiae. Ro are Firifae ije fu sidove anuigi be ro fu Mesedonia guove ijia. Ro fasi ije fu isoema ije fu e Firifaeko ijiebe urina zinune mani buone kena e Ifafurodaetasi vajavoga fu kena ro Foru vajaema fu ije isoe. Ro maza ririkua be Foru vua maeje abe vaema ijia fu fuone amure fu Firifae ijia vua maeje abe bu kuariamoga e gue bu vua ije fiena ma vierafei. Ro e ma vierafevo are Firifae ijia kariva ije bu mani uruke naeva baki. Rove buka urina zinune e ma vierafevo Jerusareme ijia e sinuome baki ijiebuo mani afuikinu ro kuke Foru ifejadufuo ije afui. Foru fu dibure fi rove fuka ireobo oemarei. Ro kuke fu vierafe e Firifaeko ije bu irufui gue biediakuva buka oemaredufuo fu ije isoe. Ro Foru fu bu kabuaekabuaeki ijia karinoedufuo ije kuariae. Ro kuke e ije vua kufuimena nijasiavo ijiebe bu kikekimiaga bu vajae surive buone kania ufudufuo vierafevo ijene ju kuariae. Ro kuke fu vierafe buka Jesu vareki igege karinoedufuo ije ejafiana kuariae.
Foru fu vua binobino fu buki Firifiani isoema ijeja -
1:1-11 E Firifaeko ijiebe Foru oetuakinu ifejaeva ijadufuo fu una buone oemarema ijene.
1:12-26 Vame binobino ije bu Forudo reva ijiakiro irere fu renoeno ije fu kuariaema ijene.
1:27–2:18 E Godi ma vierafevo ijiebuo vame bu kenoedufuo ijene.
2:19-30 Timotikiro Ifafurodaetasi bu rade izege redufuo Foru fu ije vame amaerijiaema ijene.
3:1–4:9 Vame maturaema ijiakiro e Godi ma vierafevo bu izege karidufuo ijene.
4:10-20 Foru sinuome bino bu vekinu fu vajaeva ijadufuo buone oemarema ijene.
4:21-23 Ro rade fu bu anadiaema ijene.
1
Foru fasi fu isoena E Firifaeko nijiaema ijene
1 Na Foru nare ro Timoti e ije no Jesu Kuraesido imenoejo nore fasi ige isoe.
No isoena Godido e ije ja sidove Firifae ijia karina Jesu Kuraesi ma vierafevo ijiakina e mamekanu jone ijiakina e ije bu e gue ifejiavo ije ja nijiave.
2 Na baname isoega Godi Asoe nuvuone ijiakiro E Ireobo Jesu Kuraesi bu maza boeje ja ma rejiakinu samuagiaga ja kafaena karinoedufuo.
Foru fu e Firifaeko ije buefuo Godi baname isoema ijene
3 Maza boeje naka ja vierafevo ijadufuo na joefuo Godi Asoe nuvuone ije fuone oemareve. 4-5 Ro maza boeje baname none na e boeje joefuo isoevo ije naka oemarekinu isoeve. Ijadufuo maeje ja iko zinume ijia na Jesu Kuraesido vua maeje kuariavo jaka fie. Ijadufuo ja urina ire binobino naejiekinu bijuakievo ije ja uria rena ruove. 6 Ja vua ije na kuariaeva ije jaka fiena abe ma vierafeva ijadufuo na vierafe fune Godire vame maeje jone remo ijadufuo fube areke. Ro fuka uria ijiege ifejiaga ja vame ma ijiaru rekinu vakuma maza radekuma ije Jesu Kuraesi fu una ruomo ijia fu ire boeje foteke re furike.
7 Ro jaeje naka maza boeje oe none igia vierafenoeve. Ijadufuo na vierafe ije fu maredo na ijiege ja vierafekinu finoke. Ijadufuo maeje e boeje jaka na ifejiena i mukore ige Godi fu abe miema ije meve. Ja dibure ige na fijo ijia ro kuke nane kekeva ijia jaka Godido vua maeje ige na vafaena abe kuaenoevo ije ifejie. Ijadufuo e boeje buka vua ije fiena uri giriesana vua ije abe uti farekinu ma vierafeve. 8 Rove naka ma kuariave none izege na ja oetuavo ije fune Godire fuonukua giena vierafega izege na ja oetuavo ije funeka Jesu Kuraesido oe ijia ruae.
9 Ro na baname isoega jone ja oetuanamivo ije fuka ubaerena vaga ja Godi fu e izeki ije mukoreigia gana vierafedufuo. 10 Areme ja samadukua vame ma ro ise ijia giana una vame ma ijiaru nuvediana kenoedufuo. Ro kuke maza rade Kuraesi fu una ruomo ijia jabe jaevekiro jaka maturaena fu bieke. 11 Ro kuke ja Jesudo daro ijadufuo duvado ijia Godido vame ma ijia kenoega e bu ire maeje ja e guebuo revo ije giana una Godido ive dabe aroeke.
Foru dibure fu fima ijare Godido vua ije ifejiamoga fu ireobo rema ijene
12 Ijadufuo erafano na vierafe ja vua ige mukoreigia vierafedufuo. Vajae fiane binobino ige na biediavo ije bu ijiebe Godido vua maeje bijukuraema baki ro fuka ifejamoga fu ireobo rena vae. 13 Ijadufuo e juo karijo boeje ro e boeje igia kariva ije bu vame ige fu none rema ije gie. Ijadufuo bu ma vierafega nana ma Kuraesido imevo ijadufuo na dibure fivoro bu ijiege vierafei. 14 Ijadufuo e uruvana Jesu ma vierafevo bu dibure ige na fivo ije giena buka daro abe. Ijadufuo bu Godido vua maeje bu abe kuaenoevo ije bu jumekinu ro jaevevo baki.
15 Ro ije fuka ma e gue Kuraesido vua maeje e nijasiavo bu ige na ijiege revo ige giena buka una oe isema na vierafekinu ziegafieve. Ijadufuo maeje Godi fuka na ifejieko e uruvana buka vua none fiena una Jesu ma vierafeve. Ro e gue buka na oetuavo ijadufuo bu vua maeje dabe e kuaeve. 16 Bu vierafega na Kuraesido vua maeje vafaevo ijadufuo bu una na ifejieve. 17 Ro e ije zienoejo ije bu Jesu Kuraesido vua maeje bu naebe abe ma vierafena e kuariave. Ro bume ive buone kame mamekanu rekuae vierafe. Ijadufuo bu dibure ige na fivo ijia buka una vajae fiane binodua vajiekuae vierafe.
18 Ro vua ije bu nijasiavo ije bu oe ma vierafena nijasia ro bu oe isema vierafekinu nijasiavo ije na naebe ireobo vierafe. Ro gaga bune ma Jesu Kuraesido vua ije nijasiavoga ije naka ireobo oemareve. 19 Ijadufuo maeje na ma vierafe Jesu Kuraesido Kavene ijadufuo daro ijiakiro baname jone ja noefuo isoevo ijiebe irufui none binobino na biediavo ijia kenujieke. 20 Ro naka ireobo vierafe iviama ro ba maza boeje vua none na e kuariavo ijia nabe mamoeke. Ro kuke na vierafe na barone ro na uria fivo ijia nabe jume ro jaeveke. Ro naka ireobo oemarekinu oe none boeje ijiakuma Kuraesi dabe aroedufuo. 21 Ijadufuo na uria ume igia fivo ije ire boeje na renoejo ije naka Kuraesido renoeke. Ro na baronekuva ije na kuke are maeje ijia vadufuo. 22 Ro na uria ume igia fikuva ije naka ire uruvana Kuraesido reke. Ro na bigae na barone ro na uria fidufuo ije ire inokiro ije vame izare fuka ma ije na naebe vierafe.
23 Na ire inokiro ije buka na dabe guegue ivieve. Rove na vierafe na ume ige na fivo ije naka arena va Kuraesiki fikiro vierafe. Ijadufuo maeje are ije Kuraesiki fidufuo ijare fuka ume ige no karivo ije ma asi. 24 Rove naka uria ja ifejiakiro vierafe ijadufuo na uria ume igia jaena finoke. 25-26 Ijadufuo na ma vierafega Godi fube kie na baronekiro naka uria jaena fikinu ifejiadufuo. Ijadufuo maeje na vierafe naka ja ifejiaga ja giriesana vua na nijasiakinu kuariavo ije ma vierafekina ja e damuiki reke. Na uria jaena fivo ijadufuo jone izege ja Jesu Kuraesi oemarejavo ije fuka oe jone ijia do igege iritoejena ajiauradufuo.
Godido vua maeje vafaedufuo
27 Ro vua ka ma ireobo ijeja nika Jesu Kuraesido vua maeje na nijasiavo ja fieva ijia kenoekinu karivafo. Ja ijiege kenoekina na ijia vua ro na naebe vuako ijia na oenoekinu izege ja kavene ijia oe besu rena vua maeje ijadufuo vafaevo ije fieke. 28 Ijadufuo jade uri e ije bu jaena nigaraevo ije giana jumevo. Ro nika samadukua kuariaga nijasiaga bu ijia giana vierafero Godi rade bu fu kame uinitukiro jaeje fu karauniakiro bu ijiege vierafeke. 29 Ijadufuo maeje jaeje fune Godire uria iko zinume ijia ja Jesu Kuraesido imedufuo kei. Ijadufuo ja fu ma vierafedufuo ijiaru bakiro jaka fuefuo vajae fiane binobino biediake. 30 Ijadufuo jaeje jane iviama naena vajae fiane besu ijene biediave. Ro vajae fiane ige iviama na biediavo ije fune vajae fiane besu na ude biediavo ja fieva na ijene uria fina biediave.